كەزدەسۋگە الماتى, جامبىل, قىزىلوردا, تۇركىستان وبلىستارى جانە شىمكەنت قالاسى ءماسليحاتىنىڭ حاتشىلارى, تۇراقتى كوميسسيالار توراعالارى جانە دەپۋتاتتار, سونداي-اق وبلىس, قالا, اۋدان قوعامدىق كەڭەستەرى مەن ارداگەرلەر ۇيىمدارىنىڭ توراعالارى, كاسىپكەرلەر, جاستار مەن شارۋالار, بەلسەندى قوعام وكىلدەرى, قوعامدىق شتاب مۇشەلەرى قاتىستى.
رەفەرەندۋم وتكىزۋ جونىندە ەل ازاماتتارىنىڭ الدىنا قويىلعان مىندەتتى جۇزەگە اسىرۋ ماقساتىندا «قازاقستان ءماسليحاتتارى دەپۋتاتتارىنىڭ بىرلەستىگى» رەسپۋبليكالىق قوعامدىق بىرلەستىگىنىڭ باستاماسىمەن وڭىرلەردە قوعامدىق شتابتار قۇرىلعان بولاتىن. بۇگىندە ولار ەل كولەمىندە اقپاراتتىق-ناسيحاتتىق جۇمىستاردى كەڭىنەن جانە بەلسەندى تۇردە جۇرگىزۋدە.
تۇركىستاندا وتكەن كەزدەسۋدە سول بەلسەندى جۇمىستار جونىندە دە كەڭىنەن اڭگىمەلەندى. اتا زاڭعا ەنگىزىلەتىن وزگەرىستەر مەن تولىقتىرۋلاردى قابىلداۋ بويىنشا وتەتىن بۇكىلحالىقتىق رەفەرەندۋمنىڭ ساياسي ماڭىزىن ناسيحاتتاۋ ماقساتىنداعى كەزدەسۋدى رەسپۋبليكالىق شتابتىڭ جانە «قازاقستان ءماسليحاتتارى دەپۋتاتتارىنىڭ بىرلەستىگى» رەسپۋبليكالىق قوعامدىق بىرلەستىگىنىڭ توراعاسى تولەۋبەك مۇقاشەۆ جۇرگىزىپ وتىردى. «رەفەرەندۋم – حالىق بيلىگىنىڭ ايقىن ۇلگىسى, ءاربىر قازاقستاندىقتىڭ ءوز ازاماتتىق ۇستانىمىن ءبىلدىرۋ ارقىلى جاڭا قازاقستاندى قۇرۋعا تىكەلەي ۇلەس قوسۋىنىڭ جارقىن كورىنىسى. مەملەكەت باسشىسىنىڭ جاڭا قازاقستاندى, ەكىنشى رەسپۋبليكا قۇرۋ يدەياسىنىڭ رەفەرەندۋم وتكىزۋدەن باستاۋ الۋى – تاريحي وقيعا. ويتكەنى بۇل 27 جىلدان كەيىن وتكىزىلىپ وتىرعان ەكىنشى رەفەرەندۋم. بۇعان دەيىنگى كونستيتۋتسياعا وزگەرىستەر پارلامەنتتە تالقىلانىپ, ەنگىزىلىپ كەلگەن. وتكىزىلگەلى وتىرعان رەفەرەندۋمنىڭ تاريحي ءمان-ماڭىزى ول تۇتاستاي ۇلتتىڭ تاعدىرىنا قاتىستى ماسەلەلەردى حالىقتىڭ تالقىسىنا شىعارۋ, ونىڭ مەملەكەتتىك بيلىككە تىكەلەي قاتىسۋىن قامتاماسىز ەتە وتىرىپ, دەموكراتيا نەگىزدەرىن ورنىقتىرۋ», دەدى تولەۋبەك مۇقاشەۆ. ال رەسپۋبليكالىق «ارداگەرلەر ۇيىمى» قوعامدىق بىرلەستىگىنىڭ توراعاسى باقتىقوجا ىزمۇحامبەتوۆ رەفەرەندۋمنىڭ ەل بولاشاعى, ۇرپاق كەلەشەگى ءۇشىن قاجەتتىلىگىنە توقتالدى. سونداي-اق كەزدەسۋدە ءسوز العان رەسپۋبليكالىق كاسىپوداق فەدەراتسياسىنىڭ ورىنباسارى نۇرلان وتەشوۆ, قازىعۇرت اۋداندىق ءماسليحاتىنىڭ حاتشىسى ءورىسباي كوپەەۆ, شىمكەنت قالاسى ءماسليحاتىنىڭ حاتشىسى باحادىر نارىمبەتوۆ, الماتى وبلىسى ءماسليحاتىنىڭ دەپۋتاتى اسەل تولەپبەرگەنوۆا, جامبىل وبلىسى ءماسليحاتىنىڭ دەپۋتاتى سۇلتان وسەرباەۆ, تۇركىستان وبلىسى ءماسليحاتىنىڭ دەپۋتاتى قالىيما جانتورەەۆا, تۇركىستان وبلىستىق ارداگەرلەر كەڭەسىنىڭ توراعاسى جەڭىسبەك ماۋلەنقۇلوۆ وڭىرلەردە رەفەرەندۋمدى وتكىزۋ بويىنشا اتقارىلىپ جاتقان جۇمىستار جونىندە باياندادى.
رەسپۋبليكالىق شتاب ۇيىمداستىرعان كەلەسى كەزدەسۋگە وبلىس كاسىپكەرلەرى, كاسىپوداق ۇيىمدارى وكىلدەرى قاتىستى. كەزدەسۋدە تۇركىستان وبلىسى كاسىپكەرلەر پالاتاسىنىڭ ديرەكتورى تيمۋر ناقىپبەكوۆ, «تۇركىستان بولاشاق» بالاباقشا ديرەكتورى, وبلىستىق ءماسليحات دەپۋتاتى شولپان بەگاليەۆا ەل تاريحىندا وتكىزىلەتىن ەكىنشى رەفەرەندۋمعا ءبىر ءۇيدىڭ بالاسىنداي قاتىسۋعا شاقىردى. ال تۇركىستان وبلىسى ءماسليحاتىنىڭ حاتشىسى قايرات بالابيەۆ رەفەرەندۋمنان بولەك, كاسىپكەرلەرگە پرەزيدەنت تاراپىنان كورسەتىلەتىن قولداۋلار جونىندە ايتا كەلە, شاعىن جانە ورتا كاسىپكەرلىك نىساندارىنىڭ وزەكتى ماسەلەلەرىن ورتاعا سالدى.
بۇل كۇنى رەسپۋبليكالىق شتاب وكىلدەرى ساۋران اۋدانىندا شارۋالارمەن كەزدەستى. ودان كەيىن جاستارمەن بولعان كەزدەسۋدە دە ماۋسىمدا وتەتىن ماڭىزدى ساياسي وقيعا بويىنشا ءمانى تەرەڭ دە مازمۇندى اڭگىمە ايتىلدى. جاستار ەلىمىزدە كەيىنگى كەزدەرى بولىپ جاتقان وڭ وزگەرىستەر تۋرالى ءوز پىكىرلەرىن جەتكىزدى. سونداي-اق كەزدەسۋلەردە قاتىسۋشىلار رەفەرەندۋم بويىنشا سۇراقتارىنا جان-جاقتى جاۋاپ الدى.
تۇركىستان وبلىسى
