قازاقستان دزيۋدو فەدەراتسياسىنىڭ ءباسپاسوز قىزمەتىنەن ءمالىم ەتكەندەي, الەمدىك دەڭگەيدەگى جارىس مادەنيەت جانە سپورت مينيسترلىگى, نۋ-سۇلتان قالاسى اكىمدىگىنىڭ جانە «Sport Qory» سپورتتى قولداۋ قورىنىڭ قولداۋىمەن ۇيىمداستىرىلدى.
ەكى كۇنگە سوزىلعان ايتۋلى دوداعا 22 ەلدەن 201 سپورتشى قاتىسىپ, باق سىنادى.
قازاقستان قۇراماسى 1 التىن, 2 كۇمىس جانە 3 قولا مەدالمەن جالپىكوماندالىق ەسەپتە برازيليا, تۇركيا جانە يران ەلدەرىنەن كەيىن ءتورتىنشى ورىنعا تابان تىرەدى.
پارادزيۋدودان جارىسقا قاتىساتىن سپورتشىلاردىڭ ەكى ساناتى بولادى – J1 جانە J2. ءبىرىنشى ساناتى – زاعيپ سپورتشىلار, ەكىنشىسى – كوزى ناشار كورەتىندەر.
العاشقى كۇنى J2 ساناتى بويىنشا 48 كەلى سالماق دارەجەسىندە ەلوردالىق اقمارال ناۋاتبەك جەڭىسكە جەتتى. اقمارال بارلىق قارسىلاسىن يپپونمەن جەڭدى.
بۇل – ونىڭ پاراليمپيادالىق دزيۋدودان ءبىرىنشى حالىقارالىق جارىسى.
ا.ناۋاتبەك وتكەن جىلعا دەيىن دزيۋدو بويىنشا كۇرەسىپ, ەل نامىسىن الەمدىك ارەنادا ابىرويمەن قورعاپ ءجۇردى.
ايتكەنمەن 2021 جىلى جاڭا ماۋسىم قارساڭىندا مەديتسينالىق باقىلاۋدان وتكەندە, ماماندار كوزىنىڭ ناشار كورەتىنىن جانە دزيۋدو باسەكەسىنە جىبەرىلمەيتىنىن جەتكىزىپ, سپورت مانسابىن پارا بويىنشا جالعاستىرۋعا كەڭەس بەرگەن.
جىل باسىندا ول قازاقستان چەمپيوناتىندا قارسىلاس شاق كەلتىرمەگەن ەدى. گران-پري الدىندا IBSA ماماندارى تاعى دا تەكسەرىس جۇرگىزىپ, 2 جىل پارادزيۋدودادا كۇرەسۋگە رۇقسات بەرگەن.
وسى گران-پري باسەكەسىندە جەڭىمپاز, جۇلدەگەرلەرگە دزيۋدوداعىداي رەيتينگتىك ۇپايلار ۇلەستىرىلەدى. ءسويتىپ, اقمارال پارادزيۋدودان العاشقى الەمدىك جەڭىسىنە قول جەتكىزدى.
«ەندى كەلەسى تەكسەرۋ پاريج پاراليمپياداسى قارساڭىندا بولادى» دەيدى سپورتشى.
سونداي-اق ەرعالي شامەي 73 كگ (J1) جانە ولجاس ورازالى 73 كگ (J2) سالماقتا كۇمىس, دايانا فەدوسوۆا (57 كگ, J2) قولا مەدالعا يە بولدى.
جارىستىڭ ەكىنشى كۇنىندە بىردەن 5 قازاقستاندىق سپورتشى, اتاپ ايتقاندا, جانبوتا امانجول (90 كگ, J2), دۋلات بوگەنباەۆ (+90 كگ, J2), باۋىرجان ارىستانبەكوۆ (90 كگ, J1), ەرلان وتەپوۆ (+90 كگ, J1), ەرلان قونكيەۆ (+90 كگ, J2) قولا جۇلدە ءۇشىن كۇرەستى. وسىلاردىڭ ىشىنەن ج.امانجول مەن ب.ارىستانبەكوۆ قانا ۇزدىك ۇشتىككە ىلىكتى.
ايتا كەتەيىك, توكيو پاراليمپياداسىندا قازاقستاندىق پارادزيۋدوشىلار ءۇش كۇمىس جۇلدەنى جەڭىپ العان بولاتىن.
