بايقوڭىر باللاداسى

قوڭىنان ەت كەسەتىن جاقىن جانعا, اعىنان جارىلاتىن اسىل زادا, اپارعان ءبىزدى باستاپ بايقوڭىرعا قايران دوس قۇتتاياقوۆ شاكيزادا.   سول كۇنى اشىلىپ ءبىر ارمان گ ۇلى, قازاقتىڭ باق جۇلدىزى جانعان كۇنى. توقتارداي ارىستان ەر ايعا اتىلىپ, جەتى قات كوكتە زاۋلاپ سامعار كۇنى.   عارىشقا ۇشادى دەپ قىران قۇسىم, بار قازاق تويلاعانداي قۋانىشىن. مەرەيىم, ماقتانىشىم, جۇبانىشىم – مەنىڭ دە جان-جۇرەگىم جىرلادى شىن.   بولمايدى ۇلى دۋدا ۇساقتاعان, قالايشا سەزىمىمدى تۇساپ قالام. كۋا بوپ عاجاپقا بۇل تۇرعانىمدا ەلباسى نۇراعامنان ءۇش-اق قادام!   اتىلدى ءبىر-اق ساتتە كەمە كوككە, انتالاپ قاراپ قالدىق كەرەمەتكە. كەتەردەي كوككە بىرگە كوتەرىلىپ, كومكەرىپ كوڭىل كوكتەم-كوبەلەككە.   دۇركىرەپ دۇنيەمنەن سەل قوزداعان, كۇركىرەپ زور ۇنىمەن جەر قوزعاعان. شانشىلىپ كوككە كەمە ورلەگەندە ماڭقيىپ قالا بەرگەن ماڭعاز دالام.   بۇرق ەتكەن وت-جالىنى قاۋلاي بەردى, تىك ۇشقان كوككە كەمە زاۋلاي بەردى. ارسىعا امانداسىپ قول سوزعانداي كولدەي نۇر كوكىرەكتەن ساۋلاي بەردى. قادالىپ قالت ەتكىزبەي جانارىممەن, جۇيتكۋىن عالاماتتىڭ باعامىن مەن. كورىنبەي كوككە ءسىڭىپ كەتكەنىنشە ءار ءساتىن بۇل عاجاپتىڭ سانادىم مەن.   «ون, ون ءبىر...» دەگەنىمشە ءسىڭدى كوككە, سەبىلدى سۇيىنشىلەپ نۇر جۇرەككە. عارىشقا كەمەنى امان الىپ شىققان شاتتاندىق الاقايلاپ قۇدىرەتكە.   جەردىڭ دە جەڭگەنىنە تارتىلىسىن, كوڭىلدەر كوكتەي بۇرلەپ شالقىدى شىن. كەشەگى توقتار ايتقان ءسوزى قانداي: «بۇل ۇشۋ قازاعىما, حالقىم ءۇشىن!»   ءماز-مەيرام, مارە-سارە سول ارادا, ۇقسادىق تولقىن وپكەن شاعالاعا. ءبىر-ءبىرىن قۇشاققا جۇرت الىپ جاتىر شارپىعان شاتتىق كۇيدەن جاڭا عانا.   ەسىمدە شاشۋدىڭ دا شاشىلعانى, اسپانىم سوگىلىپ ءبىر اشىلعانى. قاسىمدا قىزىل كيگەن قىرمىزى قىز باس سالىپ مويىنىما اسىلعانى.   الدى ما ءشوپ ەتكىزىپ ءسۇيىپ تە ءبىر, ايتەۋىر جۇرە بەرگەن ءيىپ كوڭىل. قاس-قاعىم قۋانىشتان الابۇرتىپ, اسقانداي اقشا بۇلتتى بيىككە ءبىر.   اقسارباس ايتارلىقتاي عاجاپ بۇل ءىس, عارىشقا كوتەرىلدى قازاق تۇڭعىش. سامالا قۇيرىعىنىڭ قۇس جولىمەن سوڭىنان ۇشىپ كەتپەي از-اق تۇرمىز. قۇس سەزىم قۇشتارلىعى تارقامادى. توقتاردىڭ قارىنداسى. قارقارالى. اعاعا اق جول تىلەپ كەلگەن ەكەن ارنايى اۋىلىنان ارقاداعى.   عاجابىن بولعان جايدىڭ تەربەدىم كوپ, ول قىزدى ودان كەيىن كورگەنىم جوق. قالدى تەك قايتا كەلمەس سول ءبىر ساتتەر وتكەننىڭ ۇمىتىلماس ورنەگى بوپ. قورعانبەك امانجول. الماتى.