وبلىستىق اۋماقتىق رەفەرەندۋم كوميسسياسىنىڭ توراعاسى ماناربەك سادۋوۆتىڭ بايانداۋىنا قاراعاندا, ساعات كۇندىزگى 10-عا دەيىن اسا ماڭىزدى ساياسي ءىس-شاراعا ءۇن قوسىپ, ءوز قالاۋىن جاسايتىن 507 447 ادامنىڭ 135 151-ءى داۋىس بەرىپ ۇلگەرگەن. وبلىس ورتالىعىنداعى №1 ورتا مەكتەپتە ۇيىمداستىرىلعان №8 سايلاۋ ۋچاسكەسىنە 1461 ادام تىركەلگەن ەكەن. العاشقى لەكپەن 100-دەن استام ادام ءوز تاڭداۋىن جاساپ, داۋىس بەرىپ ۇلگەردى. سايلاۋ ۋچاسكەسىنىڭ ءتورايىمى ساندۋعاش نۇرقانوۆانىڭ ايتۋىنا قاراعاندا, بەلسەندىلىك جوعارى.
وبلىس اكىمى ەرمەك مارجىقپاەۆ تا وسى سايلاۋ ۋچاسكەسىندە ءوز تاڭداۋىن جاسادى. ءوڭىر باسشىسىنىڭ ايتۋىنا قاراعاندا, ماڭىزدى ساياسي ناۋقان جاۋاپكەرشىلىكپەن ۇيىمداستىرىلۋدا. وسى جەردە بوتاگوز جانە رۋستام احمەتوۆتەردىڭ وتباسىن كەزدەستىردىك. ەكى بالا تاربيەلەپ وتىرعان جاس وتباسى بولاشاعىنىڭ باياندى, ۇرپاعىنىڭ باقىتتى بولارىنا نىق سەنىمدى. سول ءۇشىن دە ءوز تاڭداۋىمىزدى جاساپ, داۋىس بەردىك دەيدى ولار.
اتالمىش سايلاۋ ۋچاسكەسىندە مۇمكىندىگى شەكتەۋلى ادامداردىڭ دا ۋاقىتىلى داۋىس بەرۋى قامتاماسىز ەتىلۋدە. ۋچاسكەدەگى سايلاۋ كوميسسياسى مۇشەلەرىنىڭ ايتۋىنا قاراعاندا, داۋىس بەرۋشىلەردىڭ دەنى ەندى كەلە باستاماق.
