قوعام • 13 مامىر، 2022

قازاقستان-تۇركيا اراسىنداعى اۋە رەيستەرىنىڭ سانى ەكى ەسە ارتادى

قازاقستان مەن تۇركيا اراسىنداعى اۋە رەيستەرىنىڭ سانى 13 مامىردان باستاپ 124-كە دەيىن ەكى ەسەگە ارتادى. بۇل تۋرالى انكارادا وتكەن پرەزيدەنتتەر قاسىم-جومارت توقاەۆ پەن رەجەپ ەردوعاننىڭ كەزدەسۋى بارىسىندا يندۋستريا جانە ينفراقۇرىلىمدىق دامۋ ءمينيسترى قايىربەك وسكەنباەۆ مالىمدەدى، دەپ حابارلايدى Egemen.kz قر يدم ءباسپاسوز قىزمەتىنە سىلتەمە جاساپ.

Egemen Qazaqstan

بۇگىندە اۋە قاتىناستارى بويىنشا ۇكىمەتارالىق كەلىسىم نەگىزىندە ەلدەر اراسىنداعى تۇراقتى رەيستەردىڭ جيىلىگى بويىنشا اپتاسىنا 61 جولاۋشىلار رەيسى ورىندالادى. ەندى 13 مامىردان باستاپ ۇشۋ سانى اپتاسىنا 63 رەيسكە ارتپاق. سايكەسىنشە ەلدەر اراسىنداعى اپتا سايىنعى رەيس سانى 124-كە دەيىن وسەدى.

«بيىل 13 مامىردان باستاپ انتاليا جانە بودرۋم باعىتتارىندا قاتىنايتىن Air Astana، SCAT، Turkish Airlines اۋەكومپانيالارىنىڭ رەيس سانى بىرتىندەپ ارتادى. قوسىمشا رەيستەر نۇر-سۇلتان، الماتى، اقتاۋ، اقتوبە، اتىراۋ، قاراعاندى، قوستاناي، ورال، شىمكەنت جانە وسكەمەن ارقىلى ىسكە اسىرىلادى»، دەدى قايىربەك وسكەنباەۆ.

SCAT انتالياعا اپتاسىنا 29 جاڭا رەيستى نۇر-سۇلتان (اپتاسىنا 7 رەيس)، الماتى (6)، اقتوبە (3)، اتىراۋ (3)، شىمكەنت (2)، قاراعاندى (2)، ورال (2)، قوستاناي (2)، اقتاۋ (1)، وسكەمەن (1) قالالارىنان جۇزەگە اسىرادى. ال Air Astana نۇر-سۇلتان جانە الماتىدان انتاليا (7 رەيستەن) مەن بودرۋمعا (2 رەيستەن) اپتاسىنا 18 رەيس جاساماق.

Turkish Airlines انتالياعا اپتاسىنا 16 رەيستى نۇر-سۇلتان (5 رەيستەن)، الماتى (4) جانە قاراعاندىدان (3) جانە بودرۋمعا نۇر-سۇلتان (2 رەيستەن) مەن الماتىدان (2) ورىندايدى.

قايىربەك وسكەنباەۆتىڭ ايتۋىنشا، 2022 جىلعى مامىردا يندۋستريا جانە ينفراقۇرىلىمدىق دامۋ مينيسترلىگى مەملەكەتتەر اراسىنداعى اۋە تاسىمالىن ودان ارمەن ارتتىرۋ مەن ۇشۋ گەوگرافياسىن كەڭەيتۋ بويىنشا ەكى ەلدىڭ اۋە بيلىگى وكىلدەرىنىڭ كەلىسسوز جۇرگىزۋى ۇسىنعان. باستاما قولداۋ تاۋىپ، كەلىسسوزدەر وسى جىلدىڭ شىلدەسىندە ىستانبۇل قالاسىندا وتەدى.

ايانا توعانبەك

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز