جاڭارعان مۇراجاي-ءۇيدىڭ اشىلۋ راسىمىنە قالا اكىمى ەربولات دوساەۆ قاتىستى, وعان العاشقىلاردىڭ ءبىرى بولىپ جازۋشىنىڭ قىزدارى – گۇلنار مەن گاۋحار مۇسىرەپوۆالار كەلدى.
«كۇردەلى جوندەۋدەن, مودەرنيزاتسيادان جانە رەەكسپوزيتسيادان كەيىن عابيت مۇسىرەپوۆ مۇراجايى ەلىمىزدەگى العاشقى زاماناۋي مۋلتيمەديالىق ادەبي ورتالىققا اينالادى. رەكونسترۋكتسيا جانە رەەكسپوزيتسيا بويىنشا جۇرگىزىلگەن كەشەندى جۇمىس جىل سايىن مۇراجايعا كەلۋشىلەر سانىن ەكى ەسەگە – 22 مىڭ ادامعا دەيىن ارتتىرۋعا مۇمكىندىك بەرەدى دەپ جوسپارلانۋدا», دەدى الماتى قالاسى اكىمدىگىنىڭ ءباسپاسوز قىزمەتى.
مۇراجايدى جاڭارتۋ جۇمىستارىنا مۋزەي جانە ارحيۆ ءىسى سالاسىنداعى جەتەكشى ماماندار, ديزاينەرلەر, سۋرەتشىلەر, بەينەينجەنەرلەر جانە ت.ب. تارتىلدى. جاڭارتىلعان مۇراجايدىڭ جوباسى جازۋشىنىڭ تۋىستارىمەن كەلىسىلدى, جوبانىڭ تۇجىرىمداماسى مەن ەسكيزىن الماتى قالاسىنىڭ مادەنيەت باسقارماسى بەكىتتى.
ەسكە سالساق, عابيت مۇسىرەپوۆتىڭ سوڭعى 18 جىل تۇرعان پاتەرى 1991 جىلى قر ورتالىق مەملەكەتتىك مۋزەيىنىڭ ءبىر بولىگى رەتىندە مۇراجايعا اينالعان. 1999 جىلدان باستاپ نىسان س.مۇقانوۆ پەن ع.مۇسىرەپوۆتىڭ مەملەكەتتىك ادەبي-مەموريالدىق مۇراجاي كەشەنى بولىپ قايتا قۇرىلدى. 2015 جىلدان باستاپ مۇراجاي «الماتى قالاسى مۋزەيلەر بىرلەستىگى» كمقك قۇرامىندا.
ع.مۇسىرەپوۆ مۇراجاي-ءۇيىنىڭ الاڭى 114,6 شارشى مەتردى قۇرايدى. 2 مەموريالدىق بولمە, 1 ادەبي زال بار. مەموريالدىق بولمەدەگى زاتتار (جازۋ ۇستەلى, كىتاپحانا, جەكە تۇتىنۋ زاتتارى, سىيلىق زاتتارى جانە ت.ب.) بۇرىنعى كۇيىندە ساقتالعان.
ايانا توعانبەك
