ەۋرازيا ەكونوميكالىق وداعى ينتەگراتسيالىق ۇدەرىسكە وڭ سەرپىن بەرەدى

بۇگىن, 16 ءساۋىر كۇنى ورتالىق كوممۋنيكاتسيالار قىزمەتىندە قارجى ۆيتسە-ءمينيسترى بەرىك شولپانقۇلوۆ پەن سالىق كوميتەتىنىڭ توراعاسى ءانۋار جۇمادىلداەۆ ءباسپاسوز ءماسليحاتىن وتكىزدى. وندا ينتەگراتسيالىق ۇدەرىستەگى سالىق پەن سالىق سالۋ جانە مەملەكەتتىك ساتىپ الۋلارعا قاتىستى ماسەلەلەر ءسوز بولدى. بۇل تۋرالى egemen.kz ءتىلشىسى حابارلادى. الداعى مامىر ايىندا قۇرىلاتىن ەۋرازيالىق ەكونوميكالىق وداقتىڭ ءمان-ماڭىزى تۋرالى بايانداعان ب.شولپانقۇلوۆ, وداق اياسىندا بولاتىن سالىق تارتىپتەرى تۋرالى اڭگىمەلەدى. ءسويتىپ, ءسوز كەزەگىن سالىق كوميتەتىنىڭ توراعاسىنا بەردى. «ەلباسىنىڭ ستراتەگيالىق باستامالارىنىڭ ءبىرى – ەۋرازيالىق وداق يدەياسىنا بيىل 20 جىل تولدى. وسى ۋاقىت ارالىعىندا قازاقستان, رەسەي, بەلارۋس مەملەكەتتەرى اراسىنداعى ينتەگراتسيالىق يگىلىكتەر ءتيىستى دامۋ ساتىسىنان ءوتتى. الداعى مامىر ايىندا ءۇش ەلدىڭ باسشىلارى كەلىسىمگە قول قويادى دەپ كۇتىلۋدە. ەۋرازيالىق ينتەگراتسيا مەملەكەتتەردىڭ ءوزارا ەكونوميكالىق قارىم-قاتىناس ماسەلەلەرىن عانا قامتيدى. سوندىقتان, بۇل ورايدا سالىقتىق اكىمشىلەندىرۋ ماسەلەلەرى دە ەرەكشە ورىن الاتىنىن اتاپ وتكىم كەلەدى», - دەدى ءا.جۇمادىلداەۆ. بۇعان دەيىن ەۋرازيالىق ەكونوميكالىق وداقتىڭ كەدەن وداعىنا مۇشە ءۇش مەملەكەتىنىڭ اۋماقتارىندا قاتىسۋشى ەلدەردىڭ ەكونوميكاسىنىڭ تۇراقتى جانە ءتيىمدى دامۋىنا جاعدايلار جاساۋعا جانە حالىقتىڭ ءومىر ءسۇرۋ دەڭگەيىن ارتتىرۋ ءۇشىن قۇرىلعان ءبىرتۇتاس ەكونوميكالىق كەڭىستىك جۇمىس ىستەي باستاعان-دى. ءبىرتۇتاس ەكونوميكالىق كەڭىستىك جاساۋ وراسان زور نارىق قۇرۋعا, بيزنەستى دامىتۋدى ىنتالاندىرۋعا, سونداي-اق باسەكەگە قابىلەتتى تاۋارلار مەن قىزمەتتەردى ءوندىرۋدى وسىرۋگە باعىتتالعانى ءمالىم. وسى جۇمىستاردى سارالاعان كوميتەت توراعاسى, كاسىپكەرلەرگە تاۋار ساپاسىن جاقسارتۋ كەرەكتىگىن ايتتى. «ەلىمىزدىڭ بيزنەس وكىلدەرى 170 ميلليوندىق نارىققا شىعىپ وتىر. وسىنىڭ ءوزى وندىرىلگەن تاۋارلاردى وتكىزۋگە ۇلكەن مۇمكىندىك جاسايدى. بىراق بۇل, رەسەي مەن بەلورۋس ەلدەرى ءبىزدىڭ كاسىپكەرلەردى قۇشاق جايىپ كۇتىپ وتىر دەگەندى بىلدىرمەيدى. ناقتى ناتيجەگە قول ارتۋ ءۇشىن ەلىمىزدىڭ بيزنەس وكىلدەرى باسەكەلەستىككە قاۋقارلى بولىپ, تاۋاردىڭ ساپاسىن جاقسارتىپ, وسى اۋقىمدى نارىقتى ەركىن يگەرۋى وتە ماڭىزدى», دەدى كوميتەت توراعاسى. كاسىپكەرلەر كەدەن وداعى اياسىندا ەلگە اكەلگەن تاۋارلارىنا تولەنەتىن سالىقتى 50 كۇننىڭ ىشىندە تولەپ, ەسەپ-قيسابىن وتكىزۋى  تيىس ەكەن. نەگىزى, تاۋار ەلگە كىرگەننەن كەيىن سول ساتتەن باستاپ كەلەسى ايدىڭ 20-سىنا دەيىن ءوزىنىڭ جاناما جانە قوسىمشا سالىقتارى تولەنۋى كەرەك. ماسەلەن, كاسىپكەر  تاۋارىن ايدىڭ ءبىرىنشى كۇنى كىرگىزسە, كەلەسى ايدىڭ 20-سىنا دەيىن 50 كۇن ۋاقىتى بولادى. بۇل كەدەن وداعىنىڭ ەڭ وڭتايلى تۇسى كورىنەدى. كوميتەت توراعاسى كاسىپكەرلەرگە وسى قاعيدالاردى ەسكەرىپ, ءوز پايدالارىنا جاراتۋعا كەڭەس بەردى. سەبەبى, بۇعان دەيىن كاسىپكەرلەرگە ەلگە تاۋارىن كىرگىزۋ ءۇشىن ءتيىستى سالىقتاردىڭ بارلىعىن الدىن الا تولەۋى قاجەت ەدى. جاڭا ءتارتىپتىڭ ارقاسىندا, ولار بۇدان بىلاي سالىقتارىن تولەمەي تۇرعان كەزدە-اق, اكەلگەن تاۋارلارىن بىردەن نارىققا شىعارۋلارىنا جول اشىلىپتى. وسىلاي, كاسىپكەرلىكتىڭ كەڭىستىگى تاعى دا كەڭەيە تۇسەدى. نۇرباي ەلمۇراتوۆ. دەرەككوز: egemen.kz. فوتو: ورتالىق كوممۋنيكاتسيالار قىزمەتى.