قازاقستاندىق ءونىم جاسايمىز!

«قازاقمىس كورپوراتسياسىنىڭ» بەيسەنبى كۇنى استانادا وتكەن فورۋمى وسىلاي اتالدى. قازاقستاندىق ۇلەستى دامىتۋعا ايرىقشا جول اشىپ وتىرعان مۇنداي جىل سايىنعى فورۋم بيىل بەسىنشى رەت ۇيىمداستىرىلدى. فورۋمعا وتاندىق كاسىپورىنداردىڭ, دامۋ ينستيتۋتتارى مەن مەملەكەتتىك سالالىق ۆەدومستۆولاردىڭ 500-دەن استام دەلەگاتى قاتىستى. ءيا, قازاقستاندىق ۇلەستى ارت­تىرۋعا ەلىمىزدىڭ بارلىق كومپانيا­لارى, ءىرى ءوندىرىس ورىندارى بارىنشا اتسالىسۋعا ءتيىس. بۇل – ەلباسى جۇكتەگەن ماڭىزدى مىندەتتەردىڭ ءبىرى. وسىنى باستى باعىتتا ۇستانعان «قازاقمىس كورپوراتسياسى» جىل سايىن وتاندىق كومپانيالاردىڭ باسىن قوسىپ, اشىق پىكىر الاڭىنا جيناۋدى داستۇرگە اينالدىرىپ وتىر. وندا ەڭ باستىسى, بارلىق قاتىسۋشىلارعا كەلىسسوزدەر جۇرگىزۋگە جانە ونىمدەر مەن قىزمەتتەر كورمەسىنە قاتىسۋعا مۇمكىندىك بەرىلگەن. «قازاقمىس» قازاقستانداعى ەڭ ءىرى ءارى الەمدەگى الدىڭعى قاتارلى مىس ءوندىرۋشى ەكەنى بارىمىزگە بەلگىلى. ەندەشە, وسىنداي الپاۋىت ءوندىرىس وشاعىنىڭ قازاقستاندىق ۇلەستى دامىتۋعا بارىنشا كۇش سالۋى ماڭىزدى. سوڭعى 5 جىل ىشىندە «قازاقمىس كورپوراتسياسى» وتاندىق كومپانيالاردان 560 ملرد. تەڭگەدەن استام سوماعا تاۋارلار, جۇمىستار مەن قىزمەتتەر ساتىپ الىپتى. وسى جىلدار ىشىندە كومپانيا قازاقستاندىق ۇلەستى دامىتۋ ىسىندەگى كوشباسشى رەتىندە «التىن گەفەست» اتتى ۇلتتىق سالالىق سىيلىعىمەن ەكى مارتە ماراپاتتالعان. 2013 جىلى كومپانيا 223,8 ملرد. تەڭگەنىڭ تاۋارلارىن, جۇمىستارىن, قىزمەتتەرىن ساتىپ العان, ءسويتىپ بىلتىرعى جىلى قازاقستاندىق ۇلەس ونىڭ الدىڭعى جىلعىمەن سالىستىرعاندا 5 پايىزعا ءوسىپ, 67 پايىزدى قۇراعان. ايتا كەتسەك, «قازاقمىس كورپوراتسياسى» شاعىن جانە ورتا بيزنەستىڭ دامۋىن ىنتالاندىرۋ بويىنشا كەشەندى جۇمىس جۇرگىزىپ كەلەدى. كومپانيا ساتىپ الۋ جانە ۇزاق مەرزىمدى شارتتارعا قول قويۋ جولىمەن عانا ەمەس, سونداي-اق بەيىندىك ەمەس تسەحتاردى اۋتسورسينگكە بەرۋ جولىمەن, جابدىقتاردى جاڭارتۋعا, جاڭا وندىرىستەر اشىپ, ولاردى ۇلعايتۋعا قارجىلىق كومەك بەرۋ جولىمەن قولداۋ كورسەتۋدە. وسى باعىتتاعى جۇمىستاردى ءبىر جۇيەگە كەلتىرۋ ءۇشىن العاشقىلاردىڭ ءبىرى بولىپ, قازاقستاندىق ۇلەستى دامىتۋ جونىندە باسقارما دا قۇرعان. ال «قازاقمىستىڭ» شاعىن جانە ورتا بيزنەستى دامىتۋ ءارى قولداۋ بويىنشا كەشەندى باعدارلاماسى سەرىكتەس كاسىپورىندارعا ءوز ءونىم­دەرىنىڭ تۇرلەرىن ۇلعايتۋعا, ءوندىرىسىن جاڭعىرتۋعا, ساپاسىن ارتتىرۋعا, جاڭادان جۇمىس ورىندارىن اشۋعا جانە وتكىزۋ نارىعىن ۇلعايتۋعا مۇمكىندىك بەرىپ وتىر. كومپانيانىڭ مونوقالالاردى دامىتۋ بويىنشا دا جەكە باعدار­لاماسى بار. باعدارلامانى ىسكە اسىرۋ ماقساتىمەن جەزقاز­عان ايماعى مەن بالقاش قالاسى­نىڭ كاسىپكەرلەرى جانە ونەركاسىپشىلەرىنىڭ قاۋىم­داستىعى جانە وداعى قۇرىلىپ, ولارمەن 2013 جىلى جالپى سوماسى 22 ملرد. تەڭگەگە 650-دەن استام كەلىسىمشارت جاسالىپتى. ولاردىڭ قۇرامىنا قىزمەتكەرلەرىنىڭ جالپى سانى 4500 ادامدى قۇرايتىن 92 كاسىپورىن ەنىپ وتىر. وتكەن جىل ىشىندە ولار 204 جۇمىس ورنىن اشقان. يگى شارالارعا تاعى ءبىر مىسال, كورپوراتسيا باستاماسىمەن تاۋ-كەن شاحتا جابدىقتارى سالاسىندا يمپورت الماستىرۋ ماسەلەسىن شەشۋ ءۇشىن قازاقستاندا قوسالقى بولشەكتەر مەن توراپتار جاساپ شىعاراتىن, سونداي-اق جەتكىزىلگەن تەحنيكا مەن جابدىقتارعا قىزمەت كورسەتەتىن, جەرگىلىكتى قىزمەتكەرلەر قۇرامىن وقىتىپ وتىراتىن بىرلەسكەن كاسىپورىندار اشىلعان. تىزە بەرسەك, ارينە, اتقارىلعان جۇمىستار از ەمەس, جوسپارلى جوبالار دا جەتەرلىك. ەڭ باستىسى, سونىڭ ءبارى «قازاقستاندىق ءونىم جاساۋدى» باستى باعىتقا العان. كەشەگى بەسىنشى فورۋمنىڭ دا نەگىزگى ماقساتى وسى بولدى. دينارا بىتىكوۆا, «ەگەمەن قازاقستان».