مىندەتتەر ءمىنسىز ورىندالۋى ءتيىس

كەشە پرەمەر-ءمينيستردىڭ ءبىرىنشى ورىنباسارى باقىتجان ساعىنتاەۆ سەلەكتورلىق رەجىمدە كەڭەس وتكىزىپ, وندا ۇستىمىزدەگى جىلدىڭ ءبىرىنشى توقسانىنداعى الەۋمەتتىك-ەكونوميكالىق دامۋ قارقىنى مەن «قولجەتىمدى تۇرعىن ءۇي-2020» باعدارلاماسىنىڭ جۇزەگە اسىرىلۋى قارالدى, دەپ حابارلادى پرەمەر-ءمينيستردىڭ ءباسپاسوز قىزمەتى. سونداي-اق, كەڭەسكە قاتىسۋ­شى­لار كوكتەمگى دالا جۇمىستارىن ۇيىمداستىرۋ مەن وتكىزۋ, اعىم­داعى سۋ تاسقىنى احۋالى جانە وڭىرلەردەگى الەۋمەتتىك ماڭىزدى ازىق-ت ۇلىك باعالارىنىڭ تۇراق­تىلىعى ماسەلەلەرىن تالقىلادى. كەڭەسكە ورتالىق مەملەكەتتىك ورگانداردىڭ باسشىلارى, وبلىس­تاردىڭ, استانا مەن الماتى قالا­لارىنىڭ اكىمدەرى قاتىستى. «قولجەتىمدى تۇرعىن ءۇي-2020» باعدار­لاماسىنىڭ ورىندالۋ بارىسى تۋرالى وڭىرلىك دامۋ مينيس­ترى ب.جامىشەۆ حابارلادى. ونىڭ ايتۋىنشا, قاڭتار-ناۋرىزدا تۇر­عىن ءۇي قۇرىلىسىنا 110 ملرد. تەڭگە باعىتتالعان (بارلىق قارجى­لان­دىرۋ كوزدەرىنەن) نەمەسە وتكەن جىلدىڭ ءتيىستى كەزەڭىنىڭ 123 پايىزى, 1,7 ملن. شارشى مەتر تۇرعىن ءۇي پايدالانۋعا بەرىلدى, ول 2013 جىلعى ءتيىستى كەزەڭنىڭ 111 پايىزىن قۇرايدى. الەۋمەتتىك-ەكونوميكالىق دا­مۋ قارقىنى تۋرالى ەكونوميكا ءجا­نە بيۋدجەتتىك جوسپارلاۋ ۆيتسە-ءمينيسترى م.ابىلقاسىموۆا حابارلادى. الدىن-الا مالىمەتتەر بويىنشا, ۇستىمىزدەگى جىلدىڭ قاڭتار-ناۋرىزىندا ءىجو ءوسىمى 2,9 پايىزدى قۇراعان. مەملەكەت باسشىسىنىڭ تاپسىرماسىنا سايكەس ۇكىمەت الدىندا 2014 جىلى ەكونوميكانىڭ 6-7 پايىز دەڭگەيىندە تۇراقتى ءوسۋىن قامتاماسىز ەتۋ مىندەتى تۇر. توتەنشە جاعدايلار ءمينيسترى ۆ.بوجكو اتاپ وتكەنىندەي, تاسقىن سۋ احۋالى ەلدە تۇراقتى. بارلىق سۋ قويمالارىنداعى سۋدىڭ دەڭگەيى جوبالىق كولەمگە ساي. ەرنەۋىنەن اسىپ كەتۋ قاۋپىنىڭ الدىن-الۋ ءۇشىن قاۋىپسىز جاعدايدا سۋدى اعىزىپ جىبەرۋ جۇزەگە اسىرىلۋدا, ول ءوز كەزەگىندە وزەندەر ارنالارىن شايۋعا جانە ەكولوگيانى جاقسارتۋعا ىقپال ەتەدى. ۇستىمىزدەگى جىلى 21,8 ملن. گا القاپقا اۋىلشارۋاشىلىق داقىل­دارىن ورنالاستىرۋ جوسپارلانعان, ول 2013 جىلعىدان 313 مىڭ گەك­تارعا نەمەسە 1,5 پايىزعا ارتىق, دەپ حابارلادى سالالىق ۆەدومستۆو باسشىسى ا.مامىتبەكوۆ. كوكتەمگى تۇقىم سەبۋ الاڭى وتكەن جىلعى 19 ملن. گا دەڭگەيىندە ساقتالادى. استىق داقىلدارىنا 15,9 ميلليون گا, ونىڭ ىشىندە بي­دايعا 12,8 ميلليون گا ەگىستىك ارنال­ماق. وسىلايشا, 2013 جىلعى دەڭگەي 311,3 مىڭ گەكتارعا قىسقا­رادى. مايلى داقىلداردى 2 ميل­ليون گەكتارعا, قانت قىزىلشاسىن 11,5 مىڭ گەكتارعا, ماقتانى 133 مىڭ گەكتارعا, كوكونىس-باقشا دا­قىل­دارىن 220,7 مىڭ گەكتارعا, كارتوپتى 189 مىڭ گەكتارعا, ازىقتىق داقىلداردى 3,4 ميلليون گەكتارعا ورنالاستىرۋ جوسپارلانىپ وتىر. «قولجەتىمدى تۇرعىن ءۇي» باع­دارلاماسىن جۇزەگە اسىرۋعا قارجى تولىق كولەمىندە ءبولىندى. وبلىس اكىمدەرى بۇل ماسەلەنى ايرىقشا باقىلاۋدا ۇستاۋى كەرەك. ۋاقىتىندا يگەرىلمەگەن اقشالار تابىستى يگەرىلىپ جاتقان وڭىرلەرگە قايتادان ءبولىنىپ بەرىلەتىن بولادى, دەپ اتاپ ءوتتى ب.ساعىنتاەۆ. وسى ماسەلە بويىنشا اي سايىن سەلەكتورلىق كەڭەس ءوتىپ تۇرادى. ءبىز الەۋمەتتىك-ەكونوميكالىق دا­مۋ قارقىنىن, مەملەكەتتىك جانە سالالىق باعدارلامالار مەن مەم­لەكەت باسشىسىنىڭ بارلىق ءتيىستى تاپسىرمالارىنىڭ ورىندالۋ بارىسىن وپەراتيۆتى رەجىمدە قاداعالاپ وتىرامىز, دەپ تۇيىندەدى ءسوزىن ءبىرىنشى ۆيتسە-پرەمەر.