ءومىر كۇزەتىندەگى كۇرەس

«قازاقستان» ۇلتتىق تەلەارناسىندا «جەدەل جاردەم» اتتى جاڭا وتاندىق تەلەحيكايا كورەرمەنگە جول تارتىپ وتىر. تەلەحيكايا قازاقستاندىق دەنساۋلىق ساقتاۋ سالاسىنىڭ زاماناۋي جەتىستىكتەرى مەن ءوز قامىن ۇمىتىپ, وزگەنىڭ ءومىرى ءۇشىن ارپالىساتىن دارىگەرلەردىڭ كۇن سايىنعى ەرلىكتەرى تۋرالى باياندايدى. «جەدەل جاردەم» ستانساسىنداعى ادام ءومىرى ءۇشىن كۇرەسكەن اق جەلەڭدى ابزال جاندار جايىندا كوپتەگەن شەتەلدىك سەريالدار تۇسىرىلگەنى ءمالىم. مىسالى, امەريكانىڭ «جەدەل جاردەم», رەسەيدىڭ «سامارا», «سامارا 2» سەريالدارى كوپشىلىك  تاراپىنان قىزىعۋشىلىق تۋعىزعان تاڭداۋلى جوبالارعا جاتادى. ال قازاقستاندىق تولنۇسقا وزگەلەردىڭ كوشىرمەسى ەمەس, وقيعا جەلىسى ايىقپاس جۇرەك اقاۋىنان التى جاسار قىزى وپەراتسيا ۇستەلىندە كوز جۇمعان ەرلى-زايىپتى ءىلياسوۆتاردىڭ ىمىراعا كەلمەيتىن كۇردەلى قارىم-قاتىناسى ارقىلى ءوربيدى. ولار باسقا تۇسكەن اۋىرت­پالىقتى بىرگە كوتەرۋگە قاۋقار­سىزدىق تانىتادى. سول كۇيى ولار وزەكتى ورتەگەن وكىنىش, كىنالاۋ سەزىمى, ءبىر-بىرىنە نارازىلىق پەن قىزدارىن قۇتقارىپ قالۋ ءۇشىن قولدان كەلگەننىڭ ءبارىن ىستەي الماعان شاراسىزدىق اۋىرتپالىعىنان ارىلا المايدى... سوندىقتان دا الما جۇرەك اقاۋىنان زارداپ شەككەن بوتەن قىز بالانى اسىراپ العىسى كەلەدى. بۇل ۇسىنىسقا ەرمەك ءۇزىلدى-كەسىلدى قارسى بولادى. ال, شىنتۋايتىندا, ەرمەك بۇرىنعى جارىن باياعىشا سۇيەدى, سوندىقتان دا, قايعىلى وقيعانىڭ قايتالانعانىن قالامايدى. وسىنداي شيىرشىق اتقان كۇردەلى سەزىم مەن ەموتسيا سىرتقا شىققان سايىن كورەرمەن كوڭىلىن اۋدارىپ, وقيعا جەلىسى جەتەلەپ اكەتىپ وتىرادى. وتكەن ءومىرى, قايعىسى ورتاق ەرلى-زايىپتىلار سان ءتۇرلى سىناقتان وتەدى. بىراق, اقىر-سوڭىندا اسىراپ العىسى كەلەتىن قىزدىڭ ءومىرىن ساقتاپ قالعان ولار, ءبىر-ءبىرىن كەشىرە الا ما؟ وقيعا بۇدان ءارى قالاي ءوربيدى؟ كەيىپكەرلەر تاعدىرى قاي جولدا توعىسادى؟ مىنە, بۇل سۇراقتىڭ شەشىمىنە كورەرمەن «قازاقستان» ۇلتتىق ارناسىنان ءساۋىردىڭ 9-نان باستاپ, ساعات 21.50-دە كورسەتىلەتىن «جەدەل جاردەم» تەلەحيكاياسىن تاماشالاۋ ارقىلى كوز جەتكىزەدى. تاناكوز تولقىنقىزى, «قازاقستان» اق» رەسپۋبليكالىق تەلەراديو كەشەنىنىڭ ءباسپاسوز حاتشىسى.