بۇۇ ساراپشىلارى قازاقستانداعى شولۋعا دايىندىققا وڭ باعا بەردى

استاناعا 7-11 ءساۋىر ارالىعىندا  قازاقستاننىڭ بۇۇ سىبايلاس جەمقورلىققا قارسى كونۆەنتسيا قاعيدالارىن جۇزەگە اسىرۋ بارىسىن شولۋ ماقساتىندا پاكستان جانە كاتار ساراپشىلارى كەلىپ قايتتى. بۇل تۋرالى egemen.kz ءتىلشىسى حابارلادى. شولۋ بارىسىندا بۇۇ سىبايلاس جەمقورلىققا قارسى كونۆەنتسيا قاعيدالارىن ءىس جۇزىندە قولدانۋدىڭ پراكتيكالىق مىسالدارىمەن تانىسقان ساراپشىلار مەملەكەتتىك ورگاندارمەن قاتار, ۇكىمەتتىك ەمەس ۇيىمدارى وكىلدەرىمەن  دە جۇزدەستى. بۇل كەزدەسۋلەردىڭ قورىتىندىلارى بويىنشا, پاكستان مەن كاتار ساراپشىلارى ەلدىك ساپار ۇيىمداستىرىلۋىنىڭ جوعارى دەڭگەيىن اتاپ ءوتىپ, قازاقستاندىق تاراپتىڭ شولۋدى وتكىزۋگە «تياناقتى دايىندىعىن» وڭ باعالادى. شولۋ تۋرالى ەلدىك باياندامانى دايىنداۋ ءۇشىن سول ەلگە ساپار ماڭىزدى شارت بولىپ تابىلادى. شولۋدىڭ تۇيىندەمەسىن بۇۇ ەسىرتكى جانە قىلمىس جونىندەگى باسقارماسى (بۇۇ ەقب) دايىنداپ, كونۆەنتسيانىڭ جۇزەگە اسىرىلۋ بارىسىن شولۋ جونىندەگى ۇكىمەتارالىق جۇمىس توبىنىڭ كەزەكتى 2014 جىلعى ماۋسىمدا وتەتىن ماجىلىسىنە ۇسىنىلادى دەپ كۇتىلىپ وتىر. انار تولەۋحانقىزى. دەرەككوز: egemen.kz.