«2022 جىلعى ناۋرىزدا ەلەكتروندىق ەڭبەك بيرجاسىندا 72,7 مىڭ بوس جۇمىس ورنى جانە 48,8 مىڭ تۇيىندەمە ورنالاستىرىلدى. وتكەن ايمەن سالىستىرعاندا جاريالانعان بوس ورىندار سانىنىڭ شامالى ءوسۋى (+0,5%) جانە ىزدەنۋشىلەر تاراپىنان بەلسەندىلىكتىڭ كۇرت تومەندەۋى (-11%) بايقالدى», دەلىنگەن ەڭبەك مينيسترلىگى مالىمەتىندە.
وسىلايشا ەگەر بيىل اقپان ايىندا بوس ورىندار سانى تۇيىندەمە سانىنان 32%-عا اسىپ كەتسە, ناۋرىز ايىندا بوس ورىندار مەن ىزدەنۋشىلەر اراسىنداعى الشاقتىق شامامەن 50%-دى قۇرادى.
«وڭىرلىك بولىنىستە بوس ورىندار سانى جامبىل (+28% نەمەسە 3,4 مىڭ بوس ورىنعا دەيىن), پاۆلودار (+22% – 5,9 مىڭ بوس ورىنعا دەيىن), سولتۇستىك قازاقستان (+14% – 2,5 مىڭ بوس ورىنعا دەيىن) جانە باتىس قازاقستان (+12% – 3 مىڭ بوس ورىنعا دەيىن) وبلىستارىندا ءوستى. بۇل رەتتە وڭىرلەردە جۇمىس بەرۋشىلەردىڭ قاجەتتىلىكتەرى ءارتۇرلى. ماسەلەن جامبىل وبلىسىندا ورتا مەكتەپ مۇعالىمدەرىنە, پاۆلودار وبلىسىندا كۇزەتشىلەرگە, جۇرگىزۋشىلەر مەن كوندۋكتورلارعا سۇرانىس جوعارى. سولتۇستىك قازاقستان وبلىسىندا مەدبيكەلەر مەن مەيىرگەرلەرگە, سانيتارلار, تاراتۋ جەلىلەرىن پايدالانۋ جونىندەگى ەلەكترومونتەرلار, سونداي-اق اۋىل شارۋاشىلىعىنىڭ ينجەنەر – مەحانيزاتورلارى قاجەت», دەدى «ەڭبەك رەسۋرستارىن دامىتۋ ورتالىعى» اق باسقارۋشى ديرەكتورى الەكساندرا مولچانوۆسكايا.
سونىمەن قاتار جۇمىس ىزدەۋشىلەر تاراپىنان بەلسەندىلىكتىڭ بارىنشا ءوسۋى شىمكەنت قالاسىندا (+48,1%, 4,3 مىڭ تۇيىندەمەنى قۇراپ), پاۆلودار وبلىسىندا (+20,3% جانە 2,6 مىڭ تۇيىندەمە) جانە قوستاناي وبلىسىندا (+12,7% جانە 2,1 مىڭ تۇيىندەمە) بايقالدى. بۇل رەتتە تۇيىندەمە سانىنىڭ كۇرت قىسقارۋى 5 وڭىردە بايقالدى: ماڭعىستاۋ (-62%), الماتى (-30%), قىزىلوردا (-24%), اتىراۋ (-23%) جانە اقتوبە (-22%) وبلىستارى.
«ناۋرىزدا ەرلەر مەن ايەلدەر تەڭ جۇمىس ىزدەدى. بۇل رەتتە جاس بولىنىسىندە, الدىڭعى ايداعىداي, ىزدەنۋشىلەردىڭ ۇشتەن ءبىرى جاستار اراسىنان, ال ءاربىر ءتورتىنشى – نەعۇرلىم جەتىلگەن جاستا (46 جاس جانە ودان جوعارى) بولدى», دەپ اتالىپ وتكەن ۆەدومستۆو حابارلاماسىندا.
