19-شى جازعى گيمنازيادا فرانتسيادا (نورمانديا) بيىل 14-22 مامىر ارالىعىندا وتەدى. 20 سپورت تۇرىنەن سايىستار 9 قالادا وتكىزىلەدى: كان, دوۆيل, ەكۋۆ, گرانۆيل, گاۆر, مونتيۆيلە, پون-ودەمەر, رۋان, ۆال-دە-رەي. 70 ەلدەن 3 500 وقۋشى باق سىنايدى. ايتا كەتەيىك, قازاقستان بۇل بايقاۋعا العاش رەت قاتىسادى.
قازاقستان پاراليمپيادالىق سپورت تۇرلەرى مەن برەيك-دانس / بي سپورتىنان باسقا سپورت تۇرلەرىنە قاتىسادى. قازاقستاندىق دەلەگاتسيانى ءبىلىم جانە عىلىم مينيسترلىگىنىڭ ۇلتتىق عىلىمي-پراكتيكالىق دەنە تاربيەسى ورتالىعى باستاپ بارادى. دەلەگاتسيانىڭ قۇرامىندا 294 ادام بار, قاتىسۋشىلار سانى بويىنشا ەل قۇراماسى فرانتسيا مەن برازيليادان كەيىنگى 3-ورىندا. گيمنازيادا باعدارلاماسى ساداق اتۋ, كوركەم گيمناستيكا, جەڭىل اتلەتيكا, بادمينتون, 3ح3 باسكەتبول, جاعاجاي ۆولەيبولى, بوكس, بي سپورتى / برەيك-دانس, سەمسەرلەسۋ, دزيۋدو, سپورتتىق باعدارلاۋ, ىرعاقتى گيمناستيكا, رەگبي-7, ءجۇزۋ, ۇستەل تەننيسى, تحەكۆوندو, كۇرەس, پاراليمپيادالىق: جەڭىل اتلەتيكا, دزيۋدو, ءجۇزۋ سپورتىنان تۇرادى. حالىقارالىق جوبا دۇنيەجۇزىلىك ونلاين-پلاتفورمالاردا كورسەتىلەدى.
گيمنازيادا وتەتىن نورمانديا – فرانتسياداعى ەڭ تانىمال اۋماقتاردىڭ ءبىرى. بۇل ايماق ءوزىنىڭ تاريحىمەن, ءارتۇرلى قالالارداعى مادەني ەسكەرتكىشتەرىمەن, سونىمەن قاتار سپورتقا دەگەن ايرىقشا كوزقاراسىمەن ايگىلى. حالقىنىڭ تورتتەن ءبىر بولىگى 20 جاسقا تولماعان جاسوسپىرىمدەر, ياعني بۇل ءوڭىر جاستارعا باعىتتالعان. ءارتۇرلى سپورت ءتۇرى بويىنشا 7 880 سپورت كلۋبىندا 730 مىڭنان استام سپورتشىسى بار نورمانديا – ۇلتتىق جانە حالىقارالىق سپورتتىق ءىس-شارالار ءجيى وتكىزىلەتىن وتە بەلسەندى سپورتتىق ايماق. نورمانديانىڭ اۋىلدىق جەرلەرى تەڭىز جاعالاۋىندا ورنالاسقان.
بۇكىل الەمنىڭ جاس سپورتشىلارىنىڭ قاتىسۋىمەن وتەتىن ەڭ بەدەلدى حالىقارالىق مۋلتيسپورتتىق ءىس-شارادا قازاقستاندىق وقۋشىلار ەلىمىزدىڭ نامىسىن قورعاپ, الەمنىڭ تۇكپىر-تۇكپىرىنەن كەلگەن وقۋشىلار اراسىنان دوستار تابۋعا, الەمدى ساياحاتتاۋعا مۇمكىندىك الادى. ەل ءۇمىتىن ارقالاعان جاس سپورتشىلارعا ساتتىلىك سەرىك بولسىن.
13 مامىر كۇنى حالىقارالىق ن.نازارباەۆ اۋەجايىندا ءبىلىم جانە عىلىم ءمينيسترىنىڭ قاتىسۋىمەن سپورتشىلاردى شىعارىپ سالۋ ءراسىمى وتەدى.
