وتاندىق كاسىپكەرلەرگە قىرىن قارايتىن شەنەۋنىكتەرگە ورىن بولماۋى ءتيىس

قازاقستان رەسپۋبليكاسى پرەزيدەنتى جانىنداعى ورتالىق كوممۋنيكاتسيالار قىزمەتىندە ارنايى بريفينگ وتكىزگەن ۇلتتىق كاسىپكەرلەر پالاتاسىنىڭ باسقارما توراعاسى ابىلاي مىرزاحمەتوۆ «ەكسپو-2017» حالىقارالىق كورمەسىندە ەلىمىزدىڭ كاسىپكەرلەرى بەلسەندىلىك تانىتۋى ءتيىس دەدى. بۇل تۋرالى «ەكسپرەسس ك» حابارلادى. اتالعان بريفينگتە ەلىمىزدەگى دامۋ ينستيتۋتتارىنىڭ قىزمەتى ءبىرشاما سىنعا الىندى. ابىلاي مىرزاحمەتوۆ: «وكىنىشكە قاراي, سوڭعى 3-4 جىلدا دامۋ ينستيتۋتتارى كاسىپكەرلىكتى دامىتۋ ىسىنەن قول ۇزگەندەي, ولار تەك قولدارىنداعى قارجىنى ءبىر جەردەن ەكىنشى جەرگە قۇيىپ, سودان تاپقان ءوسىمنىڭ ارقاسىندا كۇن كورىپ وتىر», – دەدى. بريفينگتە ايتىلعانداي, كاسىپكەرلەر الگى قۇرىلىمداردىڭ قىزمەتىنە قوعامدىق باقىلاۋ ورناتۋ كەرەك دەپ ەسەپتەيدى. سونداي-اق, ديرەكتورلار كەڭەسىنىڭ قۇرامىنا تاۋەلسىز كاسىپكەرلەردىڭ وكىلىن ەنگىزۋ كەرەكتىگى دە ءسوز بولدى. ابىلاي مىرزاحمەتوۆ جيىن بارىسىندا ۇلتتىق كاسىپكەرلەر پالاتاسىنىڭ جوسپارىندا مەملەكەتتىك شەنەۋنىكتەردى كاسىپكەرلەرگە قۇرمەتپەن قاراۋدى ۇيرەتۋ ءىسى دە بار ەكەنىن جەتكىزدى. سونداي-اق, ول كاسىپكەرلەرگە قىرىن قاراعان اكىمشىلىك قىزمەتكەرلەرىن جۇمىسىنان بوساتتىرىپ جىبەرەتىن جاعدايعا دەيىن جەتۋىمىز كەرەك دەگەندى دە تىلىنە تيەك ەتتى. – جاۋاپكەرشىلىك جۇگى اۋىر ۇكىمەت قىزمەتكەرلەرىنى تۇسىنەمىز... ۇكىمەت باسشىسى كاسىپكەرلەردى جيناپ, ۇيلەستىرۋ كەڭەسىن وتكىزىپ وتىرادى, ال اكىمدىكتەرگە كىرىپ, ونداعى اكىمنىڭ ورىنباسارلارىمەن سويلەسۋدىڭ ءوزى قيىن. مەملەكەت باسشىسى كاسىپكەرلىكتى دامىتۋ قاجەتتىگىن كۇن تارتىبىنە شىعارىپ وتىرعان قازىرگى تاڭدا وندايلارعا اكىمدىكتەن ورىن بولماۋى ءتيىس دەپ ەسەپتەيمىن, – دەدى ابىلاي مىرزاحمەتوۆ. سونداي-اق, ۇلتتىق كاسىپكەرلەر پالاتاسىنىڭ باسقارما توراعاسى وتاندىق كاسىپكەرلەردىڭ كەمسىتۋشىلىككە ۇشىراماۋى ءۇشىن كۇش سالاتىنىن دا ايتىپ ءوتتى. جيىن سوڭىندا ابىلاي مىرزاحمەتوۆ «ەكسپو-2017» حالىقارالىق كورمەسىندە كاسىپكەرلەردىڭ بەلسەندىلىك تانىتاتىنىنا ۋادە بەردى. ەستەرىڭىزگە سالا كەتەيىك, تاياۋدا مەملەكەت باسشىسى «ەكسپو-2017» كورمەسىن ۇيىمداستىرۋشىلارعا ۇلتتىق كاسىپكەرلەر پالاتاسىمەن بىرلەسىپ ارنايى باعدارلاما ءتۇزۋدى تاپسىرعان-دى. بۇل باعدارلامانىڭ ماقساتى – كاسىپكەرلەرىمىزدى كورمەنىڭ دايىندىق جۇمىستارىنا تارتۋ بولماق. جولدىباي بازار. دەرەككوز: «ەكسپرەسس ك». فوتو: ortcom.kz.