الماتى قالاسى اكىمدىگىنىڭ قولداۋىمەن ورناتىلعان ەسكەرتكىشتىڭ اشىلۋ سالتاناتىنا شاھار باسشىسى ەربولات دوساەۆ, قازاقستاننىڭ ەڭبەك ەرى ءاسانالى ءاشىموۆ, قازاقستاننىڭ ەڭبەك ەرى الىبەك دىنىشەۆ, قازاقستاننىڭ حالىق ءارتىسى التىنبەك قورازباەۆ, اقىن, مەملەكەتتىك سىيلىقتىڭ لاۋرەاتى اقۇشتاپ باقتىگەرەەۆا, مادەنيەت قايراتكەرى قۋانىش ابدىقالىموۆ, ءانشىنىڭ تۋىستارى – ۇلى تاجەن مەن مارال باعلانوۆتار قاتىستى.
ء«بىزدىڭ ۇلى ءانشىمىز روزا باعلانوۆاعا ەسكەرتكىش ورناتۋ – ونىڭ مۇراسىن قۇرمەتتەۋ جانە ەستە ساقتاۋ. ول مۋزىكا ونەرىنىڭ شىرقاۋ بيىگىندەگى جارىق جۇلدىز بولدى. ونىڭ ەرەكشە داۋىسى مەن تالانتى حالقىمىزدىڭ باعا جەتپەس قۇندىلىعىنا اينالدى. ءانشىنىڭ سۇيىكتى قالاسى – الماتىدا 100 جىلدىق مەرەيتوي اياسىندا روزا باعلانوۆانىڭ ەسىمىن ماڭگى ەستە قالدىرۋ ءۇشىن ەسكەرتكىش ورناتقانىمىزعا شەكسىز قۋانىشتىمىز», دەدى ەربولات دوساەۆ. قالا اكىمى بىرنەشە بۋىن ۇرپاققا ونەرىمەن ۇلگى بولىپ, اتى اڭىزعا اينالعان ءانشىنىڭ قازاق حالىق مۋزىكاسى مەن قازاقستان كومپوزيتورلارى شىعارماشىلىعىن دامىتۋعا جانە ناسيحاتتاۋعا قوسقان باعا جەتپەس ۇلەسىن كەڭىنەن اتاپ ءوتتى.
قازاق ونەرىنە قايتالانباس ءىز قالدىرعان تاريحي تۇلعانىڭ ەسكەرتكىشى كومپوزيتسيالىق شەشىمىنىڭ شىمىرلىعىمەن كوز تارتادى. قولا جانە گرانيتتەن جاسالعان ەسكەرتكىشتىڭ بيىكتىگى – 4,8 مەتر. اۆتورلارى – د.اعزاموۆ, ۋ.اقجولتاي, ا.جامحان, ا.قابىل. ۇلكەن شىعارماشىلىق ورلەۋدىڭ ءىزى بايقالاتىن تالانتتى مۇسىنشىلەردىڭ تۋىندىسىندا ك ۇلىمدەگەن جۇزىنە بۇرمەلى كويلەگى مەن ويۋلى بەشپەنتى, ۇلپىلدەگەن ۇكىلى تاقياسى جاراسقان كۇمىس كومەي ءانشى ءدال وسى ءسات ساحنادا «اح, سامارا گورودوك» ءانىن سىزىلتا سالىپ تۇرعانداي اسەر قالدىرادى. تاستۇعىردىڭ ۇستىنەن تۇتاس ءبىر ءداۋىردىڭ ۇلتتىق بەينەسى ءتونىپ تۇرعانداي. ساحنانى سەرىك ەتكەن سانالى عۇمىرىندا قازاقتىڭ ۇلتتىق كيىمى مەن ءسان-سالتاناتىن ناسيحاتتاپ وتكەن ۇلتجاندى ءانشىنىڭ وبرازىنان كۇللى حالقىمىزدىڭ بولمىسى مەن ءومىر سالتىنىڭ اڭعارىلىپ تۇرۋى – بيىك شەبەرلىكتىڭ جەمىسى. اسەم الماتىنىڭ ءارىن كىرگىزگەن ءانشى ءمۇسىنى جيىرمادان استام جوبانىڭ ىشىنەن ۇزدىك دەپ تانىلىپ, اشىق بايقاۋ ناتيجەسىندە تاڭدالىپ الىنعان.
جىلدار وتكەن سايىن ەرەكشە دارىن يەسىنە ساعىنىشى ۇدەي تۇسكەن ەل-جۇرتىنىڭ قۇرمەتى كەشكىلىك رەسپۋبليكا سارايىندا وتكەن «اقماڭدايلىم» اتتى مەرەكەلىك كونتسەرتپەن جالعاسىن تاپتى. قازاقستاننىڭ ەڭبەك سىڭىرگەن ونەر قايراتكەرلەرى مەن تانىمال انشىلەردىڭ ورىنداۋىندا روزا باعلانوۆانىڭ رەپەرتۋارىنداعى بەلگىلى اندەر شىرقالىپ, دەرەكتى فيلم كورسەتىلدى. ايگىلى اجەسىنىڭ قۇرمەتىنە ءۇربيبى دەگەن ەسىمدى يەلەنگەن نەمەرەسى ءان سالىپ, باعلانوۆتار اۋلەتىندەگى ونەر ساباقتاستىعى ەشقاشان ۇزىلمەيتىنىن بالعىن ۇنىمەن ءبىر بايقاتتى. ساعىنىشقا تولى سازدى كەش ساف ونەر مەن سۇلۋلىقتىڭ سيمۆولىنداي بولعان حالىقتىڭ سۇيىكتى قىزىنا كورسەتىلەتىن قۇرمەت پەن تاعزىمنىڭ ماڭگى تولاستامايتىنىن سەزىندىرە ءتۇستى.
الماتى
