بۇل كۇنگە دەيىن جەر شارىنداعى 7 ملرد ادامنىڭ 600-گە جۋىعى عارىشقا ۇشقان. ونىڭ ۇشەۋى قازاق. توقتار اۋباكىروۆتىڭ ىزىمەن تالعات مۇساباەۆ جانە ايدىن ايىمبەتوۆ وربيتاعا اتتاندى. ساپار بارىسىندا 39 عارىشتىق ەكسپەريمەنت جاسالدى. وسىنىڭ ارقاسىندا قازاقستاننىڭ عارىش عىلىمىن حالىقارالىق قاۋىمداستىق مويىندادى.
1991 جىلى 2 ساۋىردە قازاقتان شىققان تۇڭعىش عارىشكەر توقتار اۋباكىروۆ كەڭەس وداعى عارىشكەرلەر دايارلاۋ ورتالىعىندا عارىشقا ۇشۋ دايىندىعىنا كىرىسىپ, سول جىلى 2 قازاندا بايقوڭىردان «سويۋز تم-13» كەمەسىمەن عارىشقا ۇشىپ, قازاننىڭ 10-ىندا جەرگە قايتىپ قوندى.
قازاقتان شىققان تۇڭعىش عارىشكەر, كەڭەس وداعىنىڭ باتىرى, قازاقستان رەسپۋبليكاسىنىڭ حالىق قاھارمانى, تەحنيكا عىلىمىنىڭ دوكتورى, پروفەسسور توقتار اۋباكىروۆ 1946 جىلى ماۋسىمنىڭ 27-ىندە قاراعاندى وبلىسى قارقارالى اۋدانى, «1-ءىنشى ماي» ۇجىمشارىندا دۇنيەگە كەلگەن. 1969 جىلى رەسەي فەدەراتسياسىنداعى ارماۆير جوعارى اسكەري ۇشقىشتار ۋچيليششەسىن, 1979 جىلى اۆياتسيا ينستيتۋتىن بىتىرگەن.
تالعات مۇساباەۆ – قازاقتىڭ 2-ءشى, ال الەمنىڭ 309-شى عارىشقا ءۇش رەت ۇشقان عارىشكەرى. 1994 جىلعى ماۋسىمنىڭ 1-ىنەن قاراشانىڭ 4-ىنە دەيىن «سويۋز-تم» عارىش كەمەسىنىڭ بورت-ينجەنەرى رەتىندە عارىشتا بولىپ, 2 رەت اشىق عارىش كەڭىستىگىنە شىقتى.
قازاقستان رەسپۋبليكاسىنىڭ جانە رەسەي فەدەراتسياسىنىڭ ۇشقىش-عارىشكەرى, قازاقستان رەسپۋبليكاسىنىڭ حالىق قاھارمانى جانە رەسەي فەدەراتسياسىنىڭ باتىرى, اۆياتسيا گەنەرال-لەيتەنانتى, تەحنيكا عىلىمىنىڭ دوكتورى, «ەكولوگيا» قازاقستان حالىق اكادەمياسىنىڭ اكادەميگى تالعات امانگەلدى ۇلى مۇساباەۆ 1951 جىلى 7 قاڭتاردا الماتى وبلىسى, جامبىل اۋدانىنىڭ قارعالى اۋىلىندا دۇنيەگە كەلگەن.
ايدىن ايىمبەتوۆ 2015 جىلعى 2-ءشى قىركۇيەكتە عارىشقا ۇشىپ, ءۇشىنشى قازاق عارىشكەرى اتاندى. «سويۋز تما-18م» باسقارىلاتىن عارىشتىق كەمەسى بايقوڭىر عارىش ايلاعىنان ەلوردا ۋاقىتىمەن ساعات 22:37 مينۋت وتكەندە اتتاندى. حالىقارالىق ەكيپاج قۇرامىندا رەسەيلىك عارىشكەر, №1 بورتينجەنەرى سەرگەي ۆولكوۆ, دانيا كورولدىگىنىڭ استروناۆتى اندرەاس موگەنسەن جانە №2 بورتينجەنەرى قازعارىش عارىشكەرى ايدىن ايىمبەتوۆ بولدى.
10 كۇنگە سوزىلعان ساپاردا ايدىن ايىمبەتوۆ عارىشتاعى 5-ءىنشى ۇلتتىق عىلىمي زەرتتەۋ باعدارلاماسىن ورىندادى. العاشقى 4 باعدارلاما 1991 جىلى توقتار اۋباكىروۆتىڭ جانە 1994, 1998, 2001 جىلدارى تالعات مۇساباەۆتىڭ عارىشتىق ساپارلارىندا اتقارىلعان ەدى.
