تۇركىستان مۋزىكالىق دراما تەاترىندا 21-22 مامىر كۇندەرى قازاقستاننىڭ ەڭبەك سىڭىرگەن قايراتكەرى, جازۋشى-دراماتۋرگ ەرمەك امانشاەۆتىڭ ليبرەتتوسى بويىنشا قويىلعان «قورقىت تۋرالى اڭىز» اتتى پلاستيكالىق سپەكتاكلدىڭ پرەمەراسى بولادى. قويۋشى-رەجيسسەرى - بەلگىلى رەسەيلىك بالەتمەيستەر, ونەرتانۋشى كونستانتين سەمەنوۆ. كومپوزيتورى - دارىندى جاس كومپوزيتور حاميت شانعاليەۆ. كوركەمدىك جەتەكشىسى - اينۇر كوپباساروۆا.
قورقىت اتا - تۇركى حالىقتارىنىڭ ورتاق رۋحاني ابىزى, ويشىل, جىراۋ, قوبىزشى. قورقىت اتا ومىردە ءىزى, ارتىندا ادەبي-مۋزىكالىق مۇراسى قالعان تاريحي تۇلعا. قازاق فيلوسوفياسى تاريحىندا قورقىت اتا - ەل بىرلىگىن نىعايتقان كەمەڭگەر قايراتكەر, تۇركى دۇنيەتانىمىنىڭ نەگىزىن جاساعان عۇلاما ويشىل, الەمدىك اقىل-وي مادەنيەتىندە وزىندىك ورنى بار فيلوسوف-گۋمانيست رەتىندە بەلگىلى. ءارى كۇيشىلىك, جىرشىلىق ونەرلەرىنىڭ رۋحاني اتاسى. قورقىت اتا مۇراسى يۋنەسكو-نىڭ ادامزاتتىڭ ماتەريالدىق ەمەس مادەني مۇراسىنىڭ رەپرەزەنتاتيۆتىك تىزىمىنە ەنگىزىلگەن.
«قورقىت تۋرالى اڭىز» پلاستيكالىق سپەكتاكلىندە جەر دۇنيەنى الاي-دۇلەي داۋىلداتىپ, جاۋىنداتىپ, جاي ويناتىپ, ادامداردى ۇرەيگە وراپ دۇنيە كەلگەن قورقىت الىپ قاراعاشتان ويىپ قوبىز جاسايدى. الەمدى قوبىز ۇنىمەن الديلەگەن بابامىز, كورگەن تۇسىنەن شوشىپ, ولىمنەن قاشادى. جەرۇيىق مەكەندى ىزدەيدى. «قايدا بارسا دا, قورقىتتىڭ كورىنە» كەزىگىپ, اقىرى تۋعان جەرىنە - دۇنيەنىڭ كىندىگى سانالاتىن سىر-دارياعا ورالادى. ۇلى ونەرىن ولىمگە, جالپى, تىرشىلىك داعدارىستارىنا قارسى قويىپ, ىزگىلىك پەن جاسامپازدىق نۇرىن شاشقان قورقىت پەن جەر بەتىن ۇيلەسىمسىزدىك پەن ارازدىقتىڭ الاڭىنا اينالدىرۋعا تىرىسقان پەرى قىزى - مارتۋدىڭ اراسىنداعى ماڭگىلىك ايقاس زاماناۋي حورەوگرافيا تىلىمەن اسەرلى بەينەلەنەدى. رۋحاني تامىرلارىمىزدىڭ التىن وزەكتەرى قانداي؟ زامانا اعىمىنداعى شىنايى ونەر ميسسياسىنىڭ سىرى نەدە بولماق؟ سپەكتاكل وسىنداي ماعىنالى سۇراقتارعا جاۋاپ ىزدەپ, كورەرمەنگە وي سالادى.
«قورقىت تۋرالى اڭىز» پلاستيكالىق سپەكتاكلىن قويۋعا كوپتەگەن تاجىريبەلى ماماندار اتسالىسقان. قويىلىمنىڭ ساحنا سۋرەتشىسى – تاتيانا ۆيۋشينسكايا, جارىق بويىنشا سۋرەتشى – تاتيانا ميشينا, ول رەسەيدىڭ «زولوتايا ماسكا» ۇلتتىق فەستيۆالىنىڭ جەڭىمپازى, ۆيدەوكونتەنت بويىنشا قويۋشى سۋرەتشى – سەرگەي رىلكو, بىرنەشە ءىرى جوبالاردى ءساتتى شىعارعان, كوستيۋمدەر بويىنشا تالانتتى سۋرەتشى – نازىم جايلىباەۆا جانە 2021 جىلى «جىلدىڭ ۇزدىك ديزاينەرى» جۇلدەسىن جەڭىپ العان ديزاينەر, سۋرەتشى, ستيليست – نازىم قارپىقوۆا, دەكوراتور-سۋرەتشى – جانات كوكىمبەكوۆ, بالەتمەيستەر – داۋلەت مۇراتپەكوۆ, گريم بويىنشا سۋرەتشى – ادەل نۇرقاسىموۆا.
«قورقىت تۋرالى اڭىز» پلاستيكالىق سپەكتاكلىندە رولدەردە وينايتىن كاسىبي بالەت ارتىستەرى: ەلامان ابدىقالىق, ەركىنبەك اۋباكىروۆ, اقىلاي سىدىعاليەۆا, الينا ورمونبەك, رۋستام شايحوۆ, گۇلجانات قالامعازينا, باقىتنۇر دۇيسەنباەۆا, ماو ساكاي, فارحاد سادۋاقاسوۆ, دجوزەف راحيمباەۆ, داستان ءساتتار, اقتان اسىلباشەۆ, يلياس دجارلىكاسىموۆ, ەلدوس وسپانوۆ, امينا ابدىقالىق, الۋا تورەگەلدى, كاميلا اليمجانوۆا, اياجان مەدەتحان, مادينا سادۋباەۆا.
«الداعى ۋاقىتتا دا پلاستيكالىق سپەكتاكلدەر كورەرمەن نازارىنا ۇسىنىلادى. ويتكەنى تۇركىستان مۋزىكالىق دراما تەاترىنداعى بالەت ترۋپپاسىنىڭ شەبەرلىگى مەن مۇمكىندىگى ۇلكەن دۇنيەلەردى قويۋعا قابىلەتتى», دەدى تەاتر ديرەكتورى ءارى كوركەمدىك جەتەكشىسى اينۇر كوپباساروۆا.
