بۇل ءتىزىم قر ۇكىمەتىنىڭ 2014 جىلعى 18 شىلدەدەگى № 817 قاۋلىسىمەن بەكىتىلگەن. الايدا زاڭناماعا ەنگىزىلگەن وزگەرىستەرگە بايلانىستى 2021 جىلدىڭ سوڭىندا مۇنداي تىزبەنى بەكىتۋ قۇقىعى كولىك سالاسىنداعى ۋاكىلەتتى ورگان – قازاقستان رەسپۋبليكاسى يندۋستريا جانە ينفراقۇرىلىمدىق دامۋ مينيسترلىگىنە بەرىلدى.
وسى شەشىمگە سايكەس 2022 جىلعى 18 ساۋىردە يندۋستريا جانە ينفراقۇرىلىمدىق دامۋ ءمينيسترى № 213 بۇيرىققا قول قويىپ, بۇرىن قولدانىستا بولعان تىزىمدەر قايتا بەكىتىلدى:
- تەكسەرۋ جۇرگىزىلەتىن كولىك ينفراقۇرىلىمى وبەكتىلەرىنىڭ ءتىزىمى;
- تەكسەرۋ جۇرگىزىلمەيتىن تۇلعالاردىڭ ءتىزىمى;
- كولىك ينفراقۇرىلىمى وبەكتىلەرىنە اكەلۋگە تىيىم سالىنعان زاتتار مەن قۇرالداردىڭ ءتىزىمى.
ايتا كەتەرلىگى, اتالعان بۇيرىق تەك ۆوكزالدار, مەترو ستانتسيالارى مەن تەڭىز پورتىنا, اۋەجايلارعا, جولاۋشىلار تەرمينالدارى جوق اۋە ايلاقتارىنا كىرۋ كەزىندە تەكسەرۋگە قاتىستى جۇزەگە اسىرىلادى. الايدا بۇل قۇجات قازاقستان رەسپۋبليكاسىنىڭ كەدەن جانە شەكارا قىزمەتى ورگاندارىنىڭ تەكسەرۋ جۇرگىزۋ تالاپتارىنا قاتىستى قولدانىلمايدى.
ەسكەرىلەتىن جايت, «قازاقستان رەسپۋبليكاسىنداعى كولىك تۋرالى» قر زاڭىنىڭ 24-1-بابىنىڭ تالاپتارىنا سايكەس تەرروريزمگە قارسى ءىس-قيمىل تۋرالى زاڭنامادا بەلگىلەنگەن قاۋىپ-قاتەر دەڭگەيىنە بايلانىستى جولاۋشىلار جانە كولىك ينفراقۇرىلىمى وبەكتىلەرىنە كەلەتىن ادامدار, ولاردىڭ الىپ جۇرەتىن زاتتارى, ونىڭ ىشىندە قول جۇگى مەن باگاجى تەكسەرىلەدى.
ايانا توعانبەك
