جوعارىداعى جاڭالىقتان قۇلاعدار بولعان جانكۇيەرلەردىڭ كوڭىلدەرى جاي تاپقانداي بولدى. ويتكەنى كەلەسى ايدا فينليانديادا الەم چەمپيوناتىنىڭ جالاۋى جەلبىرەيدى. اتالعان جارىستا قازاقستان قۇراماسى دا ونەر كورسەتەدى. ال ءبىزدىڭ ۇلتتىق كوماندامىزدىڭ دەنىن ءدال سول «بارىستىڭ» ويىنشىلارى قۇرايتىنى ءمالىم. ەگەر تورتكۇل دۇنيەنىڭ كىل مىقتىلارى باس قوسقان بايراقتى باسەكەگە حوككەيشىلەرىمىز الاي-دۇلەي كوڭىلمەن اتتانسا, وندا ولاردان وڭدى ناتيجە كۇتۋ قيىن.
13-29 مامىر ارالىعىندا سۋومي ەلىندە وتەتىن جارىستا جەرلەستەرىمىز كوڭىل كونشىتەرلىك ناتيجەگە قول جەتكىزەدى دەگەن ءۇمىت تە جوق ەمەس. ولاي دەۋگە نەگىز, ەليتالىق ديۆيزيونداعى دوداعا ءبىز بۇعان دەيىن دە سان مارتە قاتىستىق. جاسىراتىنى جوق, بۇل باسەكەلەردە تابىستى ونەر كورسەتە المادىق. كۇنى كەشەگە دەيىن ەڭ ۇزدىك كورسەتكىشىمىز 12-ورىن ەدى. 2005 جىلى اۋستريادا وتكەن باسەكەدە وتانداستارىمىز سول مەجەدەن كورىندى. قالعان جارىستاردىڭ كوبىندە كوش سوڭىندا قالىپ قويدىق. ايتەۋىر, كوڭىلگە ءبىر مەدەت بولار جايت, كەيبىر ازۋلى كوماندالارعا لايىقتى قارسىلىق كورسەتىپ, ۇلكەن تاجىريبە مەكتەبىنەن وتتىك.
ال بىلتىر لاتۆيادا شىمىلدىعى تۇرىلگەن ءدۇبىرلى دودادا قازاقستان قۇراماسى ءوز كورەرمەندەرىن قۋانتتى. جارىس بارىسىندا لاتۆيا (3:2) مەن فينليانديادان (2:1) بۋلليت سوعۋ بارىسىندا باسىم تۇسسەك, گەرمانيا (3:2) مەن يتاليانى (11:3) نەگىزگى ۋاقىتتا قاپى قالدىردىق. اسىرەسە اسا ازۋلى فيندەر مەن نەمىستەردى جەڭۋىمىز وتاندىق شايبالى حوككەيشىلەرىمىز ءۇشىن ايرىقشا وقيعا ەكەنىن ايتۋعا ءتيىسپىز. الايدا اقش (0:3), كانادا (2:4) جانە نورۆەگياعا (1:3) ەسە جىبەردىك. ناتيجەسىندە, جەتى كەزدەسۋدەن كەيىن 10 ۇپاي جيىپ, ءوز توبىمىزدا بەسىنشى ورىنعا تابان تىرەدىك. قورىتىندى ەسەپتە شۆەدتەرمەن بىرگە 9-10 ورىنداردى ءوزارا بولىستىك. ارينە, ازۋى التى قارىس امەريكالىقتار مەن كانادالىقتارعا ءالىمىزدىڭ جەتپەيتىنى بەسەنەدەن بەلگىلى. بىراق نورۆەگيالىقتاردى جەڭۋگە بولاتىن ەدى. سكانديناۆيالىقتاردى سان سوقتىرعانىمىزدا پلەي-وففقا جولداما الىپ, ۇزدىك سەگىز كوماندانىڭ ساناتىنا قوسىلاتىن ەدىك. بىراق بالتىق جاعالاۋىنداعى جارىستا ءبىزدىڭ جىگىتتەرگە بارماقتاي عانا باق جەتپەدى.
بيىلعى الەم چەمپيوناتىندا قازاقستان ا توبىندا ونەر كورسەتەدى. حەلسينكيدەگى قارسىلاستارىمىز – كانادا, گەرمانيا, شۆەيتساريا, سلوۆاكيا, دانيا, فرانتسيا جانە يتاليا قۇرامالارى. بۇل توپتىڭ باستى ءفاۆوريتى كانادالىقتار ەكەنى ءسوزسىز. وزگە تابىستارىن تىزبەكتەمەي-اق ۇيەڭكى جاپىراقتار ەلىنىڭ وكىلدەرى وليمپيا ويىندارىندا 9 مارتە توپ جارىپ, الەم چەمپيوناتىندا 27 رەت تەڭدەسسىز دەپ تانىلعانىن ايتساق تا جەتكىلىكتى. وتكەن عاسىردىڭ العاشقى جارتىسىندا وليمپيادا (2 رەت) جانە الەم (4 رەت) مەن ەۋروپا بىرىنشىلىكتەرىندە (9 رەت) جەڭىس تۇعىرىنا كوتەرىلگەن گەرمانيا قۇراماسىنىڭ داڭقى دۇركىرەپ تۇردى. كەيىننەن ولار قارقىنىن ءبىراز باسەڭدەتىپ العان ەدى. دەسەك تە, ۋاقىت وزا قايتا نامىسقا قامشى باسىپ, بيىك بەلەستەردى باعىندىرا باستادى. نەمىستەردىڭ 2018 جىلى پحەنچحان وليمپياداسىندا كۇمىس مەدالدى ولجالاۋى – جوعارىدا ايتىلعان ءسوزىمىزدىڭ ايقىن دالەلى.
شۆەيتساريانىڭ جاعدايى دا ءدال سولاي. 1922-1953 جىلدار ارالىعىندا وتكەن بايراقتى باسەكەلەردە ولار سان مارتە ۇزدىكتەر ساناتىنان كورىندى. اتاپ ايتساق, ەكى رەت وليمپيا ويىندارىندا, 9 رەت الەم جانە 5 رەت قۇرلىق بىرىنشىلىكتەرىندە ءتۇرلى-ءتۇستى مەدالداردى يەلەندى. ودان كەيىن قۇلدىراۋ كەزەڭىن باسىنان كەشىرىپ, ۇزاق ۋاقىت بويى ەڭسە تىكتەي المادى. تەك وسىدان 10-15 جىل بۇرىن عانا شۆەيتساريالىقتار اسا ءىرى حالىقارالىق جارىستاردا وڭ ناتيجە كورسەتە باستادى. ناتيجەسىندە, 2013 جانە 2018 جىلدارى ۇيىمداستىرىلعان الەم چەمپيوناتتارىندا كۇمىس مەدالدى قانجىعالارىنا بايلادى.
داڭقى الىسقا جايىلعان چەحيا حوككەيشىلەرىنىڭ كولەڭكەسىندە قالىپ قويماۋدى كوزدەگەن سلوۆاكيا قۇراماسىنىڭ دا قول جەتكىزگەن جەتىستىكتەرى جەتەرلىك. ولار 2002 جىلعى الەم چەمپيوندارى جانە دە ءدال سول جارىستا تاعى ءۇش رەت جۇلدەلى ورىنداردى ەنشىلەدى. بيىل سلوۆاكتار بەيجىڭ وليمپياداسىندا ءۇشىنشى ورىنعا تابان تىرەدى. مىنە, ا توبىنداعى الپاۋىتتار وسىلار. ال وزگە كوماندالارعا توقتالاتىن بولساق, ولاردىڭ ەڭ ۇزدىك ناتيجەلەرى تومەندەگىدەي:
دانيا قۇراماسى: وليمپيادا – 7 ورىن (2022 جىل, بەيجىڭ), الەم چەمپيوناتى – 8 ورىن (2010 جىل, 2016 جىل). فرانتسيا قۇراماسى: وليمپيادا – 5 ورىن (1928 جىل, شۆەيتساريا), الەم چەمپيوناتى (1930 جىل, 6 ورىن). يتاليا قۇراماسى: وليمپيادا – 7 ورىن (1956 جىل, كورتينا-د’امپەتستسو), الەم چەمپيوناتى – 4 ورىن (1953 جىل).
ۆ توبىندا فينليانديا, اقش, چەحيا, شۆەتسيا, لاتۆيا, نورۆەگيا, ۇلىبريتانيا جانە اۋستريا قۇرامالارى كۇش سىناسادى. ولار تامپەرەدە ونەر كورسەتەدى. بۇل كەزەڭدەگى باسەكەلەر 13-24 مامىر ارالىعىندا وتەدى. سودان كەيىن ءار توپتا العاشقى ءتورت ورىندى يەلەنگەن كوماندالار پلەي-وففقا جولداما الادى. 26 مامىردا شيرەك فينالدىق سايىستاردىڭ كۋاسى بولساق, اراعا ەكى كۇن سالىپ جارتىلاي فينالدى تاماشالايمىز. ال قولا مەدال ءۇشىن تارتىس پەن شەشۋشى سىن 29 مامىردا وتەدى دەپ بەلگىلەنۋدە.
قازاقستاننىڭ حوككەيشىلەرى فينليانديادا جالاۋى جەلبىرەيتىن جارىسقا دايىندىقتارىن نۇر-سۇلتانداعى «بارىس-ارەنادا» باستاۋدى ءجون كوردى. 3 مامىردا بالتىق جاعالاۋىنا اتتانىپ, لاتۆيانىڭ ريگا قالاسىندا وقۋ-جاتتىعۋ جيىنىن جالعاستىرادى. سول جاقتا ولار اتالعان مەملەكەتتىڭ ۇلتتىق قۇراماسىمەن ەكى جولداستىق كەزدەسۋ وتكىزۋدى جوسپارلاپ وتىر. ارادا ءبىر اپتا وتكەن سوڭ جەرلەستەرىمىز سۋومي ەلىنە ساپار شەگەدى. ال الەم چەمپيوناتىندا قازاق ەلى نامىسىن كىمدەر قورعايتىنى الداعى كۇندەرى بەلگىلى بولادى.
