سوعىس باستالعان كەزدە نيكولاي مەدۆەدەۆ الماتى تەمىر جول تەحنيكۋمىنىڭ ءۇشىنشى كۋرس ستۋدەنتى بولدى. 1941 جىلى تامىزدا ول اسكەرگە شاقىرىلدى. اتىس پولكىندەگى جاتتىعۋلاردان كەيىن مايدانعا اتتانعان. ستالينگراد تۇبىندەگى شايقاستا العاش رەت جاۋعا قارسى شىققان. 43-ءشى جىلى ۇرىستاردىڭ بىرىندە سنارياد جارىقشاعى ءتيىپ, جاراقات الدى. گوسپيتالدا ەمدەلگەننەن كەيىن اسكەرگە قايتا ورالدى.
كۋرسكىدەن پولشاعا دەيىن جەتكەن. جەڭىستى بەرلين ماڭىنداعى گيۋستروۆ قالاسىندا قارسى الدى. جاۋىنگەرلىك ەڭبەگى ءۇشىن نيكولاي مەدۆەدەۆ وتان سوعىسى, قىزىل جۇلدىز وردەندەرىمەن, «ستالينگرادتى قورعاعانى ءۇشىن», «گەرمانيانى جەڭگەنى ءۇشىن» مەدالدارىمەن ماراپاتتالعان.
اسكەردەن ورالعاننان كەيىن وساكاروۆ اۋدانىنا قايتا ورالدى. 1946 جىلى پيونەر اۋىلدىق كەڭەسى اتقارۋ كوميتەتىنىڭ ءبىرىنشى توراعاسى بولىپ سايلاندى. سودان كەيىن كوپ جىل اۋداندىق بايلانىس تورابىندا جۇمىس ىستەدى.
ارداگەر جاۋىنگەرلىك ناگرادالارىنا قوسا «ەرەن ەڭبەگى ءۇشىن», «تىڭ جانە تىڭايعان جەرلەردى يگەرگەنى ءۇشىن» مەدالدارىنا قول جەتكىزدى. 2005 جىلى جەڭىستىڭ 60 جىلدىعىنا وراي نيكولاي مەدۆەدەۆكە وساكاروۆكا كەنتىنىڭ قۇرمەتتى ازاماتى اتاعى بەرىلدى.
ايانا توعانبەك
