ەل پاتريوتىن تاربيەلەۋ – مىندەت

رەسپۋبليكا قارۋلى كۇشتەرى باس شتابى باستىعىنىڭ ورىنباسارى – تاربيە جانە يدەولوگيالىق جۇمىستار دەپارتامەنتىنىڭ جەتەكشىسى, پولكوۆنيك مۇحامەدجان تالاسوۆتىڭ باسقارۋىنداعى اقپاراتتىق-ناسيحات توبى قىزىلجار وڭىرىندە بولىپ, جولداۋدىڭ باسىم قاعيداتتارىن ءتۇسىندىردى. اسكەري-پاتريوتتىق كلۋبتار مەن جاس ارمياشىلار ورتالىقتارىنىڭ وكىلدەرىمەن جۇزدەسۋدە ساپار ماقساتى جۇرتشىلىق اراسىندا قارۋلى كۇشتەردىڭ بەدەلىن نىعايتۋدى, وسكەلەڭ ۇرپاق بويىنا قازاقستاندىق پاتريوتيزم رۋحىن قالىپتاستىرۋدى دىتتەيتىنى ايتىلىپ, بۇل باعىتتاعى اتقارىلىپ جاتقان ءىس-شارالاردان حاباردار ەتىلدى. وندا ءسوز العان م. تالاسوۆ تاريحي قۇجاتتىڭ ماقساتتارى مەن مىندەتتەرىن جۇزەگە اسىرۋ جونىندەگى ناقتى شارالاردىڭ ىشىندە قوعامىمىزداعى ۇلتتىق بىرلىك, بەيبىتشىلىك پەن كەلىسىم, وڭىرلىك قاۋىپسىزدىك ماسەلەلەرى باستى تاقىرىپ بولىپ تابىلاتىنىن جەتكىزە كەلىپ, جاس­تاردى مەملەكەت باسشىسى نۇرسۇلتان نازارباەۆ بەلگىلەپ بەرگەن جاڭا قازاقستاندىق پاتريوتيزم رۋحىندا تاربيەلەۋ جولدارىنا توقتالدى. ەلىن, ەلباسىن سۇيەتىن پاتريوت قالىپتاستىرۋ–بارشامىزدىڭ مىندەتىمىز. «ماڭگىلىك ەل» يدەياسى قازاقستاندىقتاردىڭ ىزگى ارماندارى مەن كۇش-جىگەرلەرىن ءبىر ارناعا توپتاستىرىپ, ەلىمىزدىڭ جارقىن بولاشاعىنا جەتەلەيتىن باستى قۇجات بولىپ تابىلادى. بۇل ورايدا, بەلسەندى, ءبىلىمدى, دەنساۋلىعى مىقتى, ەلىمىزدىڭ لايىقتى ازاماتتارى رەتىندە ءوسىپ كەلە جاتقان جاستارعا ەلباسى ۇلكەن سەنىم, زور جاۋاپكەرشىلىك جۇكتەدى. دەلەگاتسيالىق توپتى ايماق باسشىسى سامات ەسكەندىروۆ قابىلداپ, ەلىمىزدىڭ ەكونوميكاسىن ارتتىرۋدا سولتۇستىكقازاقستاندىق جاستاردىڭ الار ورنى ەلەۋلى ەكەنىن, ولاردىڭ بويلارىنا مىندەت, ابىروي, پارىز, بورىش سەكىلدى قاسيەتتى ۇعىمداردى ءسىڭىرۋ جولىندا ىرگەلى ىستەر اتقارىلىپ جاتقانىن, وڭىردە جۇمىس ىستەيتىن 10 اسكەري-پاتريوتتىق كلۋب پەن 14 جاس ارمياشىلار ورتالىعىنىڭ نەگىزگى قىزمەتى وتاندى, ەلدى, جەردى ءسۇيۋ يدەيالارىن ۇعىندىرۋعا باعدارلانعانىن جەتكىزدى. م. تالاسوۆ ءوز سوزىندە كەڭ اۋقىمدا وربىگەن اڭگىمە ءۇشىن ريزاشىلىعىن ءبىلدىردى. قورعانىس مينيسترلىگى, وبلىستىق اكىمدىك جانە جاس ارمياشىلاردىڭ رەسپۋبليكالىق شتابى اراسىندا اسكەري-پاتريوتتىق جۇمىستاردى ودان ءارى نىعايتۋ جونىندەگى مەموراندۋمعا قول قويىلدى. قالالىق مادەنيەت ۇيىندە سوعىس, قارۋلى كۇشتەر, ينتەرناتسيوناليست-جاۋىنگەرلەر ارداگەرلەرىنىڭ, جاستار ۇيىمدارى وكىلدەرىنىڭ قاتىسۋىمەن وتكەن كەڭەيتىلگەن جيىندا قارۋلى كۇشتەر باس شتابىنىڭ ورىنباسارى – تاربيە جانە يدەولوگيالىق جۇمىستار دەپارتامەنتىنىڭ جەتەكشىسى م. تالاسوۆ «پاتريوتيزم – مەملەكەتتىلىكتىڭ نەگىزى» دەگەن تاقىرىپتا بايانداما جاساپ, «ماڭگىلىك ەلگە» باستايتىن ەڭ ابىرويلى, ەڭ مارتەبەلى جول –  «قازاقستان-2050» ستراتەگياسىنىڭ ماقساتتارىن ىسكە اسىرۋ جولدارىنان جان-جاقتى ماعلۇمات بەردى. سوڭعى جىلدارى ەلىمىزدىڭ قارۋلى كۇشتەرىنىڭ قۇرىلىمدىق بازالىق, ماتەريالدىق-تەحنيكالىق جاراقتانۋ جاعىنان نىعايىپ, قاتارى كۇشى مىعىم, رۋحى جوعارى سەنىمدى قورعاۋشىلارمەن تولىعا تۇسكەنىن اڭعارۋ قيىن ەمەس. مامىر ايىندا استانادا «KADEX-2014» اسكەري تەحنيكالار مەن قارۋلانۋدىڭ حالىقارالىق كورمەسى مەن اسكەري پاراد ءوتۋى – ارميامىزدىڭ كاسىبي شەبەرلىگىنىڭ كەمەلدەنۋىنىڭ ايعاعى. اسكەري دايىندىق جۇيەسىن جەتىلدىرۋ باعىتىندا ماڭىزدى قادامدار جاسالىپ, تاجىريبەلىك ساباقتار, اتۋ الاڭدارىنا شىعۋ مۇمكىندىكتەرى كوبەيدى. وتان قورعاۋ قاتارىنا شاقىرىلۋشىلار اراسىندا اسكەري-پاتريوتتىق تاربيە شارالارىن كەشەندى جۇرگىزۋگە ۇدايى نازار اۋدارىلادى. الماتى قالاسىندا العاشقى اسكەري-تەحنيكالىق مەكتەپ اشىلدى. بيىلدان باستاپ «جاس ۇلان» اسكەري اندەر فەستيۆالىنە وقۋ ورىندارىنىڭ وكىلدەرى دە قاتىساتىن بولادى. قازاق راديوسىمەن بىرلەسە وتىرىپ, «اسكەري اندەر» اتتى مۋزىكالىق راديو جوبا ەفيرگە شىعادى. كونكۋرستىق گالا-كونتسەرت تۇڭعىش پرەزيدەنتتىڭ تۋعان كۇنى قارساڭىندا وتەدى. باسقوسۋ قورعانىس مينيسترلىگىنىڭ ورتالىق ءانسامبلىنىڭ كونتسەرتىنە جالعاستى. ءومىر ەسقالي, «ەگەمەن قازاقستان». سولتۇستىك قازاقستان وبلىسى.