قازاقستان جايلى جازاتىن شەتەل جۋرناليستەرى ءۇشىن كونكۋرس جاريالاندى

قازاقستان جايىندا قالام تارتقان شەتەلدىك جۋرناليستەر اراسىندا كونكۋرس وتەتىن بولدى. بۇل تۋرالى قازاقستاننىڭ اقش-تاعى ەلشىلىگىندەگى دەرەككوزىنە سىلتەمە جاساعان egemen.kz ءتىلشىسى حابارلادى. اتالمىش ەلشىلىك وكىلى نۇرعالي ارىستانوۆتىڭ ايتۋىنشا, سىرتقى ىستەر مينيسترلىگى مەن قازاقستان جۋرناليستەر وداعى بىرلەسە جاريالاعان كونكۋرسقا سولتۇستىك جانە وڭتۇستىك امەريكادان, ەۋروپا مەن تمد ەلدەرىنەن, تاياۋ شىعىس پەن ازيادان, سونداي-اق اۆستراليادان جۋرناليستەر قاتىسادى. ولار قازاقستاننىڭ ەكونوميكاسى, ساۋدا قاتىناستارى, مادەنيەتى مەن ءداستۇرى, تۋريزمدەگى الەۋەتى مەن ەل تاريحى تۋراسىندا ماتەريالدار ازىرلەپ, ۇستىمىزدەگى جىلعى 15 ماۋسىمعا دەيىن تاپسىرۋلارى ءتيىس. كونكۋرس قورىتىندىسىندا ءار قۇرلىق پەن ايماقتان ءبىر-ءبىر جەڭىمپاز انىقتالىپ, ۇزدىك شىققان جۋرناليستكە ەلىمىزدى ارالاۋ مۇمكىندىگى بەرىلەدى. ولار Air Astana كومپانياسىنىڭ ۇشاعىمەن قازاقستانعا كەلىپ, الماتى جانە استانا قالالارىنداعى  Rixos قوناقۇيلەرىنە توقتايدى. الاتاۋدىڭ تابيعاتىن تاماشالاپ, بايقوڭىرعا بارىپ, وزگە دە مادەني-تانىمدىق, تۋريستىك باعىتتارمەن جەتە تانىساتىن بولادى. انار تولەۋحانقىزى. دەرەككوز: egemen.kz.