جەڭىل ءجۇرىستى ايەل قىزىن قىلمىسكەرگە باقتىرىپ, ءسابي جاپا شەككەن

قوستانايدا وزگەنىڭ بالاسىن كۇتىمىنە الىپ, وسى قىزمەتىنىڭ اقىسىنا كۇن كورىپ جۇرگەن 35 جاستاعى ايەلدىڭ ۇستىنەن قىلمىستىق ءىس قوزعالدى. 1979 جىلى تۋعان كۇتۋشى ايەل ءوزىنىڭ قاراۋىنداعى سابيگە ءجابىر كورسەتكەن دەپ ايىپتالۋدا. بۇل تۋرالى Nur.kz پورتالى حابارلادى. قوستاناي قالالىق ەمحاناسىنا اۋىر جاعدايدا جەتكىزىلگەن ءسابيدىڭ ساۋ-تامتىعى قالماپتى. دارىگەرلەر بالانىڭ ديستروفيانىڭ اۋىر تۇرىنە ۇشىراعانىن, ياعني, اعزاعا ازىق سىڭبەۋىنەن سالماعىنىڭ كەمىپ, دەنساۋلىعىنىڭ كۇر تومەندەپ كەتكەنىن ايتىپ وتىر. ءبىر بۇل عانا ەمەس, ءسابي ءوزىن اينالدىرعان بىرنەشە دەرتتىڭ قىسپاعىندا قالعان. دالىرەگىن ايتساق, ونىڭ ءتانىن پنەۆمونيا, گەپاتيت, نەفريت, وتيت, راحيت سەكىلدى اۋرۋ تۇرلەرى ابدەن مەڭدەپ الىپتى. سونىمەن قاتار, ورتالىق نەرۆ جۇيەسى دە بۇزىلعان. قالىپتاسقان جاعدايدىڭ ءتۇپ-توركىنىن تەكسەرۋ بارىسىندا انىقتالعانداي, بالاسىن باعۋعا كۇتۋشى جالداعان ايەل دە «ساۋ سيىردىڭ تەزەگى» بولماي شىقتى. بالانىڭ شەشەسى ەش جەردە جۇمىس ىستەمەيتىن, اراق-شاراپتان اۋزى بوسامايتىن, ءتانىن ساۋداعا سالىپ, ناپاقا ايىرعان جەڭىل ءجۇرىستى ايەل ەكەن. «بالا قالايشا وسىنشا جانتۇرشىگەرلىك جاعدايعا تاپ بولعان؟» دەگەن سۇراققا شەشەسىماق: «مەن ونى كۇتۋشى ايەلگە تاپسىرعانمىن» دەپ اقتالىپتى. ال كۇتۋشى ايەل دە ءوز ءۋاجىن ايتقان. ول بالانى قاراۋىنا العان كەزدە جاعدايى ءدال وسىنداي تومەن بولعانىن, ونىڭ ۇستىنە كۇتىپ-باققانى ءۇشىن شەشەسى ەشقانداي اقى تولەمەگەنىن العا تارتىپتى. كۇتۋشى ايەلدىڭ «ءتۇپ-تامىرىن» تەكسەرگەندە ونىڭ اقتالىپ, ابىروي تاباتىنداي ءجونى جوق ەكەنى بەلگىلى بولدى. ول بالا كۇتىمى قىزمەتىنە بايلانىستى بىرنەشە رەت جاۋاپقا تارتىلىپتى. سونىمەن قاتار, 2013 جىلى ءبىر ءسابي وسى ايەلدىڭ قولىنان شەتىنەپتى. قازىر جوعارىدا ايتىلىپ وتكەن ىسكە قاتىستى تەرگەۋ امالدارى جۇرگىزىلۋدە. جولدىباي بازار. دەرەككوز: Nur.kz. فوتو: Bigmir.net.