«جاسىل ەل» جاستار ەڭبەك جاساقتارىنىڭ جاڭا ماۋسىمىنىڭ اشىلۋ سالتاناتىنا اقپارات جانە قوعامدىق دامۋ مينيسترلىگىنىڭ وكىلدەرى, قوعام قايراتكەرلەرى, رەسپۋبليكالىق جاستار ۇيىمدارىنىڭ باسشىلارى مەن «جاسىل ەل» وڭىرلىك شتابتارىنىڭ وكىلدەرى قاتىستى.
«جاسىل ەل» جالپىۇلتتىق جوباسى 2005 جىلدان بەرى جۇزەگە اسىرىلىپ كەلەدى. بۇل جاستار اراسىنداعى ەڭ تانىمال باعدارلامالاردىڭ ءبىرى دەسەم, قاتە ەمەس. باعدارلاما اياسىندا جاس قازاقستاندىقتار قالالاردى كوگالداندىرۋعا قاتىسىپ, ەلىمىزدىڭ ەكولوگيالىق جاعدايىن جاقسارتۋعا ءوز ۇلەسىن قوسىپ جاتىر. سونىمەن قاتار جوبا ەڭبەككە باۋلىپ قانا قويماي, جاستاردى ورتاق يدەيالار توڭىرەگىندە توپتاستىرادى», دەپ اتاپ ءوتتى ازاماتتىق باستامالاردى قولداۋ ورتالىعى باسقارما توراعاسىنىڭ ورىنباسارى جاسۇلان بيسەمبيەۆ.
«جاسىل ەل» جاستار ەڭبەك جاساقتارى – ەكولوگيالىق جوبالار مەن مەملەكەتتىك باعدارلامالاردى ىسكە اسىرۋ ارقىلى جاستاردى ماۋسىمدىق جۇمىسپەن قامتۋعا, قالالار مەن ەلدى مەكەندەردى كوگالداندىرۋعا, اباتتاندىرۋعا, جاستاردى پاتريوتتىق تۇرعىدا تاربيەلەۋگە باعىتتالعان جالپىۇلتتىق قوزعالىس.
«ەڭبەك ماۋسىمىنىڭ اشىلۋى – ءبىز اسىعا كۇتەتىن ەڭ ماڭىزدى وقيعالاردىڭ ءبىرى. جىل بويى جاستار تابىس تاۋىپ قانا قويماي, تاجىريبە دە جينايدى, ءوز قابىلەتتەرىن ۇشتايدى, جاڭا مۇمكىندىكتەردى اشادى. جاساقتاردى ىرىكتەۋ كەزىندە ءبىز حالىقتىڭ الەۋمەتتىك وسال توپتارىنان شىققان بالالارعا وزدەرىن كورسەتۋگە, دەمالىس كەزەڭىندە اقشا تابۋىنا كوڭىل بولەمىز. بيىل ءبىز 30 مىڭنان استام جاستى جۇمىسقا ورنالاستىرۋدى جوسپارلاپ وتىرمىز», دەدى «جاسىل ەل» رەسپۋبليكالىق شتابىنىڭ جەتەكشىسى دانيار ازامات.
جوبانى اقپارات جانە قوعامدىق دامۋ مينيسترلىگىنىڭ جانە ازاماتتىق باستامالاردى قولداۋ ورتالىعىنىڭ قولداۋىمەن «جاسىل ەل» جاستار ەڭبەك جاساقتارىنىڭ رەسپۋبليكالىق شتابى ۇيىمداستىردى.
