«كەشەگى ءورت فاكتىسى بويىنشا ماتەريالدار ازىرگە تەكسەرىلىپ جاتىر. ءورتتىڭ الدىن-الا سەبەبى - ەلەكتر قۇرالدارىن, ياعني ستاندارتقا ساي كەلمەيتىن ەلەكتر ۇزارتقىشتارىن پايدالانۋ كەزىندە ءورت قاۋىپسىزدىگى ەرەجەلەرىنىڭ بۇزىلۋى. بۇل الدىن-الا بولجام عانا. اتالعان ءورت فاكتىسى بويىنشا قىلمىستىق ءىس قوزعالدى», دەدى ە. تورەگەلديەۆ ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا.
رەسپۋبليكانىڭ بارلىق مەكتەپتەرىن تەكسەرۋ جونىندە سپيكەر جوسپاردان تىس تەكسەرۋ جوسپارلانباعانىن اتاپ ءوتتى. ويتكەنى سىن-قاتەر دارەجەسىن باعالاۋ كريتەريلەرىنە سايكەس, بارلىق ءبىلىم بەرۋ نىساندارى اقپان-مامىر ارالىعىندا تەكسەرىلەدى.
«قازىرگى ۋاقىتتا بارلىق ءبىلىم بەرۋ نىساندارىنىڭ اۋماعىنا, قاباتىنا قاراماستان جوسپارلى تەكسەرۋلەر ءجۇرىپ جاتىر. ياعني بارلىق وبەكتىلەر جوعارى سىن-قاتەر دارەجەسىنە جاتادى, سوندىقتان ولار ءجيى تەكسەرىلەدى. ءبىرىنشى جارتىجىلدىققا شامامەن 8 مىڭ نىسان جوسپارلانعان, ولاردىڭ جارتىسىنان كوبى تەكسەرىلدى. مامىر ايىنىڭ سوڭى مەن ماۋسىمنىڭ باسىندا بارلىق تەكسەرۋلەردىڭ ناتيجەسى حالىققا جەتكىزىلەدى دەپ ايتۋعا بولادى», دەدى تجم وكىلى.
دەگەنمەن باسقارما باسشىسى ءورت قاۋىپسىزدىگى تالاپتارىن بۇزۋشىلىقتار بار ەكەنىن جەتكىزدى.
«بىراق بۇل ادەتتە ستاندارتتى بۇزۋشىلىقتار - ەۆاكۋاتسيالىق شىعۋ جولدارىنىڭ جابىلۋى, جولداردىڭ بىتەلۋى, اقاۋلى ەلەكتر جابدىقتارى جانە باسقالارى. انىقتالعان بۇزۋشىلىقتار بويىنشا ءبىلىم بەرۋ نىساندارىنىڭ باسشىلارىنا نۇسقاما بەرىلەدى, ولاردى جويۋ مەرزىمدەرى بەكىتىلەدى, ولاردى ورىنداماعانى ءۇشىن جاۋاپكەرشىلىك كورسەتىلەدى. وقۋ جىلىنىڭ باستالۋىنا دەيىن ۇيعارىم العان بارلىق ءبىلىم بەرۋ نىساندارى باقىلانادى», دەدى ە. تورەگەلديەۆ.
ەسكە سالا كەتسەك, بۇگىن تاڭەرتەڭ پاۆلودارداعى №28 مەكتەپتىڭ 200 شارشى مەتر اۋماعى ورتەنىپ كەتتى. مەكتەپتەن 576 ادام, ونىڭ ىشىندە 551 بالا ەۆاكۋاتسيالاندى.
