ايماقتار • 28 مامىر، 2022

قىزىلوردادا بۋ-گاز قوندىرعىسى سالىنادى

31 رەت كورسەتىلدى

قىزىلوردا قالاسىندا 2025 جىلعا دەيىن ەلەكتر قۋاتى 240 مۆت بولاتىن بۋ-گاز قوندىرعىسىن سالۋ جوباسى جۇزەگە اسادى، دەپ حابارلايدى Egemen.kz.



بۇل تۋرالى ەنەرگەتيكا ءمينيسترى بولات اقشولاقوۆ قىزىلوردا وبلىسى تۇرعىندارىمەن جۇزدەسۋىندە ايتتى.

«بيىلعى شىلدە ايىندا قىزىلوردا وبلىسىندا ەلەكتر قۋاتى 240 مۆت بولاتىن بۋ-گاز قوندىرعىسىن سالۋدى كوزدەيتىن جوبا بويىنشا ينۆەستورلاردى ىرىكتەۋ جوسپارلانۋدا. ول اۋكتسيوندىق ساۋدا-ساتتىقتى وتكىزۋدىڭ بەكىتىلگەن گرافيگىنە سايكەس جۇرگىزىلەدى. ونى ىسكە اسىرۋدىڭ بولجامدى قۇنى 215،1 ملرد تەڭگەنى قۇرايدى. پايدالانۋعا بەرۋدىڭ بولجامدى مەرزىمى - 2025 جىل. وسى جوبانى ىسكە اسىرۋ 700 ملن.كۆت كولەمىندەگى قازىرگى تاپشىلىقتى جابۋعا مۇمكىندىك بەرەدى»، دەدى مينيستر.

ءمينيستردىڭ ايتۋىنشا، كەيىنگى 3 جىلعا جۇرگىزىلگەن تالداۋ بويىنشا جىلۋ-ەلەكتر ورتالىعى جوندەۋ ناۋقانىنا قاراجات بىركەلكى بولىنبەگەن. مىسالى، 2019 جىلى قىزىلوردا جىلۋ- ەلەكتر ورتالىعىندا نەگىزگى جابدىقتارعا كۇردەلى جوندەۋ جۇرگىزىلگەن جوق، ول 2020 جىلى 1،4 ملرد تەڭگەنى قۇراسا، بىلتىر 50 پايىزعا تومەندەدى.

2019-2021 جىلدارى 5 قازاندىققا جانە 3 گاز تۋربينالىق قوندىرعىعا كۇردەلى جوندەۋ جۇمىستارى جۇرگىزىلدى. جالپى، قىزىلوردا وبلىسىنىڭ ەنەرگەتيكالىق كاسىپورىندارىنىڭ جۇمىسىنا اسەر ەتەتىن پروبلەمالىق ماسەلەلەر دە بار. ولاردىڭ قاتارىندا نەگىزگى جابدىقتىڭ جوعارى توزۋى، سىرداريا وزەنىندەگى سۋ دەڭگەيىنىڭ تومەندەۋى، ماتەريالدار مەن جابدىقتار قۇنىنىڭ قىمباتتاۋى، ماتەريالدارمەن جانە جيناقتاۋىشتارمەن جەتكىلىكسىز قامتاماسىز ەتىلۋى سەكىلدى جاعدايلار كەزدەسەدى.

«بۇگىنگى تاڭدا قىزىلوردا وبلىسىندا جيىنتىق قۋاتى 89 مۆت بولاتىن 9 كۇن ەلەكتر ستانتسياسى جۇمىس ىستەپ تۇر. مينيسترلىك جىل سايىن جاڭارتىلاتىن ەنەرگيا كوزدەرى جوبالارىن ىرىكتەۋ بويىنشا اۋكتسيوندار وتكىزەدى. ماسەلەن، 2022 جىلعى اۋكتسيوندىق ساۋدا-ساتتىققا جاڭاقورعان، شيەلى جانە ارال اۋداندارىندا 20 مۆت-تان كۇن ەلەكتر ستانتسياسىنىڭ 3 لوتى جوسپارلانىپ وتىر»، دەدى مينيستر.

سونداي-اق، قازىر قىزىلوردا وبلىسىن گازداندىرۋ دەڭگەيى 66،5 پايىزدى قۇرايدى. شامامەن 550،8 مىڭ ادام تابيعي گازعا قول جەتكىزگەن. گازبەن جابدىقتاۋ جونىندەگى جوبالار ءتۇرلى باعدارلامالار ارقىلى جەرگىلىكتى جانە رەسپۋبليكالىق بيۋدجەت، «قازاقگاز» كومپانياسىنىڭ قاراجاتى ەسەبىنەن جۇرگىزىلۋدە.

«بىلتىر ەنەرگەتيكا مينيسترلىگىنىڭ بيۋدجەتتىك باعدارلاماسى اياسىندا 4 جوبانى جۇزەگە اسىرۋعا 2،8 ملرد تەڭگە ءبولىندى. جىل قورىتىندىسى بويىنشا قازالى قالاسى، جالاعاش كەنتى جانە شيەلى اۋدانىنداعى بەكەجانوۆ ەلدى مەكەنىن گازداندىرۋ بويىنشا 3 جوبا اياقتالدى. 2022 جىلى جالعاساتىن 1 جوبانى جانە جاڭا 6 جوبانى قارجىلاندىرۋ ءۇشىن رەسپۋبليكالىق بيۋدجەتتەن گازداندىرۋعا 3،7 ملرد تەڭگە مولشەرىندە قاراجات كوزدەلگەن»، دەدى مينيستر.

قىزىلوردا وبلىسى ەلىمىزدە مۇناي ءوندىرۋ كولەمى بويىنشا 5-ورىندى ەنشىلەيدى. وڭىرگە مۇناي ءوندىرۋدىڭ جالپى كولەمىنىڭ 6،14 پايىزى تيەسىلى. مۇناي ءوندىرۋدى «قازگەرمۇناي»، «پەترو قازاقستان قۇمكول رەسورسيز»، «تورعاي پەترولەۋم» جانە وزگە دە 14 كومپانيا جۇزەگە اسىرادى. بىلتىر ايماقتا مۇناي ءوندىرۋ 4،3 ملن توننانى قۇراسا، ول بيىلعى 4 ايدا 1،4 ملن توننانى شامالادى. قىزىلوردا وبلىسىندا يگەرىلىپ جاتقان كەن ورىندارىنىڭ باسىم بولىگى يگەرۋدىڭ سوڭعى ساتىسىندا تۇر. بۇل رەتتە مۇناي ءوندىرۋدىڭ جىل سايىنعى تابيعي تومەندەۋى بايقالاتىنىن اتاپ ءوتۋ كەرەك. ماسەلەن، 2015 جىلدان باستاپ ايماقتاعى ءوندىرىس 2 ەسە تومەندەگەن. بۇگىنگى تاڭدا جەر قويناۋىن پايدالانۋشىلاردى مۇناي ەكسپورتىنىڭ ۇلەسىن ءوندىرۋ كولەمىنەن 50 پايىزدان استام كولەمدە ۇلعايتۋ ماسەلەسى تولعاندىرادى.

«وسى ماسەلە بويىنشا بىلتىر «كەڭقياق-اتىراۋ» مۇناي قۇبىرى رەۆەرسىنىڭ جوباسى ىسكە اسىرىلدى. ول پاۆلودار جانە شىمكەنت مۇناي وڭدەۋ زاۋىتتارىن باتىس قازاقستان مۇنايىمەن (اتىراۋ، ماڭعىستاۋ وبلىستارى) سەنىمدى جۇكتەۋدى قامتاماسىز ەتۋگە جول اشتى. ال قىزىلوردا وبلىسىنىڭ مۇناي ءوندىرۋشى كومپانيالارى ءۇشىن جۇكتەمەنى ازايتۋعا مۇمكىندىك بەردى. ول ىسكە قوسىلعان ساتتەن باستاپ اتىراۋ جانە ماڭعىستاۋ وبلىستارىنىڭ جەر قويناۋىن پايدالانۋشىلارى ءۇشىن ىشكى نارىققا مۇناي جەتكىزۋ بويىنشا جۇكتەمە شامامەن 10-15 پايىزعا ارتتى. مينيسترلىك ىشكى نارىققا مۇناي جەتكىزۋ بويىنشا تەڭگەرىمسىزدىكتى جويۋ جونىندەگى جۇمىستى ودان ءارى جالعاستىرادى»، دەدى مينيستر.

 

سوڭعى جاڭالىقتار

ورال قوقىس استىندا قالۋى مۇمكىن

ايماقتار • بۇگىن، 16:47

دوللار قايتا قىمباتتادى

قارجى • بۇگىن، 15:58

ۇقساس جاڭالىقتار