اۋا رايىنىڭ قولايسىز, كۇننىڭ جاۋىندى بولعانىنا قاراماستان جاقسى باستامانى قولداپ, كىتاپ مەرەكەسىنە كەلگەندەردىڭ قاراسى قالىڭ بولدى. كىتاپ جارمەڭكەسىنىڭ مەرەكە ءارى ماڭىزدى بيزنەسكە اينالعانىن كورمە قوناقتارىنىڭ سۇيىكتى اۆتورلارىمەن كەزدەسۋگە اسىعىپ, كىتابىن قولتاڭبامەن ساتىپ الىپ جاتقانىنا قاراپ باعامداۋعا بولادى. كىتاپ نارىعىنىڭ جاڭالىقتارىمەن تانىسۋعا كەلگەن مادەنيەت جانە سپورت ءمينيسترى داۋرەن اباەۆ پەن الماتى قالاسىنىڭ اكىمى ەربولات دوساەۆ سالتاناتتى جيىندا ءسوز سويلەپ, باسپاگەرلەرمەن تىلدەستى.
– بۇل جارمەڭكەگە وتاندىق 55 كىتاپ مەكەمەسى مەن رەسەي, وزبەكستان, قىرعىزستان سەكىلدى كورشىلەس ەلدەردەن باسپاگەرلەر مەن ارنايى دەلەگاتسيا قاتىسىپ وتىر. مادەنيەت جانە سپورت مينيسترلىگى كىتاپ ءىسى سالاسىنداعى وڭ باستامالاردى ءاردايىم قولداپ كەلەدى. اتاپ ايتقاندا, بيىل جاڭا «قازاق ادەبيەتى» سەرياسىمەن جاس قالامگەرلەر مەن جاڭا ەسىمدەردىڭ شىعارمالارى ارنايى لوگوتيپپەن باسىپ شىعارىلادى. وعان قوسا, «بالالار مەن جاسوسپىرىمدەر ادەبيەتى» سەرياسىمەن جالپى تارالىمى 72 000 دانادا بالالار ادەبيەتىن باسىپ شىعارىپ, مەملەكەتتىك كىتاپحانالارعا تاراتۋدى كوزدەپ وتىرمىز. مينيسترلىك بيىل العاش رەت رەسپۋبليكالىق دەڭگەيدە «ۇزدىك بالالار شىعارماسى», «جىلدىڭ ۇزدىك كىتابى», «جاس قالامگەر» جوبالارىن جۇزەگە اسىرۋدى جوسپارلاپ وتىر. اتالعان جوبالار اياسىندا بالالار ادەبيەتى اۆتورلارى مەن جاس قالامگەرلەردى قولداپ, وتاندىق اۆتورلاردىڭ كوميكستەرىن, بالالارعا ارنالعان وزەكتى ادەبيەتتەردى باسىپ شىعارۋ قاراستىرىلۋدا, – دەدى د.اباەۆ سالتاناتتى جيىندى اشۋ راسىمىندە سويلەگەن سوزىندە.
سونىمەن قاتار مەملەكەت باسشىسىنىڭ تاپسىرماسىنا سايكەس, مينيسترلىك 2023 جىلدان باستاپ جاس قازاقستاندىق جازۋشىلار مەن اقىندار ءۇشىن ارنايى پرەزيدەنتتىك ادەبي سىيلىق تاعايىنداۋ تۋرالى جوبانى ازىرلەپ جاتقانىن سۇيىنشىلەدى. پرەزيدەنتتىك سىيلىقتى تاعايىنداۋدا پروزا, پوەزيا, دراماتۋرگيا, بالالار ادەبيەتى نوميناتسيالارى ەنگىزىلەدى. اتالعان سىيلىقتى قازاقستاننىڭ 19 بەن 29 جاس ارالىعىنداعى ازاماتتارعا تابىستاۋ قاراستىرىلعان. مادەنيەت جانە سپورت ءمينيسترى الەم ەلدەرىندەگى مادەني ءىس-شارالار تاجىريبەسىن نەگىزگە الا وتىرىپ, وسىنداي اۋقىمدى كىتاپ جارمەڭكەسىن ۇيىمداستىرۋعا ەرەكشە قولداۋ بىلدىرگەن الماتى قالاسىنىڭ اكىمدىگىنە العىس ايتتى.
كىتاپ پەن قالامگەردىڭ ناسيحاتى ءۇشىن تاپتىرماس ءىس-شاراعا اينالعان كىتاپ جارمەڭكەسىندە ادەبيەت جانە ونەر قايراتكەرلەرىمەن كەزدەسۋلەر, جاڭا كىتاپتاردىڭ تۇساۋكەسەر راسىمدەرى جانە ماڭىزدى تاقىرىپتار بويىنشا مامانداردىڭ قاتىسۋىمەن دوڭگەلەك ۇستەلدەر ۇيىمداستىرىلدى. قازاقستاندا كىتاپ مادەنيەتىن دامىتۋدى باستى باعدارى ەتىپ وتىرعان مادەنيەت مينيسترلىگى وسىنداي جارمەڭكەنى ءار وڭىردە وتكىزۋگە دايىن ەكەنىن جەتكىزدى.
الماتى
