كەشە بەيبىتشىلىك جانە كەلىسىم سارايىندا جاس ورىنداۋشىلاردىڭ ءححىىى «جاس قانات» بايقاۋىنىڭ العاشقى كەزەڭى باستالدى. ەلىمىزدىڭ ءار وڭىرىنەن ىرىكتەلگەن بالعىن ورەندەردىڭ بايقاۋى ءۇش كۇنگە سوزىلادى. ءساۋىردىڭ 13-ءى كۇنگى قورىتىندى گالا-كونتسەرتتە جەڭىمپازدار انىقتالادى.
جىل سايىن وتەتىن ءداستۇرلى ءان بايقاۋى بۇل جولى دا ادەتتەگىدەي بالاۋسا ورەندەرگە ەلوردانىڭ كورىكتى جەرلەرىن ارالاتۋ, مادەنيەت وشاقتارىمەن تانىستىرۋ, مادەنيەت پەن ونەردىڭ تانىمال وكىلدەرىمەن جۇزدەسۋ, پىكىر الماسۋ سەكىلدى الۋان ماڭىزدى شارالارمەن ءورىلدى. وسى جاعىنان سۇيىكتى استانا جاستاردى ۇلكەن ساحناعا جەتەلەۋدە, ءان ونەرىنە دەگەن تالعام-تالابىن كۇشەيتۋدە, ومىردەن ءوز ورنىن تاۋىپ, بالعىن قاناتىن قاتايتۋدا ايتارلىقتاي ءرول اتقارىپ كەلە جاتقانى شىندىق.
سونداي ەستە قالار شارانىڭ ءبىرى «استانا وپەرا» مەملەكەتتىك وپەرا جانە بالەت تەاترىندا وتكەن كەزدەسۋگە جاستار ۇلكەن ىنتامەن كەلدى. ايتا كەتۋ كەرەك, ەلوردا تەاترى استاناعا كەلگەن قوناقتار ءجيى باس سۇعاتىن ەڭ كورىكتى عيمارات سانالادى. سول سەبەپتى دە, ونەرلى ورەندەر ءۇشىن مۇنداعى ءاربىر زال مەن ساحنالىق ەرەكشەلىكتى ارالاپ, تاماشالاۋدىڭ ءجونى بولەك. ەڭسەلى اسەم عيماراتتىڭ ىشكى سالتاناتىنا سۇيسىنگەن جاسقاناتتىقتاردى مۇنان كەيىن تەاتر ديرەكتورى, بەلگىلى كومپوزيتور تولەگەن مۇحامەدجانوۆ قابىلدادى. مادەنيەت قايراتكەرىمەن كەزدەسۋدە جاستار كومپوزيتوردىڭ رويالدەگى سۇيەمەلدەۋىمەن «مەن دەپ ويلا», «اياۋلىم» اندەرىن قوسىلا شىرقاپ, ەستەلىك سۋرەتكە ءتۇستى. مۋزىكا مايتالمانى جاستارعا: «ءان سالىڭدار. وزدەرىڭ سۇيگەن ىسپەن شۇعىلدانىڭدار. ارماندارىڭا جەتىڭدەر!» دەپ ساتتىلىك تىلەدى. بايقاۋعا قاتىسۋشىلار ەلوردانىڭ اسەم جەرلەرى سانالاتىن «دۋمان» ويىن-ساۋىق ورتالىعىندا, قازاق ۇلتتىق ونەر ۋنيۆەرسيتەتىندە بولىپ شاتتىققا كەنەلدى. الەمدەگى ەڭ ءىرى وقۋ ورىندارىمەن تىعىز قارىم-قاتىناستاعى ۋنيۆەرسيتەتتە ءبىلىم الۋدىڭ ءوزى ورەندەر ءۇشىن ۇلكەن ارمان دەسەك تە, بايقاۋعا قاتىسۋشىلاردىڭ اراسىندا وسى وقۋ ورنىندا وقيتىن جاستاردىڭ بولۋى كوپ جايتتى اڭعارتسا كەرەك. سونىڭ ءبىرى – ءۇشىنشى كۋرس ستۋدەنتى نۇرسۇلتان قاراباليەۆ ەسىمدى ونەرپاز. بايگەگە ۇكىلەپ قوسقان ۇزدىكتەرى جەڭىپ شىعۋىنا ءۇمىتتى ۋنيۆەرسيتەت باسشىلىعى جاستاردى ىستىق ىقىلاسپەن قارسى الدى. مۇندا ءبىلىم الىپ جاتقان جاستاردىڭ ونەرگە باۋلىنۋى ولاردى قاتتى قىزىقتىردى. وقۋ ورنى باسشىلىعى تاراپىنان مۋزىكانتتار مەن بيشىلەردىڭ ساحناعا دايىندىعىمەن, گالەرەيا كورمەسىمەن, جاس سۋرەتشى-مۇسىنشىلەردىڭ شىعارماشىلىق جۇمىستارىمەن, ءتۇسىرىلىم الاڭىندا قيال-عاجايىپ كينونىڭ ءتۇسىرىلۋ ادىستەرىمەن جاقىنىراق تانىسىپ شىعۋعا تولىق جاعدايلار جاسالدى.
مىنە, جۇرەكتەرى الىپ-ۇشقان ورەندەردىڭ اسىعا كۇتكەن سىن ساعاتى دا كەلىپ جەتتى. العاشقى ساحنا. اساۋ تولقىنداي الابۇرتقان كوڭىل. ءلۇپىل سوققان نازىك جۇرەكتەر. كوكتەمنىڭ ۇنىمەن جارىسا سىڭعىرلاعان ءمولدىر بۇلاقتار. ون ەكى قالادان بايگەگە ون ءتورت ونەرپاز قاتىسۋدا. بايقاۋدىڭ تاعى ءبىر ەرەكشەلىگى, استانا, كوكشەتاۋ, تالدىقورعان, ورال, اقتوبە, سەمەي, قاراعاندى سياقتى قالالارمەن قاتار ارىس (وقو), ايتەكە بي (اقتوبە), اياگوز (سەمەي) سىندى وڭىرلەردەن شىققان جاستاردىڭ ونەرىن تاماشالاۋ مۇمكىندىگى تۋىپ وتىر.
ايدا احمەتجاروۆا.
–––––––––––––––––––
سۋرەتتى تۇسىرگەن
سۇلتان سەيىتوۆ.
