جارىس كەستەسىنە ساي العاشقى كۇنى سايىستار 5 سالماقتا ءوتتى. چەمپيوناتتى بىردەن شيرەك فينالدان باستاعان جەرلەستەرىمىزدىڭ بارلىعى دا تۇساۋكەسەر كەزدەسۋلەرىندە جەڭىسكە جەتىپ, جۇلدەلى ورىندار ءۇشىن تالاسۋ مۇمكىندىگىنە يە بولدى. اتاپ ايتساق, تالاي بايراقتى باسەكەدە جۇلدە العان امانعالي بەكبولاتوۆ (55 كيلو) ۇندىستاندىق ارجۋن حالاكۋركيدىڭ تاس-تالقانىن شىعارىپ, جارتىلاي فينالدا موڭعوليالىق داۆااباندي مۇڭح-ەردەندى وڭاي ەڭسەردى. الەم چەمپيوناتىنىڭ ەكى دۇركىن جۇلدەگەرى, ازيا ويىندارىندا ءۇشىنشى ساتىعا جايعاسقان مەيرامبەك ايناعۇلوۆ (63 كيلو) سيريالىق احماد ءال-ناكداليدى سان سوقتىرسا, ىلە-شالا يراندىق يمان حوسسەين ءموحامماديدى باس كوتەرتپەي ۇتتى.
وسىدان 5 جىل بۇرىن ازيادا الدىنا جان سالماي, ودان بولەك ءدال سول جارىستا تاعى ءتورت رەت جۇلدەگەرلەر ساناتىنا قوسىلعان ماقسات ەرەجەپوۆ (77 كيلو) ءۇندىستان وكىلى ساجان ساجاندى ەش قينالماي ۇتقانىمەن, جاپونيالىق كوباي ساكۋراباعا قارسى سايىستا ءبىراز تەر توگۋىنە تۋرا كەلدى. وتانداسىمىز وتە شيەلەنىستى وتكەن كەزدەسۋدە ءبىر عانا ۇپاي ايىرماشىلىعىمەن جەڭىسكە جەتتى. الىپتارمەن ايقاسقان ءالىمحان سىزدىقوۆتىڭ دا (130 كيلو) قارقىنى قۋانتتى. وزىنەن الدەقايدا ەڭسەلى ءارى سالماقتارى دا زور قىرعىزستاندىق رومان كيم مەن جاپونيالىق اراتا سونونى ەداۋىر ۇپاي ايىرماشىلىعىمەن ۇتقان ول جانكۇيەرلەردىڭ قوشەمەتىنە بولەندى. وسىلايشا, ءتورت بالۋانىمىز شەشۋشى سىنعا جولداما السا, نۇرسۇلتان تۇرسىنوۆ (87 كيلو) جارتىلاي فينالدا پارسى ەلىنىڭ مىقتىسى ناسەر گاسەم اليزادەگە جول بەردى.
فينالدا امانعالي بەكبولاتوۆ (55 كيلو) جاپونيالىق يۋ.شيوتانيمەن بەلدەستى. كۇن- شىعىس ەلىنىڭ وكىلى بىلتىر الماتىدا وتكەن ازيا چەمپيوناتىندا الدىنا جان سالماعان ەدى. ۇلانباتىرداعى جارىسقا دا ول وتە تاماشا بابىندا كەلگەن ەكەن. بۇل باسەكەدە شيوتاني بەكبولاتوۆتى 13:2 ەسەبىمەن شاڭ قاپتىرىپ كەتتى. ەڭ جەڭىل سالماقتىڭ قولا مەدالى جاسۋربەك ورتىكباەۆ (وزبەكستان) پەن حيوكينجين جەونعا (وڭتۇستىك كورەيا) بۇيىردى.
مەيرامبەك ايناعۇلوۆ تىنار شارشەنبەكوۆپەن كەزدەستى. بۇل بالۋاننىڭ دا ەسىمى قازاق جانكۇيەرلەرىنە جاقسى تانىس. وسىدان ءۇش جىل بۇرىن قىرعىزستاننىڭ وكىلى نۇر-سۇلتانداعى الەمدىك دودانىڭ قولا مەدالى ءۇشىن بەلدەسۋىندە ءبىزدىڭ المات كەبىسباەۆتان ۇتىلعان ەدى. شارشەنبەكوۆكە قاراعاندا ايناعۇلوۆتىڭ اتاعى الدەقايدا زور. بىراق شەشۋشى سايىستا مەيرامبەك قەڭىنەن كوسىلە الماي, قارسىلاسىنا 0:5 ەسەبىمەن ەسە جىبەردى. 63 كيلو سالماقتا نەراج نەراج ء(ۇندىستان) بەن يمان حوسسەين موحاممادي (يران) ءۇشىنشى ورىندى يەلەندى.
77 كيلو سالماقتاعى ماقسات ەرەجەپوۆ تاعى ءبىر «ايىر قالپاقتى» اعايىنىمىز اكجول ماحمۋدوۆپەن كۇرەستى. 23 جاستاعى قىرعىز سپورتشىسىنىڭ اتاعى الىسقا جايىلعان. ول – توكيو وليمپياداسى مەن جاكارتاداعى ازيا ويىندارىنىڭ كۇمىس جۇلدەگەرى, 2018 جىلعى ازيا چەمپيونى. 23 ساۋىردە ماقسات 32 جاسقا تولعالى وتىر. شەشۋشى ايقاستا ماحمۋدوۆتىڭ مەرەيى ۇستەم بولدى. ەسەپ – 3:1. قولا مەدالدى كوباي ساكۋرابا (جاپونيا) مەن ارەف مۋزافار حابيبوللاحي (يران) ەنشىلەدى.
فينالدا ءۇش بالۋانىمىز دا ساتسىزدىككە ۇشىراعان سوڭ ءالىمحان سىزدىقوۆتىڭ جولىنا زور ۇمىتپەن قارادىق. ونىڭ قارسىلاسى دا تىم ازۋلى ەدى. كيم مەنسوك توكيو وليمپياداسىنان قۇرالاقان ورالعانىمەن, ەسەسىنە ودان باسقا دا كوپتەگەن جارىستا بۇل ءاپايتوستىڭ اتوي سالعانىن جانكۇيەرلەر جاقسى بىلەدى. اتاپ ايتساق, وڭتۇستىك كورەيانىڭ وعلانى 2018 جىلعى الەم چەمپيوناتىندا كۇمىس مەدالدى موينىنا ءىلدى, ەكى رەت قۇرلىق بىرىنشىلىگىندە جۇلدەگەرلەر ساناتىنا قوسىلىپ, ازيا ويىندارىندا ءۇشىنشى تۇعىرعا تابان تىرەدى. دەسەك تە, اتاقتى قارسىلاسىنان ەش قايمىقپاعان قازاقتىڭ نار تۇلعالى جىگىتى باسەكە باستالعان بەتتە ونى ءارى دە, بەرى دە لاقتىرىپ, ايقىن جەڭىسكە قول جەتكىزدى. ءالىمحان – ازيا چەمپيونى! ال مۋمينجون ابدوللاەۆ (وزبەكستان) پەن رومان كيم (قىرعىزستان) ءۇشىنشى ورىندى يەلەندى.
87 كيلو سالماقتاعى نۇرسۇلتان تۇرسىنوۆ قولا مەدال ءۇشىن باسەكەدە مەلس ايتبەكوۆپەن ايقاستى. ءبىرىنشى كەزەڭدە قىرعىزدى بوزكىلەمدە شىر اينالدىرىپ, ەداۋىر ۇپاي قورىن جيعان قانداسىمىز ودان كەيىن دە وتە ساۋاتتى قورعانىپ, جەڭىس تۇعىرىنا كوتەرىلدى – 8:2. ەكىنشى قولانى كۋمار سۋنيل ء(ۇندىستان) يەمدەندى. ال ناسەر گاسەم اليزادە (يران) مەن جالعاسباي بەردىمۇراتوۆتىڭ (وزبەكستان) اراسىندا وتكەن شەشۋشى سىن العاشقىسىنىڭ پايداسىنا شەشىلدى.
ءتۇيىن: وسىلايشا, ازيا چەمپيوناتىنىڭ العاشقى كۇنىن قازاقستاننىڭ گرەك-ريم كۇرەسى شەبەرلەرى 1 التىن, 3 كۇمىس جانە 1 قولا مەدالمەن قورىتىندىلادى. ياعني بوزكىلەمگە شىققان بەس بالۋانىمىز دا جۇلدە الدى. الايدا ءدال قازىر قازاق جانكۇيەرلەرىن التىن مەدالدىڭ ازدىعى الاڭداتىپ وتىر. ال ونسىز جالپىكوماندالىق ەسەپتە ۇزدىكتەر قاتارىنان كورىنۋ قيىنعا سوعاتىنى انىق. ولاي بولسا, ەكىنشى كۇنى ونەر كورسەتەتىن بەس جىگىتىمىز سول ولقىلىقتىڭ ورنىن تولتىرادى دەگەن ويدامىز.
