1992 جىلدان بەرى ۇزىلمەي كەلە جاتقان «جاس تۇلپار» بۇگىندە بويىندا ونەر ۇشقىنى بار جاس ورەندەردىڭ تالابىن ۇشتاپ, قاناتىن قاتايتاتىن ۇلكەن مەكتەپكە اينالعان. وسى ۋاقىتقا دەيىن توبىل-تورعايدىڭ تالاي تاستۇلەگى وسى ورتادان تۇلەپ ۇشتى. ءبىرى رەسپۋبليكاعا تانىمال ايتىسكەر اتانسا, ءبىرى ءانشى-جىرشىلىق باعىتتى ۇستانىپ, وڭىردە ۇلتتىڭ ءداستۇرلى ونەرىن ناسيحاتتاپ ءجۇر.
احاڭ تويىنا ارنالعان ايتىستىڭ شىمىلدىعى بەلگىلى ايتىسكەر, قازاقستاننىڭ ەڭبەك سىڭىرگەن مادەنيەت قايراتكەرى ءالپيا ورمانشينانىڭ قۇتتىقتاۋ سوزىمەن اشىلدى.
– «جاس تۇلپار» ايتىسى ءبىرىنشى رەت ناۋىرزىم اۋدانىندا ءوتتى. سودان بەرى وسى ايتىستىڭ كەرۋەن-ساپارى ءالى توقتاماي كەلەدى. جوبا اياسىندا قانشاما دارىننىڭ جولى اشىلدى. كوبى شاكىرتىمە اينالدى. سەندەر دە مەنەن ءتالىم الامىن دەسەڭدەر, ەش قارسىلىعىم جوق, ەسىگىم ءاردايىم اشىق. ايبەك قاليەۆ, ماماي ىزتىلەۋلەر العاشقى شاكىرتتەرىم بولدى. س.وتەلباەۆا, م.وسپانوۆ, ە.اۋەزحاندارعا دا ءتالىم بەردىم. ءبارىڭ بىردەي ايتىسكەر بولىپ كەتپەسسىڭدەر, بىراق ۇلكەن جۇرەكتى ونەر ادامىنا اينالاتىندارىڭا سەنىمىم مول. جورتقاندا جولدارىڭ بولسىن», دەدى اقىن.
جاس اقىندار شەشىلە سويلەپ, كوسىلە جىرلادى دەي الماسپىز. دەگەنمەن كوبى ەندى عانا ساحنادان كورىنە باستاعان بالعىندار عوي. بارىنشا ويلارىن ورنەكتەپ, سوزدەرىن كەستەلەپ جەتكىزۋگە تىرىستى. ءبىرى ۇشقىرلىعى مەن تاپقىرلىعىن تانىتىپ, قارسىلاسىنا قامشى باسىپ وتىرسا, ەندى ءبىرى قوبالجىپ, توسىلىپ قالىپ جاتتى.
ايتسە دە امانكەلدى اۋدانىنان كەلگەن سايات اۋەزحان, قوستاناي قالاسىنىڭ نامىسىن قورعاپ شىققان ءدىناسىل باقىتبەك, رۋدنىيلىق جامبىل توققوجاەۆ, مەڭدىقارا اۋدانىنان كەلگەن اقجۇنىس ءجۇرسىن سياقتى بالالاردىڭ ونەرى كوپشىلىك كوڭىلىنەن شىقتى.
قازىلار القاسى سوڭعى اينالىمعا 6 اقىندى وتكىزىپ, بىردەن جۇپتاپ بەردى. ناتيجەسىندە, باس جۇلدەنى ءدىناسىل باقىتبەك جەڭىپ الدى. 1-ورىنعا جامبىل توققوجاەۆ لايىق دەپ تانىلىپ, اقجۇنىس ءجۇرسىن ەكىنشى ورىندى يەلەندى. ال بەيىمبەت مايلين اۋدانىنىڭ جاس اقىنى نۇرايلىم قۋانتاي ءۇشىنشى ورىندى قاناعات تۇتتى. جىر سايىسىنا قاتىسقان جاس ونەرپازداردىڭ بارىنە ارنايى ديپلومدار مەن اقشالاي سىيلىقتار تابىس ەتىلدى.
قوستاناي وبلىسى
