مەملەكەتتiك باج – ۋاكiلەتتى مەملەكەتتiك ورگانداردىڭ نەمەسە لاۋازىمدى ادامداردىڭ زاڭدىق ءمانi بار, ونىڭ ىشىندە قۇجاتتاردى (ولاردىڭ كوشىرمەلەرىن, تەلنۇسقالارىن) بەرۋمەن بايلانىستى ارەكەتتەر جاساعانى ءۇشiن الىناتىن, بيۋدجەتكە تولەنەتىن تولەم.
مەملەكەتتىك باجدى قايتارۋ سالىق كودەكسىمەن جانە قازاقستان رەسپۋبليكاسى قارجى ءمينيسترىنىڭ 2018 جىلعى 27 اقپانداعى №306 بۇيرىعىمەن بەكىتىلگەن جەكە شوتتارىن جۇرگىزۋ قاعيدالارىمەن رەتتەلەدى.
ارتىق تولەنگەن مەملەكەتتىك باج
مەملەكەتتىك باجدىڭ تولەنگەن سومالارى – جۇزەگە اسىرىلۋى ءۇشىن وسىنداي مەملەكەتتىك باجدى تولەۋ تالاپ ەتىلەتىن ارەكەتتەردى جاساماۋى فاكتىسىن ءتيىستى ۋاكىلەتتى مەملەكەتتىك ورگان ەلەكتروندى بازا ارقىلى نەمەسە قاعاز تۇرىندە راستاعان جاعدايدا, ارتىق تولەنگەن بولىپ تانىلادى. سالىق تولەۋشىنىڭ ءتيىستى قۇجاتتاردى بەرگەنگە دەيىن ارەكەتتەر جاساۋدان باس تارتۋى ارەكەتتەردى جاساماۋ فاكتىسى رەتىندە تانىلادى.
سالىق ورگانى مەملەكەتتىك باجدىڭ ارتىق تولەنگەن سوماسىن قايتارۋدى سالىق تولەۋشى ۇسىنعان ءوتىنىشى جانە ءتيىستى مەملەكەتتىك ورگاننىڭ قايتارۋدىڭ زاڭدىلىعىن راستايتىن قۇجاتى نەگىزىندە جۇرگىزەدى.
مەملەكەتتىك باجدىڭ ارتىق تولەنگەن سوماسىن قايتارۋدى ونىڭ تولەنگەن جەرى بويىنشا سالىقتىق ءوتىنىش بەرىلگەن كۇننەن باستاپ بەس جۇمىس كۇنى ىشىندە سالىق تولەۋشىنىڭ بانكتىك شوتىنا جۇرگىزەدى.
قاتە تولەنگەن مەملەكەتتىك باج
مەملەكەتتىك باجدىڭ قاتە تولەنگەن سوماسى رەتىندە مىنالار تانىلادى:
1) تولەم قۇجاتىندا: سالىق تولەۋشىنىڭ سايكەستەندىرۋ ءنومىرى دۇرىس كورسەتىلمەگەن; سالىق ورگانىنىڭ سايكەستەندىرۋ ءنومىرى دۇرىس كورسەتىلمەگەن; تولەمنىڭ ماتىندىك ماقساتى تولەم ماقساتىنىڭ كودىنا نەمەسە كىرىستەردىڭ بيۋدجەتتىك سىنىپتاماسىنىڭ كودىنا سايكەس كەلمەيدى;
2) ەكىنشى دەڭگەيدەگى بانك نەمەسە بانك وپەراتسيالارىنىڭ جەكەلەگەن تۇرلەرىن جۇزەگە اسىراتىن ۇيىم سالىق تولەۋشىنىڭ تولەم قۇجاتىن قاتە ورىنداعان;
3) اقشا جىبەرۋشى – سالىق تولەۋشى تىركەۋ ەسەبىندە تۇرماعان سالىق ورگانىنا تولەم جۇرگىزگەن;
4) اقشا جىبەرۋشى – سالىق تولەۋشى مەملەكەتتىك باج تولەۋشىسى بولىپ تابىلمايدى.
مەملەكەتتىك باجدىڭ قاتە تولەنگەن سوماسى مىناداي قۇجاتتار ۇسىنعان جاعدايدا قايتارىلادى:
1) سالىق تولەۋشىنىڭ سالىقتىق ءوتىنىشى;
2) ەكىنشى دەڭگەيدەگى بانكتىڭ نەمەسە بانك وپەراتسيالارىنىڭ جەكەلەگەن تۇرلەرىن جۇزەگە اسىراتىن ۇيىمنىڭ ءوتىنىشى;
3) قاتە فاكتىسى انىقتالعان جاعدايدا, سالىق ورگانى جاساعان مەملەكەتتىك باجدىڭ قاتە تولەنگەن سوماسىنىڭ تۋىنداۋ سەبەپتەرى تۋرالى حاتتاما.
سالىق تولەۋشىنىڭ سالىقتىق ءوتىنىشى, ەكىنشى دەڭگەيدەگى بانكتىڭ ءوتىنىشى ۇسىنىلعان جانە مەملەكەتتىك باجدىڭ قاتە تولەنگەن سوماسى تۇسكەن كۇننەن باستاپ بەس جۇمىس كۇنى ىشىندە قايتارىم جۇرگىزىلەدى.
وسىلايشا, مەملەكەتتىك باجدىڭ ارتىق/قاتە تولەنگەن سوماسىن قايتارۋ ءۇشىن تولەم جۇرگىزىلگەن ورىن بويىنشا مەملەكەتتىك كىرىستەر ورگانىنا بەلگىلەنگەن نىسانداعى سالىقتىق ءوتىنىشتى (قر قم-ءنىڭ 2018 جىلعى 12 اقپانداعى №160 بۇيرىعىنىڭ 15-قوسىمشاسى) جانە قايتارۋعا نەگىز بولىپ تابىلاتىن قۇجاتتار بەرىلگەن ۋاكىلەتتى مەملەكەتتىك ورگاننىڭ راستايتىن قۇجاتىن ۇسىنۋ قاجەت.
سونىمەن قاتار مەملەكەتتىك باجدىڭ ارتىق/قاتە تولەنگەن سوماسىن قايتارۋ جۇرگىزۋگە سالىقتىق ءوتىنىشتى ەلەكتروندى تۇردە مەملەكەتتىك كىرىستەر كوميتەتىنىڭ «سالىق تولەۋشى كابينەتى» web-قوسىمشاسى, egov.kz پورتالى, «e-Salyq Azamat» ءموبيلدى قوسىمشاسى ارقىلى راستايتىن قۇجاتپەن قوسا جولداۋعا بولادى.
