دەگەنمەن ەكى مىڭ جىلدان استام تاريحى بار كونە شاھاردا شەشىمىن كۇتكەن ماسەلە دە جەتەرلىك. ماسەلەن, ورتالىقتان شالعاي جاتقان ء«شولدالا», «قۇمشاعال» تۇرعىن ءۇي الاپتارىن اۋىزسۋمەن قامتۋ ءالى كۇنگە دەيىن وزەكتى. سول سياقتى شەتكى ساياجايلارعا سۋ قۇبىرى تارتىلماعان سوڭ, اسفالت سالۋ دا مۇمكىن بولماي وتىر. سونىمەن قاتار قازىر قالا ىشىندەگى باعدارشامداردىڭ جاعدايى مۇشكىل. جەل تۇرسا بولدى, جالپ ەتىپ ءوشىپ قالادى. ودان كەيىن قالا كوشەلەرىندە ۇزىن-سونار كەپتەلىس باستالىپ, ءتىپتى جولاۋشىلاردىڭ ومىرىنە قاۋىپ تونەتىن جاعدايلار ءجيى كەزدەسەدى. سونداي-اق تۇرعىنداردىڭ دەنى قالا كوشەلەرىنىڭ توزعانىن, سالىنعان بالالار ويىن الاڭقايلارىنىڭ تالاپقا ساي ەمەس ەكەنىن جانە وزگە دە الەۋمەتتىك ماسەلەلەردى ءجيى كوتەرەدى. بيىل دا 716 كوپقاباتتى تۇرعىن ۇيگە جوندەۋ جۇمىستارىن جۇرگىزۋ قاجەت ەكەن. ارينە, بۇل ايتىلعاندار قالاداعى ماسەلەلەردىڭ ءبىر بولىگى عانا.
تاراز قالاسىنداعى كۇردەلى ماسەلەنىڭ ءبىرى – تۇرعىن ءۇي ماسەلەسى. جىل سايىن مەملەكەت كومەگىنىڭ ناتيجەسىندە جۇزدەگەن ادام باسپانالى بولسا دا, بۇل ماسەلە وزەكتى كۇيىندە قالىپ تۇر. بۇگىنگى تاڭدا قالا بويىنشا 20 مىڭنان استام ادام تۇرعىن ءۇي كەزەگىندە, 60 مىڭنان استام تۇرعىن جەر تەلىمىنىڭ كەزەگىندە تۇر. بىلتىر 1 460 ادامعا جەر تەلىمى بەرىلگەن. بىراق بيىل بۇل جۇمىس باياۋ جۇرگىزىلۋدە. جامبىل وبلىسىنىڭ اكىمى نۇرجان نۇرجىگىتوۆ جۇيەسىز جۇمىستاردى سىنعا العان بولاتىن. وبلىس باسشىسى تاراز قالاسىنىڭ دامۋى جونىندە جيىن وتكىزگەندە, جەرگىلىكتى شەنەۋنىكتەر وعان دايىن بولماي شىقتى. بىرقاتار باسشىلار قۇرعاق ءسوز بەن قاعاز بەتىنە تۇسكەن دەرەكتەردى وقۋمەن عانا شەكتەلدى. تاراز قالاسىندا قازىر 4 432 جۇمىسسىز تىركەلگەن. ال قالا اكىمىنىڭ ورىنباسارى باقداۋلەت ساريەۆتىڭ ايتۋىنشا, بيىل 1 024 ادام جۇمىسپەن قامتىلعان. ءبىر قاراعاندا قالادا جۇمىسسىزدىق ماسەلەسىمەن كۇرەس قىزۋ ءجۇرىپ جاتقان سياقتى. ال شىندىعىندا سولاي ما؟ بىراق وعان ن.نۇرجىگىتوۆ جىل باسىنان بەرى وسىنشا ادام جۇمىسپەن قامتىلسا, اينالاسى ءۇش-ءتورت جىلدىڭ ىشىندە جۇمىسسىزدىق ماسەلەسى مۇلدەم بولمايتىنىن, بۇلاي قاعاز جۇزىندە عانا جۇمىس ىستەۋدى قويۋ كەرەك ەكەنىن ايتتى. قاعازباستىلىق پەن قۇرعاق سانداردى «سويلەتۋدىڭ» قاراپايىم حالىققا كەرەگى جوق. ناقتى, ناتيجەلى جۇمىس بولماعان سوڭ, الگىندەي اكىمدەردىڭ سىرعىتپا جاۋابى جۇمىستى جۇيەگە تۇسىرمەيتىنى انىق.
قازىر تاراز قالاسىنداعى اۋماقتىق ينسپەكتورلاردىڭ دا جۇمىسى كوڭىل كونشىتپەيدى. ءار اۋماققا بەكىتىلگەن ينسپەكتورلار سول اۋماقتىڭ باسشىسى بولعاندىقتان, كۇردەلى ماسەلەلەردى نازارعا الىپ, شەشىلۋىنە اتسالىسۋ كەرەك. بىراق بۇگىندە بۇلاي بولماي تۇر. جيىندا №1 اۋماقتىڭ ينسپەكتورى ساعىندىق ۇسىپبەكوۆ, №4 اۋماقتىڭ ينسپەكتورى نۇرجان جۇماعۇلوۆ, №8 اۋماقتىڭ ينسپەكتورى بولات باۋدينوۆ جانە №10 اۋماقتىڭ ينسپەكتورى نۇرلان قاناتوۆ اتقارعان جۇمىستارىن بايانداعانىمەن, ولاردى وبلىس اكىمى سىنعا الدى. سەبەبى ينسپەكتورلار وزدەرى جۇمىس ىستەپ وتىرعان اۋماقتا قانداي ماسەلە بار ەكەنىن بىلمەيدى. وسى ۋاقىتقا دەيىن ماسەلە دە كوتەرمەگەن. ءبىر سوزبەن ايتقاندا, ەلدىڭ ىشىندە ءجۇرىپ, ماسەلەلەرىن تىڭداپ, ونى ءتيىستى ورىندارعا جەتكىزبەگەن. تەك جۇمىستى ءبولىم باسشىلارىنا سىلتەۋمەن كەلەدى. ال اۋماقتاردا قوردالانعان ماسەلە شاشەتەكتەن. ءتىپتى كوپتەگەن اۋماقتىڭ قوقىس ماسەلەسىنە دەيىن شەشىلمەگەن.
الدا تاراز قالاسىن جاڭاشا دامىتۋ جوسپارى تۇر. بۇل ءۇشىن كونە شاھاردىڭ باسشىلىعىنان باستاپ, اۋماقتىق ينسپەكتورلارىنا دەيىن سانعا ەمەس, ساپاعا جۇمىس ىستەۋى ماڭىزدى. حالىقتىڭ تالاپ-تىلەگى دە وسى. كوپ باسشىلاردىڭ الەۋمەتپەن تىعىز بايلانىستا بولا الماي وتىرعانىن ايتقان ن.نۇرجىگىتوۆ ەندى سىلتاۋدى كوپ ايتىپ, حالىققا جاقىن بولماعان باسشىلارمەن, اۋماقتىق ينسپەكتورلارمەن بىرگە جۇمىس ىستەي المايتىنىن ايتتى. ال «جۇمىس جەدەل, جاڭاشا جۇرەتىن بولسىن» دەگەن تالابىنا جەرگىلىكتى شەنەۋنىكتەردىڭ قانشالىقتى شىداپ بەرە الاتىنى بەلگىسىز...
جامبىل وبلىسى
