قازاقستاندا SportFEST Kazakhstan رەسپۋبليكالىق مەكتەپ سپارتاكياداسىنىڭ ىرىكتەۋ كەزەڭى اياقتالدى. وعان 7 مىڭنان استام وقۋشى قاتىستى.
جارىستا رەسپۋبليكانىڭ 17 ءوڭىرىنىڭ 215 اۋدانىنان 2004-2007 جىلعى وقۋشىلار باق سىناستى. SportFEST Kazakhstan سپارتاكياداسىندا بۇرىنعىداي شاحمات, ۇستەل تەننيسى, قىزدار اراسىندا باسكەتبول, ۇلدار اراسىندا فۋتزال, اسكەري قولدانبالى سپورت, توعىزقۇمالاق ويىندارى بار.
سايىس ەلىمىزدىڭ بارلىق وڭىرىندە ءوتتى. سپارتاكيادا ەكى ىرىكتەۋ كەزەڭىنەن تۇرادى. الدىمەن بارلىق وبلىستا جانە نۇر-سۇلتان, الماتى, شىمكەنت قالالارىندا ايماقتىق جارىستار وتەدى. بۇل كەزەڭدە اۋداندىق, وبلىستىق ماڭىزى بار قالانىڭ كومانداسى ءوزارا سايىسقا تۇسەدى. ءى كەزەڭنىڭ جەڭىمپازدارى «بالداۋرەن» لاگەرىندە (بۋراباي قالاسى) وتەتىن ءىى تۋردا ءوز ءوڭىرىنىڭ نەمەسە قالاسىنىڭ نامىسىن قورعايدى.
SportFEST Kazakhstan - بۇل جاس سپورتشىلاردى قولدايتىڭ بىرەگەي جوبا. بۇل ينيتسياتيۆا Samruk-Kazyna Trust الەۋمەتتىك جوبالاردى دامىتۋ قورىنىڭ قولداۋىمەن وتەدى. قور بالالاردى قولداۋ مەن دامىتۋعا ارنالعان كوپتەگەن الەۋمەتتىك ماڭىزدى جوبالاردى جۇزەگە اسىرىپ كەلەدى.
نۇر-سۇلتان قالاسىنداعى اقتىق ىرىكتەۋ كەزەڭىندە فيناليستەردى Samruk-Kazyna Trust الەۋمەتتىك جوبالاردى دامىتۋ قورىنىڭ باس ديرەكتورى الفيا اديەۆا قۇتتىقتادى. ايتۋىنشا سپورت تەك رەكوردتار مەن جارىستار ەمەس, بۇل بىرىنشىدەن جان جانە ءتان ساۋلىعى, تەمىردەي ءتارتىپ ءارى كەرەمەت ورتا.
«وزدەرىڭىز بىلەتىندەي, Samruk-Kazyna Trust جۇمىسىنىڭ باسىم باعىتتارىنىڭ ءبىرى بالالارمەن جۇمىس, ولاردىڭ قۇقىعىن قورعاۋ, ءارتۇرلى باعىت بويىنشا ناقتى قولداۋ كورسەتۋ. ءدال وسى باستاما اياسىندا, قور وقۋشىلار اراسىندا سالاۋاتتى ءومىر سالتىن ۇستانۋ قاعيداتتارىن قالىپتاستىرىپ, كوپتەگەن جاستىڭ سپورتقا كەلۋىنە ىقپال ەتەدى», دەدى ا. اديەۆا.
ايتا كەتەيىك, بالالار مەن جاسوسپىرىمدەردىڭ ءوزىن-ءوزى تانىتۋىنا جانە دەنە دايىندىعىن تۇزەتۋگە باعىتتالعان رەسپۋبليكالىق سپارتاكيادا جاستار اراسىندا بۇقارالىق سپورت پەن پاتريوتتىق تاربيەنى ناسيحاتتايتىن جارىس رەتىندە تانىلدى. جوبا باستالعاننان بەرى رەسپۋبليكا بويىنشا 21 000-نان استام وقۋشى قاتىستى.
«مەن فۋتبولمەن جەتى جىل بويى اينالىسىپ كەلەمىن, بىراق بۇگىن ۇمىتىلماس ەموتسيالار بولدى, ءاربىر تۋرنير قىزىقتى وتەدى. ۇيىمداستىرۋشىلارعا ءوزىڭدى تاعى ءبىر رەت دالەلدەپ, جاڭا ادامدارمەن تانىسۋعا بولاتىن وسىنداي تۋرنير ءۇشىن راحمەت. دوستارمەن ويناۋعا مۇمكىندىك بەرگەنىڭىز ءۇشىن راحمەت», دەپ نۇر-سۇلتان قالاسىنداعى ءبىرىنشى ىرىكتەۋ كەزەڭىنىڭ قاتىسۋشىسى ءوز اسەرىمەن ءبولىستى.
ايتا كەتەيىك, سپورتتىق ويىندار وتكىزۋ ءۇشىن قۇرال-جابدىقتار ساتىپ الىنادى دا كەيىن سول وڭىردەگى مەكتەپتەرگە سىيعا بەرىلەدى.
