بۇل تۋرالى سەناتتا «حالىقتىڭ تابىسىن ارتتىرۋدىڭ 2025 جىلعا دەيىنگى باعدارلاماسى» كەشەندى جوسپارىن ىسكە اسىرۋدى تالقىلاۋ كەزىندە پرەمەر-ءمينيستردىڭ ورىنباسارى ەرالى توعجانوۆ ايتتى.
«مەملەكەتتەن قولداۋ شارالارىن الاتىن ءىرى بيزنەسكە قاتىستى مىندەتتەمەلەردى بەلگىلەۋ ەسەبىنەن, وندا ىستەيتىن 2,8 ملن قىزمەتكەردىڭ ورتاشا جالاقىسى وسەدى. مۇنداي تالاپتى ءبىرىنشى رەت قويىپ وتىرمىز.
ەكى اپتا بۇرىن قاراعاندى وبلىسىندا ءىرى بيزنەستىڭ قاتىسۋىمەن بۇل باعىتتا اتقارىلىپ جۇمىستاردىڭ الدىن الا قورىتىندىلارىن تىڭدادىق. ناتيجەسىندە, قازىردىڭ وزىندە قازاقستان بويىنشا ءىرى ونەركاسىپتىك كاسىپورىندارداعى جالاقى مولشەرىن 15-تەن 30 پايىزعا دەيىن وسىرۋگە مۇمكىندىك تۋدى. ونىڭ قاتارىندا «قازمينەرالس» (15%), «قازازوت» (20%), ERG» (25%), «قازاقمىس» (30%) بار», دەدى ە. توعجانوۆ.
ونىڭ ايتۋىنشا, ەكونوميكانىڭ ءتۇرلى سالالارىندا ينۆەستيتسيالىق جوبالاردى ىسكە اسىرۋ ەسەبىنەن 2025 جىلعا دەيىن 2 ملن-نان استام جاڭا جۇمىس ورنى قۇرىلادى.
«ونىڭ ىشىندە ونەركاسىپ پەن كاسىپكەرلىكتە – 950 مىڭ, ينفراقۇرىلىمدىق جوبالار اياسىندا – 583 مىڭ, اگروونەركاسىپتىك كەشەندە – 458 مىڭ, تۋريستىك سالادا 59 مىڭ جۇمىس ورنى اشىلادى. اتاپ ايتقاندا, ونەركاسىپ سالاسىندا (تاۋ-كەن مەتاللۋرگيا كەشەنى, ماشينا جاساۋ, حيميا ونەركاسىبى, كىرپىش جانە تسەمەنت ءوندىرىسى) بارلىعى 713 جوبا جوسپارلانعان. سونىڭ اراسىندا بيىلدىڭ وزىندە 165 جوبا ىسكە قوسىلىپ 16 مىڭنان اسا جاڭا جۇمىس ورنى اشىلادى», دەدى ۇكىمەت باسشىسىنىڭ ورىنباسارى.
ايانا توعانبەك
