سالتاناتتى ءىس-شاراعا پەدياتريا ورتالىعىنىڭ باسشىلىعى مەن ۇجىمى, ارىپتەستەرى مەن ۇرپاقتارى قاتىستى.
قۇرمەت بەلگىسىنىڭ ءدال وسى حيرۋرگيا بولىمىندە ورنالاسۋى تەگىن ەمەس. ويتكەنى نۇرلان نۇركين ۇلى ءبولىم اشىلعان 1994 جىلدان بەرى حيرۋرگيا ءبولىمىن ابىرويمەن باسقارىپ كەلدى. سودان بەرى تابان اۋدارماي وسى بولىمدە 28 جىل قىزمەت ەتتى. اكادەميك كامال ءسارۋار ۇلى نۇرلان نۇركين ۇلىنىڭ ءبولىم باسشىسى ەتىپ ءوزى تاعايىنداعان بولاتىن.
سالتاناتتى شارانىڭ اشىلۋىندا پەدياتريا جانە بالالار حيرۋرگياسى عىلىمي ورتالىعىنىڭ باسشىسى ريزا بورانباەۆا: «نۇرلان نۇركين ۇلى حيرۋرگيا ءبولىمىنىڭ العاشقى ۇجىمىن ءوزى قۇرىپ, ورتالىقتا بالالار حيرۋرگياسى سالاسىن دامىتۋعا زور ۇلەس قوستى. ول 10 مىڭنان اسا وپەراتسيا جاساپ, مىڭداعان بالانىڭ ءومىرىن الىپ قالدى. نۇرلان نۇركين ۇلى ەڭ اۋىر, كۇردەلى دەگەن وپەراتسيالاردى جاسادى. ونىڭ ەسىمىن بۇكىل قازاق ەلى بىلەدى. دارىگەردى ەلىمىزدىڭ ءار ايماعىنان ارنايى ىزدەپ كەلەتىن. نۇرلان نۇركين ۇلى بالالاردى ەمدەۋمەن قاتار, ءبىلىم مەن عىلىمعا ەرەكشە نازار اۋداردى. عىلىم رەيتينگىسى بويىنشا حيرۋرگيا ءبولىمى ۇزاق جىلداردان بەرى تەك ءبىرىنشى ورىندا تۇردى. ول جاڭا عىلىمي تىڭ يدەيالاردىڭ گەنەراتورى, جاڭاشىلدىققا ۇمتىلعان جارقىن دا دارىندى تۇلعا بولدى. ول بىرنەشە بۋىن بىلىكتى حيرۋرگتاردى, مىقتى مامانداردى تاربيەلەپ شىعاردى. ونىڭ كوپشىلىگى بۇگىندە جوعارى باسشىلىق لاۋازىمدا قىزمەت ەتەدى. ورتالىقتا نۇرلان احپاروۆ مەكتەبىنىڭ نەگىزى قالانعان ەدى. ال 22 ءساۋىر كۇنى نۇرلان نۇركين ۇلىن ەسكە الۋ قۇرمەتىنە ارنالعان «جاس زەرتتەۋشى: زاماناۋي پەدياتريا جانە بالالار حيرۋرگياسى دامۋىنىڭ سىن-تەگەۋرىنى مەن كەلەشەگى» اتتى جاس عالىمداردىڭ حالىقارالىق عىلىمي-تاجىريبەلىك كونفەرەنتسياسى ءوتتى. وعان رەسەي, ازەربايجان, وزبەكستان, قىرعىزستان جانە ەلىمىزدىڭ ءار ايماعىنان جاس حيرۋرگتار كەلەدى», دەپ اتاپ ءوتتى.
شارا بارىسىندا كوپ جىل بىرگە قىزمەتتەس بولعان ارىپتەستەرى مەن شاكىرتتەرى ءوز ەستەلىكتەرىمەن ءبولىستى.
«نۇرلان نۇركين ۇلىمەن ءبىز 30 جىلدان اسا بىرگە قىزمەت ەتتىك. مەن عىلىم بويىنشا ديرەكتور ورىنباسارى قىزمەتىن اتقارعان جىلدارى ول كانديداتتىق جانە دوكتورلىق ديسسەرتاتسياسىن قورعادى. بۇكىل زەرتتەۋلەر مەن وپەراتسيالاردى ءوزى جاسادى. نۇرلان نۇركين ۇلىنىڭ ارقاسىندا حيرۋرگيا ءبولىمى بەدەلدى بولىمگە اينالدى. ول وتە جاۋاپكەرشىلىگى مول, ءوز ىسىنە ادال, كوڭىلى دارحان, جۇرەگى تازا, كەڭ پەيىلدى جان ەدى. تاربيەسى مەن مادەنيەتتىلىگىنىڭ ارقاسىندا دارىگەرلەردىڭ اعا بۋىنىنا دا, جاس بۋىنعا دا ەرەكشە قۇرمەتپەن, ىلتيپاتپەن قارايتىن. ءوزىنىڭ بار بىلگەنىن جاستارعا ۇيرەتۋدەن جالىقپايتىن. بۇگىندە ونىڭ شاكىرتتەرى ول بىلەتىن بارلىق حيرۋرگيالىق ەم-دومداردى مەڭگەرگەن. ول اكادەميك كامال ءسارۋار ۇلىنىڭ سۇيىكتى شاكىرتى ەدى. نۇرلان نۇركين ۇلى ماعان باۋىرىمداي بولدى, ۇنەمى قامقورلىعىن, قۇرمەتىن كورسەتىپ جۇرەتىن», دەپ ەسكە الدى پەدياتريا ورتالىعىنىڭ پروفەسسورى, ونكوگەماتولوگ دارىگەر كۋليان وماروۆا.
ءوز كەزەگىندە نۇرلان نۇركين ۇلىنىڭ جۇبايى مەن ۇرپاقتارى جىلى لەبىزدەر مەن كورسەتىلىپ جاتقان قۇرمەت ءۇشىن, شارا ۇيىمداستىرۋشىلارى مەن ورتالىق باسشىلىعىنا شەكسىز ريزاشىلىقتارىن ءبىلدىردى.
بار عۇمىرىن بالالار ساۋلىعىنا ارناپ, بار كۇش-قايراتىن ماماندار دايىنداۋعا, عىلىمعا جۇمساپ, جانكەشتى ەڭبەك ەتكەن ءبىرتۋار تۇلعانىڭ باعالانعانى ورىندى. بۇگىنگى ەسكەرتكىش تاقتانىڭ اشىلۋى نۇرلان نۇركين ۇلىن وتاندىق عىلىم مەن بىلىمگە, مەديتسينا سالاسىنا قوسقان زور ۇلەسىنە دەگەن قۇرمەتتىڭ ايقىن كورىنىسى.
