ەسىموۆ «ەكى قولعا ءبىر كۇرەك الدى». سەنبىلىك سوسىن قىزىپ جۇرە بەردى

الماتى قالاسىنىڭ اكىمى احمەتجان ەسىموۆتىڭ باستاماسىمەن, ەلىمىزگە تانىمال ونەر جانە سپورت قايراتكەرلەرىنىڭ قاتىسۋىمەن اتالمىش شاھاردىڭ 130 مىڭنان استام تۇرعىنى سەنبىلىككە شىقتى. بۇلاردىڭ اراسىندا كسرو جانە قازاقستاننىڭ حالىق ءارتىسى الىبەك دىنىشەۆ, بەلگىلى كينورەجيسسەر ەرمەك تۇرسىنوۆ, گرەك-ريم كۇرەسىنەن وليمپيادا چەمپيونى جاقسىلىق ۇشكەمپىروۆ سىندى تانىمال ازاماتتار بولدى. بۇل تۋرالى «ەكسپرەسس ك» حابارلادى. سەنبىلىك جۇمىستارى اباي جانە جاروكوۆ كوشەلەرى قيىلىسىنداعى مەترو ستانساسىنىڭ ماڭىنان اعاش وتىرعىزۋدان باستالدى. سودان كەيىن سەنبىلىككە قاتىسۋشىلار الماتى قالاسىنىڭ بارلىق كوشەلەرى مەن ءۇي اۋلالارىن تازالاۋ ىسىنە كىرىسىپ كەتتى. سەنبىلىكتە ستۋدەنتتەر مەن قوعامدىق بىرلەستىكتەردىڭ وكىلدەرى بەلسەندىلىك كورسەتتى. احمەتجان ەسىموۆ شاراعا قاتىسۋشىلار الدىندا: «الماتىدا بۇرىن-سوڭدى ءدال وسىنداي اۋقىمدا سەنبىلىك وتپەگەن. بۇدان ءبىز قالا تۇرعىندارىنىڭ قورشاعان ورتاعا جاناشىرلىقپەن قارايتىندارىن ۇعامىز. ءبىز قالامىزدى جاسىل جەلەكتى ەتۋ ءۇشىن كوپ جۇمىس اتقارامىز», – دەدى. ەلىمىزدى كوگالداندىرۋعا بايلانىستى قابىلدانعان باعدارلاما اياسىندا الماتى مەن ونىڭ اينالاسىنداعى اعاشتار 100 مىڭعا ارتقان. بيىل الماتى قالاسىن زاقىمدانعان جانە «جاسى كەلگەن» اعاشتاردان تولىق تازارتۋ ءىسى اياقتالماق. جولدىباي بازار. دەرەككوز: «ەكسپرەسس ك». فوتو: kapshagai.kz.