ءىس-شارانىڭ اشىلۋ سالتاناتىندا ش.ايمانوۆ اتىنداعى «قازاقفيلم» اق پرەزيدەنتى اقان ساتاەۆ, «ۇلتتىق كينونى قولداۋ مەملەكەتتىك ورتالىعى» كەاق توراعاسى ەسەتجان قوسىباەۆ جانە قازاق كينوسىنىڭ ارداگەرى, كينوستۋديانىڭ كوركەمدىك جەتەكشىسى ءاسانالى ءاشىموۆ ءسوز سويلەدى. ءوز سوزىندە اقان ساتاەۆ قازاقستاندىق كينوگەرلەردى بىرىكتىرۋگە باعىتتالعان بۇل شارا مىندەتتى تۇردە جالعاسىن تاباتىنىن ايتتى. ال ەسەتجان قوسىباەۆ كينوستۋديا باسشىلىعىنا العىسىن ءبىلدىرىپ, قازاق كينوسىنىڭ وركەن جايا تۇسۋىنە تىلەكتەستىگىن ءبىلدىردى.
قازاق كينەماتوگرافياسىنىڭ دامۋىنا ءوز ۇلەسىن قوسىپ كەلە جاتقان رەجيسسەرلەر دارەجان ومىرباەۆ, رۇستەم ابدىراشەۆ, راشيد نۇعىمانوۆ, سەرىك اپىرىموۆ, ءادىلحان ەرجانوۆ, فارحات شاريپوۆ, ەرنار نۇرعاليەۆ, ەليا گيلمان, سەرىكبول وتەپبەرگەنوۆ, قانات بەيسەكەەۆ, اكتەرلەر مەرۋەرت وتەكەشەۆا, ەربولات توعىزاقوۆ, بايكەنجە بەلباەۆ, الميرا تۇرسىن, شىڭعىس كاپين, ازامات ساتىبالدى, اسەل ساعاتوۆا, قارلىعاش مۇحامەدجانوۆا, تولەپبەرگەن بايساقالوۆ, جان بايجانباەۆ, ايدوس بەكتەمىروۆ, ءانۋار نۇرپەيىسوۆ, اسقار ءىلياسوۆ جانە وزگە دە جاس ارتىستەر ستۋديا اۋماعىنا 80 ءتۇپ اعاش وتىرعىزدى. كينو مايتالماندارى جەلمەن ءدىرىل قاققان جاس شىبىقتاردىڭ كۇنى ەرتەڭ جاپىراعى جايقالعان ءدىڭى قاتتى, بۇتاعى مول, بيىك بايتەرەكتەرگە اينالاتىنىنا سەنىم ءبىلدىرىپ, توعايعان كوڭىلمەن تارقاستى.
الماتى
