بۇل اۋقىمدى شارا 7 مامىردا استانادا وتان قورعاۋشىلار كۇنىنە وراي ۇيىمداستىرىلادى
قازاقستان رەسپۋبليكاسىنىڭ پرەزيدەنتى – قارۋلى كۇشتەردىڭ جوعارعى باس قولباسشىسى نۇرسۇلتان ءابىش ۇلى نازارباەۆتىڭ 2014 جىلعى 19 ناۋرىزداعى وتان قورعاۋشىلار كۇنىن مەرەكەلەۋ جونىندەگى № 1362 نۇسقاۋى بويىنشا استانا قالاسىندا اسكەري پاراد وتكىزىلەدى. اسكەري پاراد 2014 جىلعى 7 مامىردا استانا قالاسىنداعى «قازاق ەلى» الاڭىندا وتەدى. پارادقا قورعانىس مينيسترلىگىنىڭ, ىشكى ىستەر مينيسترلىگىنىڭ, توتەنشە جاعدايلار مينيسترلىگىنىڭ, ۇلتتىق قاۋىپسىزدىك كوميتەتى شەكارا قىزمەتىنىڭ جانە رەسپۋبليكالىق ۇلاننىڭ پارادتىق ەسەپتوپتارى, سونداي-اق, قورعانىس مينيسترلىگىنىڭ, ىشكى ىستەر مينيسترلىگى مەن توتەنشە جاعدايلار مينيسترلىگىنىڭ اسكەري تەحنيكالارى مەن اۆياتسياسى تارتىلادى. اسكەري پارادتىڭ سالتاناتتى مارشىنىڭ جاياۋ لەگىنە 2 مىڭعا جۋىق اسكەري قىزمەتشى, ونىڭ ىشىندە قازاقستان رەسپۋبليكاسى قارۋلى كۇشتەرىنىڭ جەكە قۇرامىنان 1500 ادام قاتىسادى. مەحانيكالاندىرىلعان كولونناداعى اسكەري تەحنيكا سانى 250 بىرلىكتى جانە جەكە قۇرامدا 566 ادامدى قۇرايدى (مەحانيك-جۇرگىزۋشىلەر, ەكيپاجدار, دەسانتتار). سونداي-اق, پارادقا 56-عا جۋىق ۇشۋ اپپاراتتارى قاتىستىرىلادى. 2014 جىلعى 14 ساۋىردەن باستاپ پاراد ەسەپتوپتارى مەن مەحانيكالاندىرىلعان كولوننالاردىڭ جاتتىعۋلارى كۇن سايىن وتكىزىلەتىن بولادى. ەلدىك رۋحتى كوتەرەتىن مۇنداي شارالار جاستاردىڭ بويىندا پاتريوتتىق سەزىم قالىپتاستىرىپ, وتانسۇيگىشتىككە تاربيەلەيتىنى ايتپاسا دا تۇسىنىكتى. سوندىقتان دا اسكەري پاراد اسكەريلەر تاراپىنان دا جوعارى جاۋاپكەرشىلىكتى, العا قويعان ماقساتتى ءبىر دەمدە ءبىر كىسىدەي اتقارىپ شىعۋدى تالاپ ەتەدى. جاتتىعۋلاردى پارادقا دەيىن كۇن سايىن وتكىزۋ قاجەتتىلىگى دە الداعى مىندەت ۇدەسىنەن كورىنۋدى دىتتەيدى. ءىس-شارا قورعانىس مينيسترلىگىنە قاراستىرىلعان 2014 جىلعى بيۋدجەتتىك باعدارلامانىڭ اقشالاي قاراجاتى كولەمىندە قامتاماسىز ەتىلەدى, دەپ حابارلادى قازاقستان رەسپۋبليكاسى قورعانىس مينيسترلىگىنىڭ ءباسپاسوز قىزمەتى. ----------------------------------------- سۋرەتتى تۇسىرگەن ەرلان وماروۆ.
