ءىس اتىراۋ قالاسىنىڭ №2 سوتىندا قارالادى.
بۇعان دەيىن باقىتگۇل حامەنوۆاعا قاتىستى قىلمىستىق ءىس سوتقا جەتكەنىن جازعان ەدىك. وبلىستىق سوتتىڭ ءباسپاسوز قىزمەتىنەن ءمالىم ەتكەندەي, بيىلعى 26 مامىردا اتىراۋ قالاسىنىڭ №2 سوتىنا قر قىلمىستىق كودەكسىنىڭ 366-بابىنىڭ 3-بولىگىنىڭ 2-تارماعىمەن اتىراۋ وبلىسى اكىمىنىڭ ورىنباسارى باقىتگۇل حامەنوۆاعا, اتىراۋ وبلىسى مادەنيەت, تىلدەردى دامىتۋ جانە ارحيۆ ءىسى باسقارماسىنىڭ باسشىسى اقىلبەك رىسقاليەۆكە, قر قىلمىستىق كودەسىنىڭ 367-بابىنىڭ 2-بولىگىمەن «ب» جشس-ءنىڭ ديرەكتورىنا قاتىستى قىلمىستىق ءىس تۇسكەن.
«وسىعان بايلانىستى باستى سوت وتىرىسىن وتكىزۋ جونىندە شەشىم قابىلداندى. باستى سوت وتىرىسىن 2022 جىلعى 14 ماۋسىمدا ساعات 14:45-تە وتكىزۋ تاعايىندالدى», دەپ ءمالىم ەتتى وبلىستىق سوتتىڭ ءباسپاسوز قىزمەتىنەن.
اتىراۋ وبلىسى اكىمىنىڭ ورىنباسارى باقىتگۇل حامەنوۆا بىلتىرعى جەلتوقساندا قاماۋعا الىنعان. ونىمەن بىرگە مادەنيەت, ارحيۆتەر جانە قۇجاتتاما باسقارماسىنىڭ باسشىسى اقىلبەك رىسقاليەۆ پارا الۋ كۇدىگىنە ىلىنگەن.
كۇدىكتىلەرگە اباي ەسكەرتكىشىن جاساۋ جانە ورناتۋ بويىنشا 145 ملن تەڭگە سوماسىنا مەملەكەتتىك ساتىپ الۋ شارتىن جاساعانى ءۇشىن ءبىر توپ اداممەن الدىن الا ءسوز بايلاسۋ ارقىلى جشس باسشىسىنان 4,5 ملن تەڭگە سوماسىندا پارا الۋ كۇدىگىمەن قىلمىستىق ءىس قوزعالدى.
اتىراۋ وبلىسىنىڭ ارنايى تەرگەۋ سوتى ۋاقىتشا ۇستاۋ يزولياتورىندا وتىرعان وبلىس اكىمىنىڭ ورىنباسارى باقىتگۇل حامەنوۆانى ۇيقاماققا الۋ تۋرالى سانكتسيا بەرگەن بولاتىن. كەيىن ول تەرگەۋ يزولياتورىنا قامالدى. اتىراۋ وبلىسى اكىمىنىڭ ورىنباسارىنا قاتىستى قىلمىستىق ءىس قر قىلمىستىق كودەكسىنىڭ 366-بابىنىڭ 2-بولىگىمەن (كوپ مولشەردە پارا الۋ) تەرگەلدى.
باقىتگۇل حامەنوۆا اتىراۋ وبلىسى اكىمىنىڭ ورىنباسارى لاۋازىمىن اتقارۋعا 2020 جىلدىڭ 13 جەلتوقساندا تاعايىندالعان.
