دارحان جازىقباەۆ مەملەكەتتىك قىزمەتكە كىرۋ ءۇشىن ارتىق كەدەرگىلەر مەن توسقاۋىلداردى الىپ تاستاۋ جانە ودان شىعۋ ءتارتىبىن جەڭىلدەتۋ, مەملەكەتتىك قىزمەتتىڭ كەز كەلگەن قازاقستاندىققا اشىق بولۋىنا قاتىستى ۇسىنىستار بەردى. سونىمەن قاتار پرەزيدەنتكە مەملەكەتتىك اپپاراتتىڭ قىزمەتىن بيۋروكراتيادان ارىلتۋ جۇمىستارى جونىندە ايتتى.
اگەنتتىك توراعاسى پرەزيدەنتكە 2022-2023 جىلدارى «ە-قىزمەت» اقپاراتتىق جۇيەسىن جاڭعىرتۋ تۋرالى جوسپارىن ۇسىندى. ونىڭ ايتۋىنشا, بيىل سىرتقى پورتالدى قۇرۋ ارقىلى «ە-قىزمەت» بازاسىندا مەملەكەتتىك قىزمەتكە ىرىكتەۋ جانە قابىلداۋ پروتسەسى تولىق تسيفرلاندىرىلادى. ال 2023 جىلى باسقا دا كادرلىق ۇدەرىستەر, اتاپ ايتقاندا, روتاتسيا, تاعىلىمداما, بىلىكتىلىكتى ارتتىرۋ جانە باسقا دا قىزمەتتەر اۆتوماتتاندىرىلادى. سونىمەن قاتار دارحان جازىقباەۆ مەملەكەتتىك قىزمەت كورسەتۋ ساپاسىن جەتىلدىرۋ بارىسىنا دا توقتالدى.
ۆەدومستۆو باسشىسى اگەنتتىكتىڭ 2023 جىلدان باستاپ مەملەكەتتىك قىزمەتكە ىرىكتەۋدى پروكتورينگ تەحنولوگياسىن قولدانۋ ارقىلى ونلاين تۇردە وتكىزۋدى جوسپارلاپ وتىرعانىن جەتكىزدى. سونداي-اق قاسىم-جومارت توقاەۆتىڭ باعىنىشتى ۇيىمداردى قىسقارتۋ جونىندەگى تاپسىرماسى بويىنشا «مەملەكەتتىك قىزمەتتەگى پەرسونالدى باسقارۋ ورتالىعىنىڭ» اق شتاتتىق بىرلىكتەرى مەن بيۋدجەتىن ساقتاي وتىرىپ, مەملەكەتتىك باسقارۋ اكادەمياسىنىڭ قۇرامىندا HR-ينستيتۋتىن قۇرۋ تۋرالى ايتتى.
كەزدەسۋ بارىسىندا پرەزيدەنت مەملەكەتتىك قىزمەتكە ىرىكتەۋ جۇيەسىن ودان ءارى جەتىلدىرۋ, مەريتوكراتيا قاعيداتىن ىلگەرىلەتۋ جانە ادامعا باعدارلانعان سەرۆيستىك مەملەكەتتىك اپپارات قالىپتاستىرۋ جونىندە تاپسىرمالار بەردى.
