ءوزىن «بانك مەنەدجەرى» رەتىندە تانىستىرعان ەر ادام ايەلگە قوڭىراۋ شالىپ, بىرەۋ ونىڭ اتىنا نەسيە الۋعا ءوتىنىش بەرىپ جاتقانىن ايتتى. پەتروپاۆل تۇرعىنى بۇل اقپاراتتى راستامادى. سودان كەيىن ەر ادام وعان «قاۋىپسىزدىك قىزمەتكەرى» حابارلاساتىنىن ەسكەرتتى.
ەكىنشى قوڭىراۋ WhatsApp-تان تۇسكەن. جابىرلەنۋشىگە ەسەپشوتىنا قاتىستى قولسۇعۋشىلىقتى بولدىرماۋ ءۇشىن ءىرى سومادا نەسيە الىپ, ول اقشانى قوسالقى شوتقا جىبەرۋ ىڭعايلى بولادى دەپ سەندىرگەن.
«الاياق بانك قاۋىپسىزدىگى قىزمەتى تەرگەۋ جۇرگىزىپ جاتىر دەپ ايتقان, سوندىقتان بانككە بارعاندا, «قىلمىسكەرلەردى ۇركىتىپ الماۋ ءۇشىن» ەشكىمگە ەشتەڭە ايتپاۋ قاجەتتىگىن ەسكەرتكەن. قالا تۇرعىنى بانككە بارىپ, 4,5 ميلليون تەڭگەگە نەسيە رەسىمدەگەن جانە ءوزىنىڭ جيناعان قاراجاتىن قوسىپ, قىلمىسكەرلەر ايتقان شوتقا اۋدارعان. بۇدان كەيىن الاياق ايەلدى ەكىنشى بانككە بارىپ ءوز اتىنان تاعى ءبىر نەسيە رەسىمدەۋگە كوندىرگەن. ايەل ول اقشانى دا «ارنايى ەسەپشوتقا» سالدىرعان», دەپ ءتۇسىندىردى سقو پوليتسيا دەپارتامەنتى كريمينالدىق پوليتسيا باسقارماسىنىڭ باستىعى مارات جۇماليەۆ.
تەك بىرنەشە كۇننەن كەيىن عانا پەتروپاۆل تۇرعىنى الاياقتارعا الدانعانىن ءتۇسىنىپ, پوليتسياعا جۇگىنگەن.
«اتالعان دەرەك قىلمىستىق كودەكستىڭ «الاياقتىق» بابى بويىنشا سوتقا دەيىنگى تەرگەپ-تەكسەرۋدىڭ بىرىڭعاي تىزىلىمىنە ەنگىزىلدى. جالپى شىعىن - 10 ملن تەڭگەگە جۋىق. ادامداردى قانداي جاعداي بولماسىن, بانكتەن شالىناتىن قوڭىراۋلارعا سەنبەۋگە شاقىرامىز. ەگەر قاراجاتىڭىزدىڭ ساقتىعىنا قاتىستى كۇمان بولسا, بانككە بارىپ, سول جەردە انىقتاڭىزدار», دەيدى م. جۇماليەۆ.
