قوعام • 16 مامىر، 2022

«قازاقستان حالقىنا» قورى قايىرىمدىلىق باعدارلاماسىن ىسكە قوستى

41 رەت كورسەتىلدى

«قازاقستان حالقىنا» قورى تىرەك-قوزعالىس اپپاراتىندا اقاۋى بار بالالاردى روبوتتاندىرىلعان قۇرىلعىلارمەن قامتاماسىز ەتۋ بويىنشا قايىرىمدىلىق باعدارلاماسىن ىسكە قوستى، دەپ حابارلايدى Egemen.kz.

باعدارلاما بالالارعا ءتيىمدى وڭالتۋ، وسى دياگنوزدارمەن قاتار پايدا بولاتىن اۋرۋلاردىڭ دامۋ قاۋپىن ازايتۋ، فيزيكالىق جانە پسيحو-ەموتسيونالدىق ءال-اۋقاتىن جاقسارتۋ مۇمكىندىگىن بەرەدى. بۇل بالالاردىڭ قوعامدا الەۋمەتتەنۋى ءۇشىن وتە ماڭىزدى.

تەحنيكالىق وڭالتۋ قۇرالدارىن، ونىڭ ىشىندە ەكزوسكەلەتتەردى بالالارى ءۇشىن قاجەت ەتەتىن اتا-انالاردان 300-دەن استام ءوتىنىش كەلىپ ءتۇستى. باعدارلاما اياسىندا جىل سوڭىنا دەيىن 13 ەكزوسكەلەت شىعارۋ جوسپارلانسا، ونىڭ 4-ەۋى بويىنشا ولشەۋ جۇرگىزىلىپ، ءوندىرىس پروتسەسى ىسكە قوسىلدى.

ەكزوسكەلەت – تسەرەبرالدى سال اۋرۋى، مي جاراقاتى، ج ۇلىن جاراقاتتارى، پاراپلەگيا، بۇلشىقەت ديستروفياسى، رەتت سيندرومى جانە باسقا دا اۋرۋلارمەن اۋىراتىن بالالاردىڭ ءوز بەتىنشە قوزعالۋىنا كومەكتەسەتىن زاماناۋي، جوعارى تەحنولوگيالىق جانە ءتيىمدى وڭالتۋ قۇرالى.

ايتا كەتەيىك، ءاربىر ەكزوسكەلەت بالا ءۇشىن ونىڭ پارامەترلەرىن ەسكەرە وتىرىپ، جەكە ازىرلەنەدى، بۇل ەڭ ءبىرىنشى قولدانۋداعى تيىمدىلىك پەن پايدالانۋداعى قاراپايىمدىلىقتى ارتتىرادى. ءبىر ەكزوسكەلەتتىڭ سالماعى - 25 كەلى. بالالاردى وڭالتۋ ۇلتتىق ورتالىعىنىڭ بازاسىندا ناۋقاستىڭ ەكزوسكەلەتىنىڭ قاجەتتىلىگى تۋرالى قورىتىندى شىعاراتىن كوپ بەيىندى توپ قۇرىلدى.

قور «قازاقستاننىڭ 100 جاڭا تۇلعاسى» جوباسىنىڭ جەڭىمپازى ماۋلەن بەكتۇرعانوۆ نەگىزىن قالاعان ەكزوسكەلەتتەردى شىعاراتىن وتاندىق «MBionics» جشس-مەن كەلىسىم-شارتقا وتىردى. وڭالتۋ جوسپارى مەكەمەلەرىنىڭ جۇمىس ۇلگىلەرىن جوبالاۋ استانا قالاسىنىڭ مەديتسينا ۋنيۆەرسيتەتىمەن تىعىز بايلانىستا جۇزەگە اسىرىلادى.

13 بالانى ەكزوسكەلەتپەن قامتاماسىز ەتۋ ءۇشىن «قازاقستان حالقىنا» قورى 117 ميلليون تەڭگە ءبولىپ وتىر.

 

سوڭعى جاڭالىقتار

بۇعىبۇلاۋ

قازاقستان • كەشە

جۇزە ءبىلۋ – ءومىر

قوعام • كەشە

ولكەتانۋشى

قازاقستان • كەشە

كەبەنەك

تاريح • كەشە

ساۋكەلە

ونەر • كەشە

ۇقساس جاڭالىقتار