قازاقستان ديپلوماتياسىنىڭ 30 جىلدىعىنا ارنالعان كونفەرەنتسيا ءوتتى

اۋقىمدى شارا قازاقستاننىڭ سىرتقى ساياساتىنداعى نەگىزگى باعىتتارىن عىلىمي تۇرعىدان تالداۋ جانە تالقىلاۋمەن قاتار ەلىمىزدىڭ حالىقارالىق قاتىناستارداعى ءرولى، قاۋىپسىزدىك جۇيەسى، ينتەگراتسيالىق قۇرىلىمدار، ەكونوميكالىق جانە وركەنيەتتەگى ورنىن ايقىنداۋعا باعىتتالعان.

ءال-فارابي اتىنداعى قازۇۋ-دىڭ باسقارما توراعاسى – رەكتورى جانسەيىت تۇيمەباەۆ جيىلعاندارعا ارنايى قۇتتىقتاۋ جولدادى.

«تاۋەلسىزدىك جىلدارىندا قازاقستان كوپۆەكتورلى قاعيدات، پراگماتيزم جانە ۇلتتىق مۇددەلەرگە نەگىزدەلگەن سىرتقى ساياساتتىڭ ءتيىمدى مودەلىن قۇرۋعا قول جەتكىزدى. بۇگىنگى تاڭدا قازاقستان الەمنىڭ 186 ەلىمەن ديپلوماتيالىق قارىم-قاتىناس ورناتقان. نەگىزگى شەتەلدىك سەرىكتەستەرمەن ىنتىماقتاستىق ارتۋدا. ورتالىق ازيا ەلدەرىمەن ديالوگ جاندانا ءتۇستى. حالىقارالىق قاۋىپسىزدىك ماسەلەلەرىنە ءجىتى نازار اۋدارىلۋدا. بارشاڭىزدى قازاقستان ديپلوماتياسىنىڭ مەرەيتويىمەن قۇتتىقتايمىن جانە جەمىستى جۇمىس تىلەيمىن!»، دەدى ۋنيۆەرسيتەت باسشىسى.

سىرتقى ىستەر مينيسترلىگىنىڭ الماتى قالاسىنداعى وكىلدىگى باسشىسىنىڭ ورىنباسارى رۋسلان قارابۋلوۆ ءوز سوزىندە قازۇۋ باسشىلىعىنا تۇراقتى ىنتىماقتاستىعى جانە سىرتقى ساياسات ۆەدومستۆوسى ءۇشىن كادرلار دايارلاۋعا الما-ماتەردىڭ قوسقان ەرەكشە ۇلەسى ءۇشىن العىسىن جەتكىزدى.

«قازاقستان-ينۆەستيتسيا تارتۋ، ەكونوميكا كولەمى بويىنشا ورتالىق ازيا ءوڭىرىنىڭ ءابسوليۋتتى كوشباسشىسى، – دەپ اتاپ ءوتتى سپيكەر. – ءبىزدىڭ ەلىمىز ەۋرازيالىق كەڭىستىكتەگى ينتەگراتسيالىق ۇدەرىستەردىڭ لوكوموتيۆى بولىپ تابىلادى، كوپتەگەن حالىقارالىق ۇيىمدارعا توراعالىق ەتتى، 2010 جىلى ەقىۇ ءسامميتىن قابىلدادى، بۇۇ باس اسسامبلەياسىنىڭ يادرولىق قارۋدان ازات الەم قۇرۋ تۋرالى جالپىعا ورتاق دەكلاراتسيانى قابىلداۋىنا باستاماشىلىق ەتتى. بۇگىندە قازاقستاندى حالىقارالىق قوعامداستىق ديپلوماتيالىق قىزمەت ارداگەرلەرىنىڭ كۇش-جىگەرىنىڭ ارقاسىندا كوبىنەسە بولجاناتىن جانە سەنىمدى سەرىكتەس رەتىندە قابىلدايدى.

جيىندا ءسوز العان بۇۇ-نىڭ قازاقستان رەسپۋبليكاسىنداعى تۇراقتى ۇيلەستىرۋشىسى ميكاەلا فريبەرگ-ستوري جارقىن بولاشاق قۇراتىن جاستاردى قالىپتاستىرۋ بۇۇ ميسسياسىنىڭ نەگىزى ەكەنىن ەسكە سالدى.  وسى ورايدا قازۇۋ-دا اتقارىلعان جۇمىستاردى جوعارى باعالاپ، «بۇۇ-نىڭ تۇراقتى دامۋ بويىنشا جاھاندىق حابى رەتىندە سىزدەر ستۋدەنتتەرگە ءوز ماقساتىنا جەتۋدە ۇلكەن كومەك جاساۋداسىزدار. بۇل قازاقستاننىڭ جانە ءوڭىردىڭ ودان ءارى دامۋىنا ىقپال ەتەدى»، دەپ اتاپ ءوتتى. ساراپشىنىڭ ايتۋىنشا، جاھاندىق پاندەميا جانە گەوساياسي جاعدايلار ەۋروپانى ءىى دۇنيەجۇزىلىك سوعىستان بەرى بولماعان ەميگرانتتار داعدارىسىنا الىپ كەلدى. قازىر بۇكىل الەمدە لوگيستيكا سالاسى زارداپ شەكتى، ترانسپورت، ەنەرگيا جانە ماڭىزدى ءارى قاجەتتى زاتتاردىڭ باعاسى كۇرت كوتەرىلدى. بۇگىندە تۇراقتى دامۋ ماقساتتارىن جۇزەگە اسىرۋ تىپتەن قيىن بولىپ وتىر. بىراق ءبىز وزىمىزگە قاجەتتى جارقىن بولاشاققا ۇمتىلۋىمىز قاجەت جانە ول ءۇشىن ءبىزدىڭ بارلىعىمىزعا ءبىلىم جانە جاڭا يدەيالار قاجەت.

پلەنارلىق وتىرىستا قازاقستان رەسپۋبليكاسىنىڭ امەريكا قۇراما شتاتتارىنداعى توتەنشە جانە وكىلەتتى ەلشىسى ەرجان اشىقباەۆ، ەۋروپالىق وداقتىڭ قازاقستانداعى ەلشىسى كەستۋتيس يانكاۋسكاس، قىتاي حالىق رەسپۋبليكاسىنىڭ الماتىداعى باس كونسۋلى تسزيان ۆەي، فرانتسۋز رەسپۋبليكاسىنىڭ قازاقستان رەسپۋبليكاسىنداعى باس كونسۋلى الەكسيس شاحتاحتينسكي، پرەزيدەنت جانىنداعى قازاقستاندىق ستراتەگيالىق زەرتتەۋلەر ينستيتۋتىنىڭ ديرەكتورى ەركىن تۇقىموۆ ءسوز سويلەپ، پىكىر ءبولىستى.