كەزدەسۋ بارىسىندا جامبىل وبلىسىنىڭ اكىمى نۇرجان نۇرجىگىتوۆپەن بىرگە قازاقتىڭ تۇڭعىش تەاتر رەجيسسەرى اسقار توقپانوۆتىڭ ەسكەرتكىشىنە گۇل شوقتارىن قويدى. سونداي-اق كەلۋشىلەرمەن بىرگە تەاتردىڭ فويەسىندە ۇيىمداستىرىلعان ءاسانالى ءاشىموۆ مۋزەيىن تاماشالادى. ايتۋلى تۇلعا ونەر تۋرالى, ونەردەگى دوستارى تۋرالى ۇمىتىلماس ەستەلىكتەرىمەن دە ءبولىستى.
ونەر يەسىنىڭ مەرەيتويىنا وراي اسقار توقپانوۆ اتىنداعى وبلىستىق قازاق دراما تەاترىندا حالىق ءارتىسىنىڭ شاكىرتتەرىنەن قۇرالعان «جاڭا عاسىر» تەاترىنىڭ اكتەرلەرى باقىت بەدەلحاننىڭ «تاعدىر تاقتاسى» اتتى پوەتيكالىق دراماسىن ساحنالادى. اتالعان قويىلىم ءاسانالى ءاشىموۆتىڭ قيلى تاعدىرى مەن شىعارماشىلىعىنا ارنالعان. ساحنادا قويىلعان شاحمات تەكتەس الاڭ ۇستىندە شىم-شىتىرىق, قىم-قيعاش تاعدىر باياندالادى. قاتار جۇرەتىن باق پەن سور, وكىنىش پەن ءۇمىت سياقتى دۇنيەلەر كورەرمەندى ابىز ءاسانالى الەمىمەن جاقىن تانىستىردى. سول شاحماتتىڭ تاقتاسىندا شاكەن ايمانوۆ, نۇرمۇحان ءجانتورين, اسقار توقپانوۆ, ءانۋار مولدابەكوۆ, رايىمبەك سەيتمەتوۆ جانە وزگە دە كورنەكتى تۇلعالاردىڭ بەينەلەرى اسقاقتاپ كورىندى. جالپى, بۇل دراما تۇلعانىڭ كۇندەلىكتەرى مەن ەستەلىك جازبالارىن قامتيدى. سونداي-اق ماڭگىلىك ساعىنىشقا اينالعان زايىبى مايرا ايمانوۆا, ومىردەن ەرتە كەتكەن قوس ۇلى ءمادي مەن ساعي ءاشىموۆ بەينەلەرى دە كورىنىس تابادى. ساحناداعى ءاسانالى ولارمەن مۇڭداسادى, سىرلاسادى. قويىلىمدى بەلگىلى رەجيسسەر جۇلدىزبەك جۇمانباي ساحنالاعان. ال قاراپايىم ءاسانالى رولىندەگى قۋانىش قۇدايبەرگەن, اكتەر ءاسانالى رولىندەگى قاسىمبەك دەمەۋوۆ, مايرا رولىندەگى نازەركە نوعايباەۆا سياقتى اكتەرلەردىڭ ويىندارى دا كوپشىلىكتى بەيجاي قالدىرمادى. ساعي مەن ءمادي ءرولىن سومداعان مۇحتار قوسىباي مەن ماديار جولداسبەك تە تالانتتى ساحناشەبەرلەرى ەكەنىن تانىتتى.
بۇدان كەيىن وبلىس اكىمى نۇرجان نۇرجىگىتوۆ ءاسانالى ءاشىموۆتى كەلە جاتقان مەرەيتويىمەن قۇتتىقتاپ, اكتەردىڭ ەلىمىزدىڭ رۋحاني-مادەني ومىرىنە قوسقان زور ۇلەسىن اتاپ ءوتتى. سونداي-اق جامبىلدىق جۇرتشىلىق تا ءبىرتۋار تۇلعاعا دەگەن ىقىلاسىن جەتكىزدى.
