اقش-تا مۇسىلمانداردى باقىلاۋ توقتاتىلادى

نيۋ-يوركتاعى پوليتسيا باسقارماسى ەلدەگى مۇسىلمان قاۋىمىن اڭدۋمەن اينالىسقان ارنايى بولىمشەسىن تاراتۋ جونىندە شەشىم قابىلدادى. بۇل تۋرالى يتار-تاسس حابارلادى. 2011 جىلدىڭ جازىندا Associated Press اگەنتتىگى جۇرگىزگەن جۋرناليستىك زەرتتەۋ ناتيجەسىندە نيۋ-يورك پوليتسياسىنىڭ 2003 جىلدان بەرى مۇسىلمانداردى باقىلاۋ ماقساتىندا كەڭ كولەمدە جۇمىس اتقارىپ كەلگەنى بەلگىلى بولدى. ورتالىق بارلاۋ قىزمەتىنىڭ كومەگىمەن ولار ەلدەگى مۇسىلمانداردىڭ كۇندەلىكتى تىرشىلىگىن تۇگەل باقىلاپ وتىراتىن باعدارلاما جاساپ شىققان ەكەن. ءتارتىپ ساقشىلارى مۇسىلمانداردىڭ قاي جەردە تاماقتاناتىندارى, باراتىن دۇكەندەرى, قايدا جۇمىس ىستەپ, قايدا قۇلشىلىق ەتەتىندەرى جونىندە دەرەكتەر جيناعان. نيۋ-يورك پوليتسياسىنىڭ بۇل ارەكەتتەرى كوپتەگەن قۇقىق قورعاۋ قۇرىلىمدارى تاراپىنان ۇلكەن سىنعا ۇشىرادى. سول كەزدە بۇرىنعى مەر مايكل بلۋمبەرگ باسقارعان قالا بيلىگى مۇسىلمانداردى اڭدۋ ارەكەتى ءجۇرىپ جاتقانىن مويىنداپ, الايدا, بۇل ءىستىڭ زاڭعا قايشى كەلمەيتىنىن العا تارتقان بولاتىن. سونداي-اق ولار مۇسىلمانداردى اڭدۋ ارقىلى ەل اۋماعىندا بىرنەشە تەراكتىنىڭ الدىن الۋعا مۇمكىندىك تۋعانىن جەتكىزدى. نيۋ-يورك قالاسىنىڭ قازىرگى مەرى بيلل دە بلازيو سايلاۋ الدىنداعى ناۋقاندا اتالمىش باعدارلامانى توقتاتۋعا ءسوز بەرگەن-ءتىن. ايدار ورىسباەۆ. دەرەككوز: Itar-tass.com. فوتو: AP Photo.