«پرەزيدەنت شەتەلدىك ۋنيۆەرسيتەتتەردىڭ كەمىندە بەس فيليالىن اشۋدى تاپسىردى. ەلدە مونتفورت (لەستەر) ۋنيۆەرسيتەتىنىڭ فيليالى جۇمىس ىستەيدى. سونداي-اق قوزىباەۆ اتىنداعى سقو ۋنيۆەرسيتەتىنىڭ بازاسىندا اريزونا ۋنيۆەرسيتەتىنىڭ فيليالى قۇرىلادى. سونداي-اق اتىراۋ مەن الماتىدا جەتەكشى شەتەلدىك تەحنيكالىق ۋنيۆەرسيتەتتەر اشىلادى. قازىر تاراپتار كەلىسسوزدەر جۇرگىزىپ جاتىر», دەدى ءبىلىم جانە عىلىم ءمينيسترى اسحات ايماعامبەتوۆ.
ونىڭ ايتۋىنشا, كادرلاردى ساپالى دايارلاۋ ءۇشىن باقىلاۋ ەكى باعىتتا جۇرگىزىلەدى. ءبىرىنشىسى - ليتسەنزيادان ايىرۋ نەمەسە ساپاسىز جوو نەمەسە كوللەدجدى جابۋ. ەكىنشىسى - جوعارى وقۋ ورنىن نەمەسە كوللەدجدى بەيىندەۋ, ليتسەنزياعا بەيىندى ەمەس جانە تالاپ ەتىلمەگەن قوسىمشالاردى قايتارۋ.
«قازىرگى ۋاقىتتا 15 جوعارى وقۋ ورنى مەن 31 كوللەدج جابىلدى. تاعى 4 جوو مەن 29 كوللەدج جابىلۋ ساتىسىندا. 61 جوو-داعى ليتسەنزيالارعا 500 قوسىمشانى جانە 375 كوللەدجدەگى 2200 قوسىمشانى قايتارۋ قامتاماسىز ەتىلدى. پەداگوگتاردى دايارلايتىن جوعارى وقۋ ورىندارىنىڭ سانى 86-دان 50-گە دەيىن ازايدى. ال زاڭگەرلەردى دايارلايتىن جوعارى وقۋ ورىندارىنىڭ سانى 72-دەن 61-گە دەيىن قىسقاردى», دەدى بعم باسشىسى.
ول بۇل باعىتتاعى جۇمىستار ءالى دە جالعاساتىنىن ايتتى.
«IT» جانە «تۋريزم» ماماندىقتارى بويىنشا بىلىكتىلىك تالاپتارىنا ەكونوميكانىڭ ناقتى سەكتورىنان پراكتيك-مامانداردى تارتۋ بويىنشا وزگەرىستەر ەنگىزىلدى دەلىك. تەك پروفەسسورلار عانا ەمەس, سونىمەن قاتار پراكتيكتەر, مىسالى, باعدارلاماشىلار دا ساباق بەرۋى كەرەك. ولاردىڭ وقۋ ورىندارىنا كەلىپ, ءوز تاجىريبەلەرىمەن ءبولىسۋى ماڭىزدى. سونداي-اق 5 جىل مەرزىمگە ليتسەنزيالاۋ ەنگىزىلدى. بۇل ەرەجەنى ءماجىلىس پەن سەنات قولدادى», دەپ قوستى اسحات ايماعامبەتوۆ.
