باقىتجان جۇماعۇلوۆ ءوز سوزىندە ءاربىر قازاقستاندىقتىڭ رەفەرەندۋمعا قاتىسۋى ماڭىزدى ەكەنىن اتاپ ءوتتى. كونستيتۋتسيالىق رەفورما ازاماتتار ءومىرىنىڭ بارلىق سالاسىنا جاڭالىق اكەلەتىنى جانە ەلىمىزدى ودان ءارى نىعايتۋدا وڭ وزگەرىستەر بولاتىنى ايتىلدى.
«قازاقستان كونستيتۋتسيا بويىنشا پرەزيدەنتتىك باسقارۋ نىسانىنداعى دەموكراتيالىق, زايىرلى, ءبىرتۇتاس جانە الەۋمەتتىك-قۇقىقتىق مەملەكەت. ادام, ونىڭ ءومىرى, قۇقىقتارى مەن بوستاندىقتارى – مەملەكەتتىڭ ەڭ قىمبات قازىناسى», دەپ اتاپ ءوتتى باقىتجان جۇماعۇلوۆ.
سەناتور سۇلتانبەك ماكەجانوۆ ءوز سوزىندە مەملەكەت باسشىسىنىڭ وڭىرلەردى دامىتۋ, جەرگىلىكتى اتقارۋشى ورگانداردىڭ جۇمىسىن جەتىلدىرۋ جانە جەرگىلىكتى ءوزىن-ءوزى باسقارۋدى ورىستەتۋ ماسەلەلەرىنە باسا نازار اۋداراتىنىن اتاپ ءوتتى.
«ەنگىزىلگەن وزگەرىستەرگە سايكەس, اكىمدەردى بالاما نەگىزدە سايلاۋ تەتىگىن ىسكە اسىرۋ ءماسليحاتتاردىڭ ءرولى مەن ىقپالىن كۇشەيتەدى, كادرلىق شەشىمدەر قابىلداۋ كەزىندە جەرگىلىكتى حالىقتىڭ مۇددەسىن جاقسى ەسكەرۋگە مۇمكىندىك بەرەدى», دەدى سۇلتانبەك ماكەجانوۆ.
دەپۋتاتتار سونىمەن قاتار وقىتۋشىلاردىڭ وزەكتى سۇراقتارىنا جاۋاپ بەردى. دەپۋتات دينار نوكەتاەۆا ولارعا جوعارى ءبىلىم سالاسىنداعى ينتەرناتسيونالداندىرۋ باعىتتارى جانە مەكتەپتەردە كاسىپتىك باعدار بەرۋ ماماندارىن ەنگىزۋدى جوسپارلاۋ تۋرالى ويلارىن ورتاعا سالدى.
