الەم • 28 مامىر، 2022

باكۋدە بىرنەشە كىتاپتىڭ تانىستىرۋ ءراسىمى ءوتتى

حالىقارالىق تۇركى اكادەمياسى باكۋ قالاسىندا ۇيىمداستىرىلعان ءى تۇركى الەمى ادەبيەت جانە كىتاپ فەستيۆالى اياسىندا ازەربايجان باعىتىندا جارىق كورگەن بىرنەشە كىتاپتىڭ تانىستىرۋ ءراسىمىن وتكىزدى، دەپ حابارلايدى Egemen.kz.

گاۋھار قاپاش

اتاپ ايتقاندا، كوپشىلىك نازارىنا نيزامي گانجاۋيدىڭ «جەتى ارۋ»، ء«لايلى — ءماجنۇن» داستاندارى قازاقتىڭ تاير جاروكوۆ، قاسىم امانجولوۆ، جاقان سىزدىقوۆ، ديحان ءابىلوۆ، تاكەن الىمقۇلوۆ قاتارلى كورنەكتى اقىندارى اۋدارمالارى نەگىزىندە قۇراستىرىلعان تولىق جيناق رەتىندە ۇسىنىلدى. ايگىلى حامسانىڭ ەكى تۋىندىسىن قامتىعان باسىلىم تانىمال ازەربايجاندىق سۋرەتشى فاحراددين الي ۆاليوعلىنىڭ ارنايى سالعان گرافيكالارىمەن بەزەندىرىلگەن.

سونىمەن قاتار، الىشەر ناۋايدىڭ حالىقارالىق تۇركى اكادەمياسىنىڭ قولداۋىمەن جارىق كورگەن ازەربايجان تىلىندەگى «تاڭدامالى شىعارمالار» جيناعىنا ونىڭ حامساسىنداعى بەس داستان تولىعىمەن ەنگىزىلگەن. باكۋ مەملەكەتتىك ۋنيۆەرسيتەتى تۇركولوگيا كافەدراسىنىڭ مەڭگەرۋشىسى، تانىمال تۇركولوگ، دوكتور راميز اسكەر اۋدارعان ايگىلى اقىن تۋىندىلارى ونىڭ وتكەن جىلعى مەرەيتويى اياسىندا ازىرلەنگەن بولاتىن.

بۇعان قوسا، فەستيۆال اياسىندا اباي قاراسوزدەرىنىڭ ايدا ەيۆازوۆا تارجىمەلەگەن ازەربايجان تىلىندەگى باسىلىمى تانىستىرىلدى. ايتا كەتۋ كەرەك، تۇركى اكادەمياسى اباي قۇنانباي ۇلى شىعارمالارىن باۋىرلاس تۇركى حالىقتارىنىڭ تىلىنە اۋدارىپ باسۋ جۇمىستارىن كەڭىنەن جۇرگىزگەن بولاتىن.

كىتاپتاردىڭ تانىستىرىلىم ءراسىمىن بەلگىلى ازەربايجاندىق جۋرناليست، اۋدارماشى ايدا ەيۆازوۆا جۇرگىزىپ وتىردى. تۇركى اكادەمياسىنىڭ ۆيتسە-پرەزيدەنتى فيزۋلي ماجيدلي، ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ پروفەسسورى امانتاي ءشارىپ، وزبەكستاندىق عالىم نۋگينا شەرمۋرادوۆا، بەلگىلى قىرىمتاتار جازۋشىسى، جۋرناليست زەرا بەكيروۆا، ازەربايجان ۇلتتىق عىلىم اكادەمياسى نيزامي گانجاۋي اتىنداعى ادەبيەت ينستيتۋتىنىڭ پروفەسسورى الماز ۋلۆي بينناتوۆا ءسوز سويلەپ، پايىمدى پىكىرلەرىمەن ءبولىستى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز