وبلىستىق جولاۋشىلار كولىگى جانە اۆتوموبيل جولدارى باسقارماسىنىڭ باسشىسى سامات ايتقاليەۆتىڭ مالىمەتىنشە, «روسسيا» اۋە كومپانياسى 23 ساۋىردە «Superjet 100» ۇشاعىمەن اۋە رەيسىن باستايدى.
«رەسەيلىك اۋە كومپانياسىنىڭ «اتىراۋ–ماسكەۋ–اتىراۋ» باعىتىنداعى ۇشاعى اپتاسىنا 3 رەت – دۇيسەنبى, سارسەنبى, سەنبى كۇندەرى قاتىنايدى. اتىراۋدان ساعات 17:40-تا ۇشادى. ماسكەۋدەن ۇشقان ۇشاق اتىراۋعا ساعات 16:30-دا قونادى. ۇشۋ ۇزاقتىعى – 2 ساعات 20 مينۋت. ال «Air Astana» اۋە كومپانياسى 26 ساۋىردە «اتىراۋ–ىستانبۇل–اتىراۋ» باعىتىندا جاڭا رەيس اشادى. بۇل اۋە رەيسى سەيسەنبى, جۇما كۇندەرى ورىندالادى. اتىراۋدان ىستانبۇل باعىتىنا قاتىنايتىن ۇشاق ساعات 08:10-دا اۋەگە كوتەرىلەدى. ىستانبۇلدان اتىراۋ قالاسىنا ساعات 17:05-تە كەلىپ قونادى. اۋە رەيسىنىڭ ۇشۋ ۇزاقتىعى – 4 ساعات 10 مينۋت. بيلەت قۇنى ماسكەۋ باعىتىنا 93 مىڭ, ىستانبۇلعا دەيىن 114 مىڭ 300 تەڭگەدەن باستالادى», دەپ ءمالىم ەتتى س. ايتقاليەۆ.
ونىڭ ايتۋىنا قاراعاندا, 26 ساۋىردە اتىراۋدان رەسەيدىڭ استراحان قالاسىنا قاتىنايتىن اۋە رەيسىنىڭ العاشقى ۇشاعى ۇشادى. «Qazaq Air» اۋە كومپانياسىنىڭ «BC Bombardier Dash 8-400» ۇشاعى سەيسەنبى, سەنبى كۇندەرى اتىراۋدان ساعات 10:40-تا اۋەگە كوتەرىلەدى. اتىراۋعا سەيسەنبىدە ساعات 13:00-دە, سەنبى كۇنى ساعات 12:40-تا كەلىپ قونادى. ەكى ارالىققا ۇشۋ ۋاقىتى 50 مينۋتتى قۇرايدى. ءبىر باعىتتاعى بيلەت قۇنى 35 مىڭ 800 تەڭگەدەن باستالادى.
ايانا توعانبەك
