اقتوبە قالاسىنداعى «زەرەك لتد» جاۋاپكەرشىلىگى شەكتەۋلى سەرىكتەستىگى مەكتەپكە دەيىنگى بالالاردى وزدىگىنەن دامىتۋ جانە قازاقشا ۇيرەتۋ ءۇشىن سۋرەتتى كىتاپشالاردى وقيتىن دىبىستى قالام ويلاپ شىعاردى.
بۇلدىرشىندەردىڭ وي-ءورىسىن دامىتۋ ماقساتىندا جاسالعان بۇل جۇيە ارنايى ماماندار مەن تاربيەشى-ۇستازداردىڭ ۇزاق جىلعى ەڭبەگىنىڭ جەمىسى ەكەن. ال ونى جاساعان ونەرتاپقىشتاردىڭ ءبىرى – ءبىزدىڭ اقجايىق اۋدانىنىڭ ورتالىعى چاپاەۆتاعى مەكتەپ-گيمنازيانىڭ تۇلەگى ابزال قادىرباەۆ ەكەنى تۇرعىندار ءۇشىن زور ماقتانىش.
«زەرەك» اتتى سويلەيتىن قالامنىڭ ەرەكشەلىگى نەدە؟ پايدالانۋ تۋرالى نۇسقاۋلىقتا كورسەتىلگەندەي, سويلەيتىن قالام – زاماناۋي تەحنولوگيانىڭ ساپالى جانە قاۋىپسىز ەلەكتروندى ءونىمى. ونىڭ اتقاراتىن فۋنكتسيالارى دا از ەمەس. 2-3, 4-5 جانە 6-7 جاستاعى بالالارعا ارنالعان جەكە-جەكە سۋرەتتى كىتاپشالاردى پايدالانا وتىرىپ, قالامدى وعان تيگىزۋ ارقىلى بالانىڭ اينالامەن تانىستىعى, ورتانى تانىپ ءبىلۋى باستالادى. «زەرەك» قالامى بۇلدىرشىندەردىڭ قىزىعۋشىلىعىن ارتتىرىپ, ويلاۋ, كورۋ, ءتۇسىنۋ, سويلەۋ, سۋرەت سالۋ قابىلەتتەرىن دامىتادى. ءار بالانى ءوز انا تىلىندە ەركىن, جاتىق سويلەۋگە, ءسوز مانەرىن قالىپتاستىرۋعا, وقۋعا, ەسەپتەر شىعارۋعا, تاقپاقتار جاتتاۋعا, ءان ايتۋعا جاتتىقتىرادى.
سۋرەتتەردى پايدالانۋ ارقىلى دىبىس پەن اۋەنگە تولى ينتەراكتيۆتى ساباق الۋعا بولادى. «بالالار مەكتەپكە بارعانشا كوپ ءسوزدى, سويلەمدەردى, سانداردى جاتتاپ الىپ, سايراپ تۇرادى. بالاباقشادا بولسىن, ۇيدە بولسىن, سويلەيتىن قالام مەن سۋرەتتى كىتاپشالاردىڭ سابيگە بەرەرى مول», – دەپ پىكىر ءبىلدىرىپتى پەداگوگيكا عىلىمدارىنىڭ كانديداتى, پروفەسسور ءجانيا نۇرجان. قالامدى كومپيۋتەرگە USB ارقىلى قوسىپ, جادى كارتاسىنا ءان جازىپ, ونى مرز كارتاسى ارقىلى تىڭداي دا الاسىز. سويلەيتىن قالام ەكولوگيالىق تالاپتارعا ساي تازا ونىمدەردەن جاسالعان.
كولەمى شاعىن بۇل قۇرال الىپ جۇرۋگە وتە قولايلى, ىڭعايلى. ول ءار بالدىرعاننىڭ سەنىمدى سەرىگى, سۇيىكتى دوسى, اقىلشى ۇستازى بولارى انىق. وسىنداي اسا قاجەت وقۋ قۇرالىن جاساعان ابزال باۋىرىمىز بولاشاقتا ونى جەتىلدىرە ءتۇسۋ ءۇشىن ەڭبەكتەنىپ جۇرگەنىن ايتادى. ال «زەرەك» قازىر ەلىمىزدىڭ باتىس ايماعىنداعى قالا, اۋىل دۇكەندەرىنە تۇسە باستادى.
بولات ەسقاليەۆ,
جۋرناليست.
باتىس قازاقستان وبلىسى,
اقجايىق اۋدانى.
سۋرەتتەردە: ابزال قادىرباەۆ ءوزى جاساعان وقۋ قۇرالىمەن جانە «زەرەكتىڭ» جالپى كورىنىسى.
